ކްރިމިނަލް ކޯޓުގެ ހިންގުމަށް ހުޅުމާލޭގައި ހުންނަ ކުރީގެ ކޯވިޑް ފެސިލިޓީ ހިންގި އިމާރާތް ސަރުކާރުން ހަމަޖައްސަވައި ދެއްވައިފިއެވެ. ޑިޕާޓްމަންތް އޮފް ޖުޑީޝަލް އެޑްމިނިސްޓްރޭޝަނުން ވިދާޅުވީ ކްރިމިނަލް ކޯޓު އެއިމާރާތަށް ބަދަލުވުމަށް ކުރަންޖެހޭ މަސައްކަތްތައް ކުރިއަށްދާ ކަމަށެވެ.
ކްރިމިނަލްކޯޓް ހިންގަމުންދާ އިމާރާތަކީ ބޭނުންކުރަން ރައްކާތެރި ތަނަކަށް ނުވާތީ އެ އިމާރާތުގައި މަސައްކަތް ނުކުރުމަށް ޖުޑިޝަލް ސަރވިސް ކޮމިޝަން (ޖޭއެސްސީ)ން ވަނީ ނިންމަވާފައެވެ. އަދި ކްރިމިނަލް ކޯޓް ހިންގަމުންދާ އިމާރާތުގައި ހިމެނޭ ހަތަރުބުރީގެ ބައު އިމާރާތް ބޭނުންކުރުން ވަގުތީ ގޮތުން ހުއްޓާލާ ޝަރީއަތްތަކާއި، ކޯޓުގެ މަސައްކަތްތައް އޮންލައިންކޮށާއި، ވޯކް ފްރޮމް ހޯމް އުސޫލުގެ ދަށުންނާއި، ޝިފްޓް ޑިއުޓީ އުސޫލުން ކުރާ ގޮތަށްވެސް ވަނީ ނިންމަވާފައެވެ.
މިގޮތަށް ނިންމެވީ އެއިމާރާތް ބޭނުންކުރުމަކީ ފަނޑިޔާރުންނާއި މުވައްޒަފުންގެ ސަލާމަތާއި ރައްކާތެރިކަމަށް ބަލާއިރު ރައްކާތެރި ގޮތަކަށްނުވާތީ ކަމަށް ޖޭއެސްސީން ވިދާޅުވެފައިވެއެވެ.
ކްރިމިނަލް ކޯޓް ހިންގަމުންދާ އިމާރާތުގައި ހިމެނޭ ހަތަރުބުރީގެ ބައު އިމާރާތަކީ ވަރަށް ބޮޑަށް ބައުވެފައިވާ ތަނަކަށްވެ ވަރަށް ބޮޑަށް އެއިމާރާތް ހަލާކުވެފައިވާތީ ކަމާބެހޭ މާހިރުން ލައްވާ އިންސްޕެކްޝަނެއްވެސް ވަނީ ހައްދާފައެވެ. އަދި އެ އިންސްޕެކްޝަނަށްފަހު، އެއިމާރާތް އިތުރަށް ބޭނުންކުރުމަކީ އެއްވެސް މިންވަރަކަށް ރައްކާތެރި ކަމެއް ނޫންކަމަށް ކަމާބެހޭ ފަންނީ މާހިރުން އިރުޝާދު ދީފައިވާ ކަމަށް ޖޭއެސްސީންވަނީ ވިދާޅުވެފައެވެ.
ކޯޓުގެ ފަނޑިޔާރުންނާއި މުވައްޒަފުންނާއި ކޯޓަށް ޚިދުމަތް ހޯދަން އަންނަ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަކީ ޖޭއެސްސީންނާއި ޑިޕާޓްމަންޓް އޮފް ޖުޑީޝަލް އެޑް މިނިސްޓްރޭޝަނުން އެންމެ އިސްކަންދޭ އެއްކަންތައް ކަމަށް ޑީޖޭއޭއިން ހާމަކުރައްވައެވެ.