އިސްރާޢީލުން ވެރިވެގަނެފައިވާ ފަލަސްޠީނުގެ ބިންތަކުގައި ޔަހޫދީ ޢާންމުން ހިންގަމުންދާ ޓެރެރިޒަމްގެ ޢަމަލުތައް އިތުރުވުމުގެ ސަބަބުން ފަލަސްޠީނުގެ ޢާންމުން ނިކުމެ، ރަށްތަކުގައި ފޯރިމަރަން ފަށައިފިއެވެ. ޔަހޫދީން ފަލަސްޠީނުގެ ޢާންމުންނާ ދެކޮޅަށް ހިންގަމުންދާ ޓެރެރިޒަމްގެ ޢަމަލުތައް ފަހަކަށް އައިސް ވަނީ އިތުރުކޮށްފައެވެ. ހުޅަނގު އައްސޭރީގެ ހުއްވާރާގައި ދާދިފަހުން ދިން ހަމަލާތަކެއްގައި ޔަހޫދީން ވަނީ ފަލަސްޠީނުގެ ގެދޮރާއި އުޅަނދުފަހަރުގައި ހުޅުޖަހައި، މުދަލަށް ގެންލުންދީފައެވެ.
ފަލަސްޠީނުގެ ޢާންމުން ބުނީ، އެ ފަދަ ހަމަލާތައް ހުއްޓުވުމުގެ ގޮތުން ރޭގަނޑުގެ ވަގުތުތަކުގައި ރަށްތަކުގައި ފޯރިމެރުން އިތުރުކޮށްފައިވާ ކަމުގައެވެ. ޒިންމާއަކީ ޔަހޫދީ ސިފައިން ރަށްތަކަށް އަރަންއުޅޭ ކަމުގެ އިންޒާރު ޢާންމުންނަށް ދިނުމާއި، ޓެރެރިސްޓު ހަމަލާތައް ދިނުމަށް މަސައްކަތް ކުރާ ޔަހޫދީންގެ ޢާންމުން ހުއްޓުވުން ކަމުގައި ފޯރިމެރުމުގައި ބައިވެރިވާ ފަލަސްޠީނުގެ ޒުވާނުން ބުނެއެވެ.
"އަހަރުމެން އެއްވެސް ހަތިޔާރެއް ނުގެންގުޅެން. އަދި، އެއްވެސް ބަޔަކަށް ހަމަލާދޭކަށް ވެސް ނޫޅެން. އަހަރުމެން މިއުޅެނީ އަހަރުމެންގެ މުދަލާއި ގެދޮރު ހިމާޔަތްކުރަން. އަހަރުމެންގެ ޤައުމު ދިފާޢުކުރަން،" ފޯރިމެރުމުގައި ހަރަކާތްތެރިވާ ޓީމުގެ މެންބަރެއް ބުންޏެވެ.
ހުއްވާރާގައި ފަލަސްޠީނުގެ ރައްޔިތުންގެ މުދަލަށް ގެއްލުންދިނުމަށް ހިންގި ޓެރެރިޒަމްގެ އަމަލުތަކުގައި ޔަހޫދީންގެ 400 އެއްހާ މީހުން ބައިވެރިވިއެވެ. ނަމަވެސް، އެ މީހުން ހުއްޓުވަން ޔަހޫދީ ޖައްބާރު އަސްކަރިއްޔާގެ ސިފައިން މަސައްކަތްކޮށްފައެއް ނުވެއެވެ. އަދި، ޔަހޫދީ ސިފައިން ވެސް ވަނީ ފަލަސްޠީނު ރައްޔިތުންނަށް ހަމަލާދީފައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، އިސްރާޢީލުގެ އަސްކަރިއްޔާއިން ދިން ބަޑީގެ ހަމަލާތަކުގައި ފަލަސްޠީނުގެ އުމުރުން 37 އަހަރުގެ ސާމިހު އަޤްތާޝް ޝަހީދުކޮށްލާފައިވާ ކަމުގައެވެ. އޭނާ ޝަހީދުކޮށްލާފައި ވަނީ ޒާތަރާގައި ދިން ހަމަލާތަކެއްގައެވެ. އަދި، ޔަހޫދީން ހިންގަމުންދާ ޓެރެރިޒަމްގެ އަމަލުތައް ހުއްޓުވައިދިނުމަށް ގޮވައިލާ ފަލަސްޠީނުގެ ރައްޔިތުން ބޭއްވި ހިނގައިލުމަކަށް ވެސް ޔަހޫދީ އަސްކަރިއްޔާގެ ސިފައިން ހަމަލާދީފައިވާ ކަމުގައެވެ.
އިސްރާޢީލުގެ ދިފާޢީ ވަޒީރު ޔައޯވް ގަލަންޓް ވަނީ ޔަހޫދީންގެ ޢާންމުން ދިން ހަމަލާތައް ކުށްވެރިކޮށްފައެވެ. އަދި، ޤާނޫނު ތަންފީޒުކުރުމުގެ ބާރު ޢާންމު ރައްޔިތުންގެ އަތްމައްޗަށް ދޫކޮށްލައިގެން ބަލަން ނުތިބެވޭނެ ކަމުގައި އޭނާ ވަނީ ވިދާޅުވެފައެވެ. ނަމަވެސް، އިސްރާޢީލުގެ ޤައުމީ ސަލާމަތާ ބެހޭ ވަޒީރު ކަމުގެ މަޤާމު ފުރާ ޖައްބާރު އިތަމާރް ބެން-ގުވީރަކީ މި ފަދަ ހަމަލާތަކަށް ހިތްވަރުދޭ މީހެކެވެ.
ހުޅަނގު އައްސޭރީގެ އަވަށެއް ކަމުގައިވާ ތުރްމުސްޢައްޔާގައި ވެސް ޔަހޫދީންގެ ޢާންމުން ވަނީ ޓެރެރިސްޓު ހަމަލާތަކެއްދީ، ފަލަސްޠީނުގެ ޢާންމުންގެ ގެދޮރާއި މުދަލަށް ގެއްލުންދީފައެވެ. ޖަނަވަރީ މަހުގައި ދިން އެ ހަމަލާގައި ފަލަސްޠީނުގެ ރައްޔިތުންތަކެއް ދިރިއުޅޭ ގެއެއްގައި ހުޅުޖަހައި، ކާރެއްގައި ވެސް ރޯކޮށްލާފައިވެއެވެ.
ހުޅަނގު އައްސޭރީގައި ފަލަސްޠީނުގެ 2.9 މިލިޔަން މީހުންގެ ދިރިއުޅެއެވެ. ޔަހޫދީ އިސްރާޢީލުން ވަނީ ހުޅަނގު އައްސޭރީގައި 475,000 ޔަހޫދީން ވަޒަންވެރިކުރުވާފައެވެ. އަދި، އިތުރު ސަރަޙައްދުތަކުގައި ޔަހޫދީން ވަޒަންވެރިކުރުވަން އިސްރާޢީލުގެ ސަރުކާރުން ދަނީ މަސައްކަތް ކުރަމުންނެވެ. އެ ކަމަށް ބައިނަލްއަޤުވާމީ މުޖުތަމަޢުގެ ނުރުހުމާއި ފާޑުކިޔުންތައް ވަނީ އަމާޒުވެފައެވެ. މި ކަމާ ނުރުހުންވާ ޤައުމުތަކުގެ ތެރޭގައި އެމެރިކާ ވެސް ހިމެނެއެވެ.
ޔަހޫދީ ޖައްބާރު ސިފައިން މި އަހަރުގެ ތެރޭގައި ހިންގާފައިވާ އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 63 އަށްވުރެ އިތުރުވެފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. އުމުރުން ދުވަސްވީ އަންހެނެއް ވެސް ވަނީ ޝަހީދުކޮށްލާފައެވެ.