ޔޫކްރެއިނުގެ އިރުމަތީގައިވާ ޑޮނެޓްސްކްގެ ރަށެއް ކަމުގައިވާ ބަޚްމުތް ވަށައިލާފައިވާނެ ކަމުގައި ރަޝިޔާއިން އެ ސަރަޙައްދަށް ފޮނުވާފައިވާ ވެގްނާ ގުރޫޕުގެ ކުލީ ސިފައިން ބުނެފިއެވެ. ބަޚްމުތް ހިފުމަށް ރަޝިޔާއިން މަސައްކަތް ކުރަމުންދާތާ ހަތް މަސް ފާއިތުވެފައިވާއިރު، އަދި މިހާތަނަށް އެ ކަން ކާމިޔާބު ކުރެވޭ ގޮތް ވަނީ ނުވެފައެވެ.
މީގެ ކުރިން ވެސް އެތައް ފަހަރެއްގެ މަތިން ރަޝިޔާއިން ވަނީ ބަޚްމުތް ހިފާފައިވާ ކަން އިޢުލާނުކޮށްފައެވެ. ނަމަވެސް، ޔޫކްރެއިނުން ދަނީ އެ ކަން ދޮގުކުރަމުންނެވެ. އަދި، ބަޚްމުތް ދިފާޢު ކުރުމުގައި ޔޫކްރެއިން ސިފައިން ސާބިތުކަމާ އެކު ދެމިތިބި ކަމުގައި އެ ޤައުމުން ބުނެފައިވެއެވެ.
ނަމަވެސް، ވެގްނާ ގުރޫޕުން ބުނީ، އެ ގުރޫޕުގެ ކުލީ ސިފައިންނާއި ރަޝިޔާގެ އަސްކަރިއްޔާގެ ސިފައިން ގުޅިގެން ބަޚްމުތް ވަށައިލާފައިވާ ކަމުގައެވެ. އަދި، ޔޫކްރެއިން ސިފައިންގެ ބާރުގެ ދަށުގައި މި ވަގުތު އޮތީ އެ ރަށަށް ވަދެވެން އޮތް އެންމެ މަގެއް ކަމުގައި ވެސް އެ ގުރޫޕުން ބުނެއެވެ. ބަޚްމުތުން ފޭބުމުގެ އަމުރު ލިބިފައިވާ ކަމަށް އެ ރަށުގައި ހަރަކާތްތެރިވާ ޔޫކްރެއިނުގެ އަސްކަރިއްޔާގެ ޑްރޯން ޔުނިޓެއްގެ ކޮމާންޑަރަކު ކަށަވަރުކޮށްދީފައިވާ ކަމަށް މީޑިޔާތަކުން ރިޕޯޓު ކުރެއެވެ.
މީގެ އަހަރެއްހާ ދުވަސް ކުރިން ޔޫކްރެއިނަށް ސިފައިން ފޮނުވައިގެން ރަޝިޔާއިން ހަނގުރާމަ ފެށުމުގެ ކުރިން ބަޚްމުތަކީ 70,000 އެއްހާ މީހުންގެ އާބާދީއެއް ދިރިއުޅެމުންދިޔަ، ސިނާޢީ މަސައްކަތްތައް ކުރާ ރަށެކެވެ. އެ ރަށް ހިފުމަށް ރަޝިޔާ ސިފައިން ދެމުންދާ ވަރުގަދަ ހަމަލާތަކުގައި އެ ރަށުގެ ގިނަ ޢިމާރާތްތައް މިހާރު އޮތީ ސުންނާފަތިވެފައެވެ.
އެ ރަށް ހިފުމަކީ، ރަޝިޔާގެ ސިފައިންނަށް ލިބޭނެ ވަރަށް މުހިންމު ކާމިޔާބީއެއްގެ ގޮތުގައި މަސްރަޙު ދިރާސާކުރާ ފަރާތްތަކުން ދެކެއެވެ. ސަބަބަކީ، ބަޚްމުތް ހިފުމުން، އެ ރަށް ހިމެނޭ ދޮންބާސް ސަރަޙައްދުގެ އެހެން ރަށްތަކާއި އަވަށްތައް ހިފުމަށް ރަޝިޔާ ސިފައިންނަށް މަގުފަހިވެގެންދާނެތީއެވެ. ދޮންބާސް މިހާރު ވެސް އޮތީ ރަޝިޔާގެ ކޮންޓްރޯލްގެ ދަށުގައި ކަމަށް އެ ޤައުމުން ބުނި ނަމަވެސް، ބައެއް ރަށްތަކުގައި އަދިވެސް ޔޫކްރެއިން ސިފައިން ދަނީ ހަނގުރާމަ ކުރަމުންނެވެ.
ބަޚްމުތް ދިފާޢު ކުރުމަށް ކުރަމުންދާ ހަނގުރާމަ ވަރަށް ނުރައްކާތެރި ކަމުގައި ޔޫކްރެއިނުން އެއްބަސްވެއެވެ. ނަމަވެސް، އެ ރަށް ރަޝިޔާ ސިފައިންގެ އަތްދަށަށް ވެއްޓިފައިވާ ކަން ޔޫކްރެއިނުން އަދި ކަށަވަރުކޮށްދީފައެއް ނުވެއެވެ. ޔޫކްރެއިނުގެ ނޭޝަނަލް ގާޑްގެ ކޮމާންޑަރުގެ ނައިބު ވޮލޮޑިމީރް ނަޒެރެންކޯ ވިދާޅުވީ ޔޫކްރެއިނުގެ ސިފައިން ބަޚްމުތުގައި އަދިވެސް ހަރަކާތްތެރިވަމުންދާ ކަމުގައެވެ.
ބަޚްމުތް ވަށައިލާފައިވާ ކަމަށް ވެގްނާ ގުރޫޕުން ބުނެފައި މި ވަނީ، ޔޫކްރެއިންގެ ދިފާޢުގައި ހަނގުރާމަކުރަމުންދާ ސިފައިންނަށް ފޯރުކޮށްދެމުންދާ އަސްކަރީ އެހީތެރިކަން އިތުރުކުރުމާ ގުޅޭ ގޮތުން މަޝްވަރާ ކުރުމަށް ޖަރުމަނުވިލާތުގެ ޗާންސެލަރ އޯލާފް ޝޮލްޓްޒް އެމެރިކާއަށް ދަތުރުފުޅެއް ކުރައްވަމުން ގެންދަވާ ދަނޑިވަޅެއްގައެވެ.
ޖަރުމަނުވިލާތުން އުފައްދާ "ލެޕަޑް" މަރުކާގެ އަސްކަރީ ޓޭންކު ޔޫކްރެއިނަށް ފޮނުވަން އެ ޤައުމުން މަސައްކަތް ކުރަމުންދާއިރު، އެމެރިކާގެ ރައީސް ޖޯ ބައިޑަން ވެސް ވަނީ އޭނާގެ ޤައުމުގައި އުފައްދާ "އެބްރާމްސް" މަރުކާގެ އަސްކަރީ ޓޭންކު ޔޫކްރެއިން ސިފައިންނަށް ފޯރުކޮށްދޭން މަސައްކަތް ކުރަމުންނެވެ. ހަނގުރާމަ ފެށި ފަހުން އެމެރިކާއިން ޔޫކްރެއިނަށް 32 ބިލިޔަން ޑޮލަރުގެ ހަތިޔާރާއި އަސްކަރީ ސާމާނު ވަނީ ފޯރުކޮށްދީފައެވެ.