ބަންގްލަދޭޝްގައި ދިރިއުޅޭ ރޮހިންޔާ މުސްލިމުންނަށް ބަނޑުފުރާނަ މުއްތިކުރެވޭނެ ވަރަށް ކާބޯތަކެތީގެ އެހީ ފޯރުކޮށްދޭން ބޭނުން މިންވަރަކަށް ބަޖެޓު ލިބިފައި ނުވާ ކަމަށް އ.ދ.ގެ އިދާރާ ދުނިޔޭގެ ކާބޯތަކެއްޗާ ބެހޭ ޕުރޮގުރާމު (ޑަބްލިޔު.އެފް.ޕީ)އިން ބުނެފިއެވެ. ބަންގްލަދޭޝްގައި މިލިޔަނަކަށް ވުރެ ގިނަ ރޮހިންޔާ ރެފިޔުޖީން ދިރިއުޅެއެވެ.
ރޮހިންޔާ މުސްލިމުންނަށް އިންސާނީ އެހީތެރިކަން ފޯރުކޮށްދިނުމަށް ބޭނުންވާ މިންވަރަށް އެހީގެ ފައިސާ ލިބިފައި ނުވާ ކަމަށް ޑަބްލިޔު.އެފް.ޕީ.އިން ބުނެއެވެ. އަދި، އެހީދޭ ޤައުމުތަކުން ދިނުމަށް ވަޢުދުވެފައިވާ 125 މިލިޔަން ޑޮލަރުގެ އެހީ ލިބިފައި ނުވާ ކަމަށާއި، އެ ސަބަބަށް ޓަކައި، ރޮހިންޔާ މުސްލިމުންނަށް ކާބޯތަކެތި ފޯރުކޮށްދިނުމަށް ހުރަސްތަކެއް ކުރިމަތިވެފައިވާ ކަމުގައި ވެސް އެ އިދާރާއިން ބުންޏެވެ.
އަދި، މަހެއްގެ މައްޗަށް ބޮލަކަށް 12 ޑޮލަރުގެ މަގުން ފޯރުކޮށްދެމުން ދިޔަ "ފުޑް ވައުޗަރ"ގެ އަގު 10 ޑޮލަރަށް ދަށްކުރަން ޖެހިފައިވާ ކަމަށާއި، ކުރިއަށް އޮތް ތަނުގައި އިތުރު އެހީ ނުލިބިއްޖެ ނަމަ، ކާބޯތަކެތީގެ އެހީ ފޯރުކޮށްދިނުމުގެ މަސައްކަތަށް ހުރަސްއެޅި ރޮހިންޔާ މުސްލިމުން ބަނޑަށް ޖެހުމުގެ ބިރު ބޮޑުވެފައިވާ ކަމުގައި ވެސް އިދާރާއިން އިންޒާރު ކުރެއެވެ.
ރޮހިންޔާ މުސްލިމުންގެ ތެރެއިން އެތަކެއް ހާސް ބަޔަކު ބަންގްލަދޭޝަށް ހިޖުރަކޮށްފައި ވަނީ މިޔަންމާ ސަރުކާރުން އެ ދަރިކޮޅުގެ މީހުންނާ ދެކޮޅަށް ހިންގަމުންދާ އިންސާނިއްޔަތާ ޚިލާފު ޖަރީމާތަކުން ސަލާމަތްވުމަށެވެ. 2017 ވަނަ އަހަރު އެކަނިވެސް 750,000 އަށްވުރެ ގިނަ ރޮހިންޔާ މުސްލިމުން ބަންގްލަދޭޝަށް ހިޖުރަކޮށްފައިވެއެވެ. އެ މީހުން ދިރިއުޅެމުން ދަނީ، ފުރިބާރުވެފައިވާ ރެފިޔުޖީ ކޭމްޕުތަކުގައެވެ.
ކޭމްޕުތަކުގައި ދިރިއުޅޭ ރޮހިންޔާ ރެފިޔުޖީންގެ ޢަދަދު މިހާރު މިލިޔަނަކަށް ވުރެ އިތުރެވެ. އެ މީހުންނަށް އިންސާނީ އެހީތެރިކަން ފޯރުކޮށްދިނުމަށް ބަންގްލަދޭޝްގެ ސަރުކާރުން ނުކުޅެދިފައިވާއިރު، އެ މީހުންގެ އަމިއްލަ ވަޒަނަށް އެނބުރި ދެވޭނެ ކަމުގެ އުންމީދު ވަނީ ފަނޑުވެފައެވެ.
އެ މީހުންނަށް ކާބޯތަކެތީގެ އެހީތެރިކަން ފޯރުކޮށްދިނުމަށް ބޭނުންވާ ބަޖެޓަށް ފައިސާ ނުލިބި، ބަޖެޓު ކުޑަކުރުމުގެ ސަބަބުން އެ މީހުންގެ ފުރާނައަށް ނުރައްކާވެފައިވާ ކަމުގައި މިޔަންމާގެ އިންސާނީ ހައްޤުތަކާ ބެހޭ މައްސަލަ ބައްލަވާ އ.ދ.ގެ ސްޕެޝަލް ރެޕެޓުއަރ ޓޮމް އެންޑްރޫސް ވިދާޅުވިއެވެ. އަދި، މި ކަމަށް ބައިނަލްއަޤުވާމީ މުޖުތަމަޢުގެ ސަމާލުކަން ބޭނުންވާ ކަމުގައި އޭނާ ވިދާޅުވިއެވެ.
"ބަންގްލަދޭޝްގައި ހާލުގައި ޖެހިފައިވާ ރޮހިންޔާ މުސްލިމުންނަށް ބޭނުންވާ މިންވަރަށް ކާބޯތަކެތީ ފޯރުކޮށްނުދެވުމަކީ އ.ދ.ގެ ވަރަށް ބޮޑު ފޭލުވުމެއް،" ރޮހިންޔާ މުސްލިމުންގެ ހައްޤުތަކުގެ ދިފާޢުގައި ވަކާލާތުކުރާ މަދަނީ ޖަމުޢިއްޔާއެއް ކަމުގައިވާ އަރަކަން ރޮހިންޔާ ނޭޝަނަލް ޔޫނިއަންއިން ބުންޏެވެ.
އަދި، މި ކަމުގެ ސަބަބުން ރޮހިންޔާ މުސްލިމުންގެ ހާލަތު ދެރަވެ، ކުޑަކުދިން ލައްވާ މަސައްކަތްކުރުވުމާއި، އިންސާނީ ވަގުފާރިއާއި، ހަށިވިއްކުމާއި މަސްތުވާތަކެތީގެ ވިޔަފާރި ފަދަ ނުރައްކާތެރި ކުށްތަކަށް މަގުފަހިވުމުގެ ފުރުޞަތު ބޮޑުވެފައިވާ ކަމުގައި ވެސް އެ ޖަމުޢިއްޔާއިން ބުންޏެވެ.
ބަންގްލަދޭޝްގައި ދިރިއުޅެން ޖެހިފައިވާ ދަތި ހާލުން ސަލާމަތްވުމަށް ގިނަ ޢަދަދެއްގެ ރޮހިންޔާ މުސްލިމުން ދަނީ މެލޭޝިޔާއާއި އިންޑޮނީޝިޔާއަށް ހިޖުރަކުރަން ވެސް މަސައްކަތް ކުރަމުންނެވެ. އެ ދަތުރު ކުރުމަށް އެ މީހުން ބޭނުންކުރަނީ، ބައުވެފައިވާ ލަކުޑި ބޯޓުފަހަރެވެ. އެ ދަތުރުމަތީގައި ގިނަ ޢަދަދެއްގެ ބަޔަކު ވަނީ ކަނޑުވެ، މަރުވެފައެވެ.
ހުސްވި 2022 ވަނަ އަހަރުގެ ނޮވެންބަރާއި ޑިސެންބަރު މަހުގެ ތެރޭގައި މި ފަދަ ފަސް ބޯޓެއް އިންޑޮނީޝިޔާއަށް ދަތުރުކޮށްފައިވާއިރު، އޭގައި 700 އަށްވުރެ ގިނަ ރޮހިންޔާ މުސްލިމުން އެ ޤައުމަށް ހިޖުރަކޮށްފައިވެއެވެ. ނަމަވެސް، މިއީ އެ އަހަރުގެ ތެރޭގައި މި ދަތުރު ފެށި 2,000 އަށްވުރެ ގިނަ މީހުންގެ ތެރެއިން މަދު ޢަދަދެކެވެ.
2021 ވަނަ އަހަރު ވެސް 2,000 އަށްވުރެ ގިނަ ރޮހިންޔާ މުސްލިމުން އިންޑޮނީޝިޔާއަށް ދަތުރުކުރަން މަސައްކަތް ކޮށްފައިވާ ކަމުގައި އ.ދ.އިން ބުނެއެވެ. އަދި، އޭގެ ތެރެއިން 200 އަށްވުރެ ގިނަ މީހުން ވަނީ ކަނޑުމަތީގައި މަރުވެފައެވެ.