ޔޫކްރެއިނުގެ އިރުމަތީގައިވާ ޑޮނެޓްސްކުގެ ރަށެއް ކަމުގައިވާ ބަޚްމުތް ހިފުމަށް ރަޝިޔާ ސިފައިން ކުރަމުންދާ މަސައްކަތުގެ ދަށުން އެ ރަށަށް ދެމުންދާ ހަމަލާތައް އިތުރަށް ވަރުގަދަކޮށްފިއެވެ. ޑޮނެޓްސްކަކީ ދޮންބާސްގެ މައި ދެ ސަރަޙައްދުގެ ތެރެއިން އެއް ސަރަޙައްދެވެ. އެ ރަށް ހިފުމަށް ރަޝިޔާ ސިފައިން މަސައްކަތް ކުރާތާ މިހާރު މަސްތަކެއް ފާއިތުވެއްޖެއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް ފޮނުވައިގެން ފެށި ހަނގުރާމައިގައި ރަޝިޔާ ސިފައިން ވަނީ ދޮންބާސްގައި ހިމެނޭ ޑޮނެޓްސްކާއި ލުހާންސްކްގެ ބޮޑު ސަރަޙައްދެއް އެ މީހުންގެ އަތްދަށަށް ގެންގޮސްފައެވެ. ނަމަވެސް، ހުރިހާ ރަށްތަކެއްގެ ކޮންޓްރޯލް އަދި ހޯދިފައެއް ނުވެއެވެ. މީގެ ބަޚްމުތްއަކީ ޔޫކްރެއިނު ސިފައިން އަދިވެސް ދިފާޢު ކުރަމުންދާ އެއް ރަށެވެ.
ހަނގުރާމަ ފެށުމުގެ ކުރިން ބަޚްމުތަކީ 70,000 އެއްހާ މީހުންގެ އާބާދީއެއް އޮތް، ސިނާޢީ މަސައްކަތްތައް ކުރާ ރަށެކެވެ. އެ ރަށް، ރަޝިޔާ ސިފައިންގެ އަތްދަށުވެއްޖެ ނަމަ، ޑޮނެޓްސްކުގެ އިތުރު ރަށްތައް ހިފުމަށް ރަޝިޔާ ސިފައިންނަށް ފަސޭހަވެގެންދާނެ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
ބަޚްމުތް ހިފުމަށް ކުރަމުންދާ މަސައްކަތުގެ ދަށުން ރަޝިޔާގެ ސިފައިންގެ އިތުރު ލަޝްކަރުތަކެއް އެ ސަރަޙައްދަށް ފޮނުވާފައިވާ ކަމުގައި ޔޫކްރެއިނުން ބުނެއެވެ. އަދި، އޭގެ ތެރެއިން ބައެއް ސަރަޙައްދުތަކަށް ޔޫކްރެއިނުގެ ވައިގެ ސިފައިންގެ ވަރުގަދަ ހަމަލާތަކެއް ދީފައިވާނެ ކަމަށް ވެސް އެ ޤައުމުގެ ދިފާޢީ ވުޒާރާއިން ބުނެއެވެ.
"ހަނގުރާމައިގައި ޔޫކްރެއިނު ސިފައިންގެ ކުރިމަތީގައި މިހާރު އެންމެ ބުރަބޮޑު އަދި ނުރައްކާތެރި ކަމަކީ ބަޚްމުތް ދިފާޢުކުރުން. އެ ރަށް ހިފުމަށް ރަޝިޔާއިން ދަނީ އެއެއްމިޔެއް ބެލުމެއްނެތި ސިފައިންގެ ފައުޖުތައް ފޮނުވަމުން. އަދި، އެ ރަށަށް ދެމުންދާ ހަމަލާތައް އެތައް ގުނައަކަށް ވަނީ އިތުރުކޮށްފައި،" ޒެލެންސްކީ ވިދާޅުވިއެވެ.
ބަޚްމުތްގެ އިތުރުން އެހެން ސަރަޙައްދުތަކަށް ވެސް ރަޝިޔާއިން ދަނީ ވަރުގަދަ ހަމަލާތަކެއް ދެމުންނެވެ. ހަމަލާދީފައިވާ ބައެއް ރަށްތަކުގެ ތެރޭގައި ޝަރްނިހިވް، ސުމީ، އަދި ޚާރްކީވް ހިމެނެއެވެ. ބަޚްމުތް ވަށައިގެންވާ ސަރަޙައްދުތަކުގައި ރަޝިޔާގެ އަސްކަރީ މަތިންދާބޯޓުތައް ހަރަކާތްތެރިވަމުންދާ މަންޒަރު ފެންނަ ވީޑިޔޯތަކެއް ރަޝިޔާއިން ދިފާޢީ ވުޒާރާއިން ވެސް ވަނީ ޢާންމުކޮށްފައެވެ.
ނަމަވެސް، ކައިރި މުސްތަޤުބަލެއްގައި ޔޫކްރެއިނުގެ ބޮޑު ސަރަޙައްދުތަކެއް ހިފުމުގެ ގާބިލުކަން ރަޝިޔާ ސިފައިންގެ ކިބައިގައި ނެތް ކަމުގައި އެމެރިކާގެ ދިފާޢީ ވުޒާރާގެ އިސް އޮފިޝަލެއް ކަމުގައިވާ ކޮލިން ކާލް ވިދާޅުވިއެވެ. އެ ކަން ކާމިޔާބުވިޔަ ނުދިނުމަށް އެމެރިކާއިން ވަނީ ޔޫކްރެއިނަށް 32 ބިލިޔަން އެމެރިކާ ޑޮލަރުގެ އަސްކަރީ ހަތިޔާރާއި ސާމާނު ފޯރުކޮށްދީފައެވެ.
މީގެ ތެރޭގައި ޑްރޯންއާއި، ދުރުރާސްތާގެ އާޓިލަރީ ބަޑިޔާއި، ވައިގެ ދިފާޢީ ނިޒާމުތައް ހިމެނޭއިރު، "ޕޭޓްރިއަޓް" މަރުކާގެ މިސައިލާއި، "އެމްބާމްސް" މަރުކާގެ އަސްކަރީ ޓޭންކު ފޮނުވަން ވެސް އެމެރިކާއިން ދަނީ ތައްޔާރުވަމުންނެވެ. އެމެރިކާގައި އުފައްދާ "އެފް-16" މަރުކާގެ އަސްކަރީ މަތިންދާބޯޓު ހޯދަން ވެސް ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ގެންދަވަނީ މަސައްކަތް ކުރައްވަމުންނެވެ. ނަމަވެސް، އެމެރިކާއިން އެ ކަމަށް އަދި މިހާތަނަށް އާނބަސް ބުނެފައެއް ނުވެއެވެ.