ތޫނިސްގެ ރައީސް ޤައިސް ސަޢީދު ދެއްވި އިންޒާރަކާ ގުޅިގެން، އެ ޤައުމުގައި ދިރިއުޅެމުންދާ އެފްރިކާގެ ޤައުމުތަކަށް ނިސްބަތްވާ ރެފިޔުޖީންނާއި އެހެން ރައްޔިތުން އެނބުރި ޤައުމަށް ދަތުރުކުރުމުގެ މަސައްކަތް ފަށައިފިއެވެ. މާރޗު މަހުގެ 4 ވަނަ ދުވަހު އެކަނިވެސް ހުޅަނގު އެފްރިކާގެ ޤައުމުތަކަށް ނިސްބަތްވާ 300 އަށްވުރެ ގިނަ މީހުން ވަނީ ތޫނިސް ދޫކޮށް އަމިއްލަ ވަޒަނަށް ދަތުރުކުރުމަށް ފުރާފައެވެ.
އެ ޤައުމުގައި ދިއިރުޅޭ އެފްރިކާގެ ޤައުމުތަކުގެ ރެފިޔުޖީން އެނބުރި ޤައުމަށް ދާން ފަށާފައި މި ވަނީ، ފެބްރުވަރީ 21 ވަނަ ދުވަހު ސަޢީދު ދެއްކެވި ވާހަކަފުޅަކާ ގުޅިގެންނެވެ. އޭނާ ވިދާޅުވެފައި ވަނީ، ޤަވާޢިދާ ޚިލާފަށް އެ ޤައުމަށް ހިޖުރަކޮށްފައިވާ މީހުން ހޯދައި، އެ މީހުންނާ ދެކޮޅަށް ހަރުކަށި ފިޔަވަޅުތައް އަޅުއްވާނެ ކަމުގައެވެ.
ތޫނިސްގެ ސުލްޙައާއި ހަމަޖެހުން ނަގައިލަން އެ ޤައުމަށް ހިޖުރަކޮށްފައިވާ މީހުން މަސައްކަތް ކުރަމުންދާ ކަމުގައި ވެސް އޭނާ ތުހުމަތު ކުރެއްވިއެވެ. އަދި، މީގެ ތެރޭގައި ތޫނިސްގެ އާބާދީ ބެހިފައިވާ ގޮތަށް ބަދަލުތަކެއް ގެނައުން ހިމެނޭ ކަމުގައި ވެސް އޭނާ ވަނީ ވިދާޅުވެފައެވެ. ނަމަވެސް، މިއިން އެއްވެސް ތުހުމަތަކަށް ބާރުދޭނެ އެއްވެސް ހެއްކެއް އޭނާ ދައްކަވާފައެއް ނުވެއެވެ.
އިރުމަތީ އެފްރިކާގެ އެ ޤައުމުގައި ކުށްކުރުން އިތުރުވެފައި ވަނީ ވެސް އެ ޤައުމަށް ހިޖުރަކޮށްގެން ދިރިއުޅޭ މީހުންގެ ސަބަބުން ކަމުގައި ސަޢީދު ތުހުމަތު ކުރައްވައެވެ. އަދި، މި ކަމާ ގުޅިގެން ގިނަ ބަޔެއްގެ ވަޒީފާ ގެއްލިފައިވާ ކަމަށާއި، ބައެއް މީހުން ގެދޮރުން ނިކުންނަށް ޖެހި، ޢާންމުންނާ ދެކޮޅަށް ހަމަލާތައް ދީފައިވާ ކަމުގައި ވެސް އޭނާ ތުހުމަތު ކުރެއްވިއެވެ.
ސަޢީދުގެ ވާހަކަފުޅާ ގުޅިގެން، ތޫނިސްގައި ދިރިއުޅޭ އެފްރިކާ ބައްރުގެ ޤައުމުތަކަށް ނިސްބަތްވާ މީހުންނަށް ވަނީ ނުރައްކާތެރި ހާލަތަކާ ކުރިމަތިވެފައެވެ. އެ މީހުންނާ ދެކޮޅަށް ހިންގަމުންދާ ޓެރެރިޒަމްގެ އަމަލުތަކާއި، އެ މީހުންނަށް ދޭ ހަމަލާތަކުގެ ޢަދަދު އިތުރުވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ހާމަކުރެއެވެ. އަދި، ގިނަ ޢަދަދެއްގެ ބަޔެއްގެ ވަޒީފާތައް ވެސް ވަނީ ގެއްލިފައެވެ.
މި ތުހުމަތުތަކަށް ރައްދުދިނުމުގެ ގޮތުން އެފްރިކަން ޔޫނިއަން (އޭ.ޔޫ) އިން ވަނީ، ސަޢީދުގެ ވާހަކަފުޅުތަކާ މެދު ކަންބޮޑުވާ ކަމުގައެވެ. އަދި، އޭނާގެ ވާހަކަފުޅުތަކާ ގުޅިގެން އެފްރިކާގެ ޤައުމުތަކުން ވަނީ، ތޫނިސްގައި ދިރިއުޅޭ އެ ޤައުމުތަކަށް ނިސްބަތްވާ މީހުން އަނބުރާ ޤައުމަށް ގެންދިޔުމުގެ މަސައްކަތް ފަށާފައެވެ. އެނބުރި ޤައުމަށް ދިޔުމަށް ބޭނުންވެގެން ގިނަ ޢަދަދެއްގެ ބަޔަކު ވަނީ ތޫނިސްގައި ހުންނަ އެ މީހުންގެ ޤައުމުތަކުގެ އެމްބަސީތަކަށް ގޮސްފައެވެ.
ހުސްވި ހަފުތާގައި ގިނީއިން ވަނީ ތޫނިސްގައި ދިރިއުޅޭ އެ ޤައުމުގެ 50 އަށްވުރެ ގިނަ މީހުން އަނބުރާ ޤައުމަށް ގެންގޮސްފައެވެ. އަދި، އައިވޮރީ ކޯސްޓާއި މާލީއިން ވަނީ މާރިޗު 4 ވަނަ ދުވަހު އެ ޤައުމުތަކަށް ނިސްބަތްވާ 295 ރެފިޔުޖީން އަނބުރާ ޤައުމަށް ގެންގޮސްފައެވެ. އައިވޮރީ ކޯސްޓުގެ 1,100 އަށްވުރެ ގިނަ މީހުން އެނބުރި ޤައުމަށް ދާން ހުށަހަޅާފައިވާ ކަމުގައި އެ ޤައުމުން ބުނެއެވެ.
ތޫނިސްއަކީ 12 މިލިޔަން މީހުންގެ އާބާދީއެއް އޮންނަ ޤައުމެކެވެ. އެ ޤައުމުގައި ގިނަ ޢަދަދެއްގެ ރެފިޔުޖީން ދިރިއުޅޭއިރު، އޭގެ ތެރެއިން 21,000 އަށްވުރެ ގިނަ މީހުންނަކީ ޤަވާޢިދާ ޚިލާފަށް އެ ޤައުމަށް ހިޖުރަކޮށްފައިވާ މީހުން ކަމުގައި ތޫނިސްއިން ބުނެއެވެ.