ރާއްޖެއާއި ފަލަސްތީނާއި ދެމެދު އޮތް ޒަމާންވީ ގުޅުން ވަރުގަދަކަމާއެކު އަބަދުވެސް އޮންނާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވި ފަލަސްޠީނުގެ ރައީސް މަޙްމޫދު އައްބާސްއާއި ބަދަލުކުރައްވައި ކުރެއްވި ޓްވީޓެއްގައެވެ. މި ބައްދަލުކުރެއްވުން ކުރިއަށް ގެންގޮސްފައިވަނީ، ޤަތަރުގައި މިހާރު ކުރިއަށްދާ އ.ދ.ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ 5 ވަނަ ކޮންފަރެންސްގެ ހަވާސާގެ ތެރެއިންނެވެ.
މި ބައްދަލުވުމުގައި ދެ ޤައުމުގެ ގުޅުމާއި، ޙާލަތުގެ މައްޗަށް ދެބޭފުޅުން ވަނީ އަލިއަޅުވާލާފައެވެ. މި ބައްދަލުވުމަށްފަހު ރައީސުޖުމްހޫރިއްޔާ ކުރެއްވި ޓްވީޓެއްގައި ވިދާޅުވީ، ބައްދަލުވުމުގެ ސަބަބުން ދެ ޤައުމުގެ ގުޅުން އިތުރަށް ބަދަހިވެއްޖެކަމަށެވެ. އަދި ރާއްޖެއާއި ފަލަސްތީނާއި ދެމެދު އޮތް ޒަމާންވީ ގުޅުން، މިގޮތުގައި ވަރުގަދަކަމާއެކު އޮންނާނެކަމަށް ރައީސުލްޖުމްހޫރިއްޔާ ވިދާޅުވިއެވެ. މީގެއިތުރުން ފަލަސްތީނަށް ދިމާވެފައިވާ އެކިއެކި މައްސަލަތަކުގައި، ރާއްޖެއިން ދެވެންއޮތް އެހީތެރިކަމާއި ފުރިހަމަ އެއްބާރުލުހުން އަބަދުވެސް ދެމުންދާނެކަމުގެ ޔަގީންކަން، ފަލަސްތީންގެ ރައީސްއަށް ރާއްޖޭގެ ރައީސުލްޖުމްހޫރިއްޔާ ވަނީ އަރުވާފައެވެ.
ރާއްޖެއާއި ފަލަސްތީނާއި އޮތް ގުޅުމުގެތެރެއިން ރާއްޖެއިން ފަލަސްތީނަށް ކަނޑައެޅުއްވި ފުރަތަމަ ސަފީރު، މުޙައްމަދު ޚަލީލް، ފަލަސްޠީނުގެ ރައީސް މަޙުމޫދު ޢައްބާސްއަށް އެމަނިކުފާނުގެ ސަފީރުކަމުގެ ފަތްކޮޅު އަރުވާފައިވަނީވެސް މި މަރޗް މަހުގެ ފުރަތަމަ ދުވަހުއެވެ. ފަތްކޮޅު އެރުވުމުގެ ރަސްމިއްޔާތު ބާއްވާފައިވަނީ އުރުދުންގައި ހުންނަ ފަލަސްޠީނުގެ އެމްބަސީގައެވެ.
ދިވެހިރާއްޖެއާއި ފަލަސްޠީނާ ދެމެދު ސިޔާސީ ގުޅުން ޤާއިމުކޮށްފައިވަނީ 4 އޭޕްރިލް 1982 ގައެވެ.