ޔޫކްރެއިނަށް ސިފައިން ފޮނުވައިގެން ރަޝިޔާއިން ފަށާފައިވާ ހަނގުރާމަ ނިމުމަކަށް ގެނައުމާ މެދު މަޝްވަރާކުރަން ތައްޔާރަށް އޮތް ނަމަވެސް، ރަޝިޔާއިން އަތްގަދަކޮށްފައިވާ ސަރަޙައްދުތައް މިނިވަންކުރަން އެއްބަސްނުވެވޭނެ ކަމުގައި ރަޝިޔާގެ ރިޔާސީ ގަނޑުވަރު ކްރެމްލިންއިން ބުނެފިއެވެ. ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ ހުސްވި 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ.
ހަނގުރާމައިގެ ތެރޭގައި ރަޝިޔާ ސިފައިން ވަނީ ޔޫކްރެއިނުގެ ހަތަރު ސަރަޙައްދަކަށް އަތްގަދަކޮށްފައެވެ. އަދި، 2022 ވަނަ އަހަރުގެ ސެޕްޓެންބަރު މަހު އެ ސަރަޙައްދުތަކުގައި ފެންނަ ނުފެންނަ ވޯޓެއް ނަގައި، އެއީ ރަޝިޔާގެ ހަތަރު ސަރަޙައްދުގެ ގޮތުގައި އެ ޤައުމުން ވަނީ ކަނޑައަޅައި، އިޢުލާނު ކޮށްފައެވެ.
ރަޝިޔާއިން އަތްގަދަކޮށްފައިވާ ހަތަރު ސަރަޙައްދުގެ ތެރޭގައި ހިމެނެނީ ޔޫކްރެއިނުގެ އިރުމަތީގައިވާ ދޮންބާސްގައި ހިމެނޭ ލުހާންސްކާއި ޑޮނެޓްސްކްގެ އިތުރުން ދެކުނުގައިވާ ޒަޕޮރީޝިޔާއާއި ޚާރްސަންއެވެ. މީގެ ތެރެއިން ޚާރްސަންގައި ތިބި ސިފައިން ފަހަތަށް ޖެއްސުމަށް ފަހު، ޔޫކްރެއިނު ސިފައިން ވަނީ އެ ރަށް މިނިވަންކޮށްފައެވެ. ނަމަވެސް، އެއީ އަދިވެސް ރަޝިޔާގެ ބައެއްގެ ގޮތުގައި ކްރެމްލިންއިން ޤަބޫލުކުރެއެވެ.
ކްރެމްލިންގެ ތަރުޖަމާނު ޑިމިޓްރީ ޕެސްކޮފް ވިދާޅުވީ، ހަނގުރާމަ ހުއްޓައިލުމާ މެދު މަޝްވަރާކުރުމަށް އެ ޤައުމުން ތައްޔާރަށް އޮތް ނަމަވެސް، ރަޝިޔާއިން ހިފާފައިވާ ބިންތައް ދޫކޮށްލަން އެއްބަސް ނުވެނޭނެ ކަމުގައެވެ. "ކުރިމަތީގައި ފެންނަ އޮތް ހަޤީޤަތް އެންމެން ވެސް ޤަބޫލުކުރަން ޖެހޭނެ. އެ ސަރަޙައްދުތަކަކީ ރަޝިޔާގެ ތަންތަން. ރަޝިޔާގެ ޤާނޫނު އަސާސީއެއް އޮވޭ. އެ ސަރަޙައްދުތަކަކީ ރަޝިޔާގެ ޤާނޫނު އަސާސީގެ ބާރުހިނގާ ސަރަޙައްދުތަކެއް. އެ ހަޤީޤަތް ބަދަލެއް ނުކުރެވޭނެ،" ޕެސްކޮފް ވިދާޅުވިއެވެ.
އެ ހަތަރު ސަރަޙައްދަކީ ރަޝިޔާގެ ބައެއް ކަމުގައި ޔޫކްރެއިނުން ޤަބޫލުކޮށްފި ނަމަ، ހަނގުރާމަ ހުއްޓައިލުމާ ގުޅޭ ގޮތުން މަޝްވަރާ ކުރަން ތައްޔާރު ކަމުގައި އޭނާ ވިދާޅުވިއެވެ. އެ ހަތަރު ސަރަޙައްދަކީ ރަޝިޔާގެ ބައެއްގެ ގޮތުގައި ކްރެމްލިންއިން ޤަބޫލުކުރި ނަމަވެސް، އެ ސަރަޙައްދުތަކުގެ ފުރިހަމަ ކޮންޓްރޯލް ރަޝިޔާ ސިފައިންނަކަށް ނެތެވެ. އަދި، އެ ސަރަޙައްދުތައް މިނިވަންކުރަން ޔޫކްރެއިނުގެ ފައުޖުތަކުން ދަނީ ވަރުގަދައަށް ހަނގުރާމަ ކުރަމުންނެވެ.
ޔޫކްރެއިނުން ބުނީ، އެ ޤައުމަށް އަރާފައިވާ ރަޝިޔާގެ އިސްތިއުމާރީ ސިފައިން އެ ޤައުމުން ބޭލުމަށްފަހު މެނުވީ، ހަނގުރާމަ ހުއްޓައިނުލާނެ ކަމުގައެވެ. އަދި، މީގެ ތެރޭގައި، 2014 ވަނަ އަހަރު ރަޝިޔާއިން އަތްގަދަކޮށްފައިވާ ކްރައިމިޔާ ވެސް ހިމެނޭ ކަމުގައި ޔޫކްރެއިނުން ބުނެއެވެ.