ހުޅުމާލެއިން ސަރުކާރަށް 17 ބިމެއް ވިއްކީ އިޖްތިމާއީ ބޯހިޔާވަހިކަމުގެ މަޝްރޫއުތަކަށްކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ބުނެފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ދަށުގައި އޮންނަ ހުޅުމާލެއިން ސަރުކާރުން 17 ބިމެއް ވިއްކުމަށްފަހު ސިވިލް ކޯޓުގައި ވަނީ މިދިޔަ ހަފްތާގައި އެ މުއާމަލާތް ސައްހަކަމަށް ކަނޑައަޅާފައެވެ.
އެޗްޑީސީން 878 މިލިއަން ރުފިޔާއަށް ސަރުކާރަށް ވިއްކާފައިވަނީ 15،000 އަކަފޫޓާއި 66،000 އަކަފޫޓާ ދެމެދުގެ ބިންތަކެކެވެ.
އެޗްޑީސީން ބުނީ މިއީ އިޖްތިމާއީ ބޯހިޔާވަހިކަމަށް ސަރުކާރުން ކުރިއަށްގެންދާ 4،000 ހައުސިން ޔުނިޓުގެ މަޝްރޫއުއާ ގުޅިގެން ވެފައިވާ އެއްބަސްވުމެއްގެ ދަށުން ވިއްކި ބިންތަކެއްކަމަށެވެ. އަދޮ
އެޗްޑީސީން އިތުރަށް ބުނީ ހުޅުމާލޭގެ ދެ ވަނަ ފިޔަވަހި ހިއްކުމަށާއި އެހެނިހެން އުމްރާނީ ހަރަދުތައް ކޮށްފައިވަނީ އެ ކުންފުނިން ލޯނު ނަގައިގެން ކަމަށް ވުމާއެކު، އެކި ބޭނުމަށް ވިއްކާ ބިމަށް އަގު ކަނޑައެޅިފައިވާކަމަށެވެ. އަދި ސަރުކާރަށް ވިއްކި ބިންތަކަކީ ސޯޝަލް ހައުސިން އަށް ދޫކުރި ބިންތަކެއްކަމުން، ބިމުގެ އަގު ކަނޑައަޅާފައިވާނީ އާންމުންނަށް ހައުސިން ޔުނިޓުތައް ދޫކުރުމުގައި ލުއި އަގުތަކެއް ހަމަޖެއްސޭނެ ގޮތަށް ބަލައިގެންކަމަށް ވެސް އެޗްޑީސީން ބުނެއެވެ.
ސަރުކާރުން ގަނެފައިވާ ބިންތަކަށް ފައިސާ ދައްކާފައިވާތި ސިވިލް ކޯޓުން ވަނީ މި ހަފްތާގެ ތެރޭގައި އެ މުއާމަލާތް ސައްހަ ކަމަށް ނިންމައި، އެ ބިންތަކުގެ މިލްކުވެރިކަން ސަރުކާރަށް ލިބިފައިވާކަމަށް ކަނޑައަޅާފައެވެ.
މީގެކުރިންވެސް ދައުލަތުގެ ބޭނުންތަކަށް ސަރުކާރުން ވަނީ ހުޅުމާލެއިން ބިން ގަނެފައެވެ. އެގޮތުން ބޭރުގެ އެމްބަސީތައް ޤާއިމްކުރުމަށްވެސް ސަރުކާރުން ވަނީ ހުޅުމާލެއިން ބިން ގަނެފައެވެ.