ވިއެޓްނާމްގެ އައު ރައީސްގެ މަޤާމަށް ވޯ ވަން ތުއޮންގް އިންތިޚާބުކޮށްފިއެވެ. ވިއެޓްނާމްގެ އައު ރައީސަކު އިންތިޚާބުކުރުމަށް އެ ޤައުމުގެ ޤާނޫނު ހަދާ މަޖިލީހުގައި ނެގި ވޯޓުގައި، އެ މަޤާމަށް ކުރިމަތިލެއްވި ހަމައެކަނި ބޭފުޅަކީ 52 އަހަރުގެ ވަން ތުވޮންގެވެ. އައު ރައީސް ވަން ތުއޮންގްގެ ރިޔާސީ ދައުރު ހަމަވާނީ 2026 ވަނަ އަހަރުއެވެ.
ވިއެޓްނާމުން އައު ރައީސަކު އިންތިޚާބުކޮށްފައި މި ވަނީ، އެ މަޤާމު ފުރުއްވަމުން ގެންދެވި ކުރީގެ ރައީސް ންޔޫން ޝުއާން ފުކް އިސްތިޢުފާ ދެއްވުމާ ގުޅިގެންނެވެ. ޝުއާން ފުކް އިސްތިޢުފާ ދެއްވާފައި ވަނީ، ކޮރަޕްޝަނާ ގުޅޭ ތުހުމަތުތަކެއް ފެންމަތިވުމާ ގުޅިގެންނެވެ. އޭނާއާއި، އޭނާގެ ބައެއް ވަޒީރުންނާއި ސަރުކާރުގެ އިސް އޮފިޝަލުން ކޮރަޕްޝަންގެ އަމަލުތަކުގައި ބައިވެރިވެފައިވާ ކަމަށް ތުހުމަތު ކުރެވެއެވެ.
ރައީސްކަމުގެ މަޤާމުގެ ހުވާ ކުރެއްވުމަށް ފަހު ވަން ތުއޮންގް ވަނީ، ކޮރަޕްޝަނާ ދެކޮޅަށް ގިނަގުނަ މަސައްކަތްތަކެއް ކުރައްވަން ވަޢުދުވެ ވަޑައިގަންނަވަފާއެވެ. ކޮރަޕްޝަން ހުއްޓުވުމަށް ވަރުގަދަ ކެމްޕޭނެއް ފެށުމަށް އިސްނަގާފައި ވަނީ ވިއެޓްނާމުގެ ވެރިކަން ކުރާ ކޮމިޔުނިސްޓު ޕާޓީންނެވެ. މި ކެމްޕޭނުގެ ދަށުން، ވަޒީރުކަން ކުރައްވާފައިވާ ބައެއް ބޭފުޅުން ވެސް ކޮރަޕްޝަނުގެ ތުހުމަތާ އެކު، އެ މަޤާމުތަކުން ވަކިކޮށްފައިވެއެވެ.
ޝުއާން ފުކްގެ ބަދަލުގައި ރައީސްކަމުގެ މަޤާމާ ހަވާލުވެ ވަޑައިގެންނެވި ވަން ތުއޮންގަކީ ކޮމިޔުނިސްޓު ޕާޓީގެ ސެކްރެޓަރީ ޖެނެރަލް ންޔޫން ފޫ ޓްރޮންގްގެ ވަރަށް އަރިސް ބޭފުޅެކެވެ. އެއީ، ޕާޓީގެ އެންމެ ބާރުގަދަ އަދި އެންމެ ނުފޫޒު ގަދަ ވެރިޔާއެވެ. އެ ޕާޓީން ހިންގަމުންދާ ކޮރަޕްޝަން ހުއްޓުވުމުގެ ކެމްޕޭންގެ ދަށުން، ކޮވިޑް-19ގެ ބަލިމަޑުކަމުގެ ތެރޭގައި ހިންގާފައިވާ ކޮރަޕްޝަންގެ ގިނަ މައްސަލަތަކެއްގައި ގިނަ ޢަދަދެއްގެ ވަޒީރުން ވަނީ މަޤާމުން ވަކިކޮށްފައެވެ.