ޕްރިންސް ހެރީއާއި އަނބިކަނބަލުން މެގަން މާކެލް އިނގިރޭސިވިލާތުގައި ދިރިއުޅުއްވާ ގެކޮޅު ކަމުގައިވާ ފްރޮގްމޯ ކޮޓެޑު ހުސްކުރަން އަންގައިފިއެވެ. މީޑިޔާއާ މި މަޢުލޫމާތު ހިއްސާކޮށްފައި ވަނީ އެ ދެ ބޭފުޅުންގެ ތަރުޖަމާނެކެވެ. ފްރޮގްމޯ ކޮޓެޖަކީ، ވިންޑްސަރ ގަނޑުވަރުކޮޅުގެ ގޯތިތެރޭގައި ހުންނަ ގެކޮޅެކެވެ.
2018 ވަނަ އަހަރު ކައިވެނި ބައްލަވައިގަތުމަށް ފަހު، ޕްރިންސް ހެރީއާއި މެގަން ދިރިއުޅުއްވަމުން ގެންދަވާފައި ވަނީ ފްރޮގްމޯ ކޮޓެޖުގައެވެ. ނަމަވެސް، 2020 ވަނަ އަހަރު ޝާހީ ޢާއިލާގެ ޒިންމާތަކުން ވަކިވެވަޑައިގެންނެވުމަށްފަހު، ޕްރިންސް ހެރީ ވަނީ އެމެރިކާގެ ކެލިފޯނިޔާ ސްޓޭޓަށް ދިރިއުޅުން ބަދަލުކުރައްވާފައެވެ. ނަމަވެސް، އިނގިރޭސިވިލާތަށް ކުރައްވާފައިވާ މަދު ޒިޔާރަތްތަކުގައި ހުންނަވާފައި ވަނީ ފްރޮގްމޯ ކޮޓެޖުގައެވެ.
އެ ތަން ހުސްކުރުމަށް ޕްރިންސް ހެރީއަށް އެންގެވުމަށް ނިންމަވާފައި ވަނީ ރަސްގެފާނު ޗާލްސް ތިންވަނަ ކަމުގައި މީޑިޔާ ރިޕޯޓުތައް ބުނެއެވެ. ޕްރިންސް ހެރީއާއި މެގަން ނެޓްފްލިކްސްއަށް ދެއްވި ބަސްދީގަތުމެއްގެ މައްޗަށް ބިނާކޮށް ތައްޔާރުކޮށްފައިވާ ޑޮކިޔުމެންޓްރީއެއްގައި ހާމަކޮށްފައިވާ މަޢުލޫމާތުތަކާ ގުޅިގެން ޕްރިންސް ހެރީއާއި ޝާހީ ޢާއިލާއާ ދެމެދު ވަނީ ނުތަނަވަސްކަން އުފެދިފައެވެ. އެއަށްފަހު، ޕްރިންސް ހެރީ ވަނީ "ސްޕެއާ"ގެ ނަމުގައި ފޮތެއް ޝާޢިއުކުރައްވާ، ޝާހީ ޢާއިލާއަށް ވަރަށް ބޮޑަށް ފާޑުވިދާޅުވެފައެވެ.
ރަސްގެފާނު ޗާލްސްގެ ކޮއްކޯފުޅު ޕްރިންސް އެންޑްރޫއަށް ފްރޮގްމޯ ކޮޓެޖު ދެއްވާފައިވާ ކަމަށް އިނގިރޭސި މީޑިޔާތަކުން ވަނީ ރިޕޯޓުކޮށްފައެވެ. ނަމަވެސް، އެ ތަން ހުސްކުރުމަށް ޕްރިންސް ހެރީއަށް އެންގެވިކަން ވެސް، އަދި އެ ތަން ޕްރިންސް އެންޑްރޫއަށް ހުށަހެޅުއްވި ކަން ވެސް، އިނގިރޭސިވިލާތުގެ ޝާހީ ޢާއިލާއިން ކަށަވަރުކޮށްދީފައެއް ނުވެއެވެ. ބުނެފައި ވަނީ އެއީ ޝާހީ ޢާއިލާގެ ޒާތީ މަޢުލޫމާތެއް ކަމުގައެވެ.
ޕްރިންސް ހެރީއާއި މެގަން އެންމެ ފަހުން ފްރޮގްމޯ ކޮޓެޖު ބޭނުންފުޅު ކުރައްވާފައި ވަނީ، އިނގިރޭސި ރާނީ އެލިޒަބަތުގެ ޕްލެޓިނަމް ޖުބިލީ ފާހަގަކުރެއްވުމަށް އިނގިރޭސިވިލާތަށް ކުރެއްވި ޒިޔާރަތުގައެވެ. ނަމަވެސް، އެ ދެ ބޭފުޅުންނާއި ޝާހީ ޢާއިލާއާ ދެމެދު މިހާރު އުފެދިފައިވާ ނުތަނަވަސްކަމާ ގުޅިގެން، ރަސްގެފާނު ޗާލްސްގެ ކޮރޮނޭޝަން ރަސްމިއްޔާތަށް ދެ ބޭފުޅުން ވަޑައިގަންނަވާނެ ކަމާ މެދު ވެސް ވަނީ ސުވާލު އުފެދިފައެވެ.