އިންސާނީ ޙައްގުތައް ކުރިއަރުވައި ދިފާއުކުރުމަށް ރާއްޖެއިށް ބައިނަލްއަޤްވާމީ މައިދާނުގައިވެސް މަސައްކަތް ކުރުމަށް އޮތީ ތައްޔާރަށް ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ. މިނިސްޓަރ މިހެން ވިދާޅުވީ އިންސާނީ ޙައްޤުތަކާ ބެހޭ މަޖިލީހުގެ 52ވަނަ ސެޝަންގެ ހައި-ލެވެލް ސެގްމަންޓުގައި ވާހަކަފުޅުދައްކަވަމުންނެވެ.
މިނިސްޓަރ ވިދާޅުވީ މިދިޔަ 4އަހަރުގެ ތެރޭގައި، ރާއްޖޭގައި އިންސާނީ ޙައްގުތައް ހިމާޔަތްކުރުމުގައި، ރަނގަޅު މިސްރާބަކަށް މަސައްކަތްތައް ކޮށްފައިވާކަމަށެވެ. ޚާއްސަކޮށް ޤާނޫނުތައް އިސްލާހުކޮށް، ޙައްގުތައް ކަށަވަރު ކުރެވޭގޮތަށް އިސްލާހުކުުރުމުގެ މުހިންމު މަސައްކަތްތަކެއް ކުރިއަށް ގެންގޮސްފައިވާކަމަށާއި، މި މަސައްކަތުގައި ޑިމޮކްރަސީގެ އުސޫލުތައް ދެމެހެއްޓުމުގައި ސިޔާސަތުތަކަށް ބޮޑެތި ބަދަލުތަކެއް ގެނެސްފައިވާކަން މިނިސްޓަރ ފާހަގަކުރެއްވިއެވެ.
މީގެތެރޭގައި ޝަރުޢީ ދާއިރާގައި ޖަވާބުދާރީވުން އިތުރުކުރުމަށާއި އެއްވެ އުޅުމާއި ޚިޔާލު ފާޅުކުރުމުގެ މިނިވަންކަން ކަށަވަރުކުރުމަށާއި، އިންސާފުވެރި ޝަރީޢަތެއް ހޯދުމުގެ ޙައްޤު ކަށަވަރުކުރުމަށްޓަކައި އައު ޤާނޫނުތަކެއް ހަދާފައިވާކަން މިނިސްޓަރ ފާހަގަކުރެއްވިއެވެ.
"ޤާނޫނުތަކަށް ގެނެވުނު ބަދަލުތަކުގެ ތެރޭގައި ހިއުމަން ރައިޓްސް ކޮމިޝަނުގެ މިނިވަންކަމާއި ޖަވާބުދާރީވުން އިތުރުކުރުމާއި، އިންތިޤާލީ އިންސާފު ފޯރުކޮށްދިނުމުގެ މަސައްކަތް ކުރުމާއި، ފުލުހުންގެ ޚިދުމަތް ހިންގުން ހަރުދަނާކުރުމަށްޓަކައި ފުލުހުންގެ ޤާނޫނަށް އިޞްލާޙު ގެނައުމާއި މުޅިން އައު މަދަނީ އިޖުރާޢަތުގެ ޤާނޫނެއް ތަޢާރަފުކުރުން ހިމެނޭ." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިންސާނީ ޙައްޤުތައް ކުރިއެރުވުމަށާއި ދިފާޢުކުރުމަށް ރާއްޖެއިން އޮތީ ފުރިހަމައަށް ތައްޔާރައް ކަމަށެވެ.
އަދި އަންހެނުންގެ ޙައްގުތައް ކަށަވަރުކުރުމާއި، މުޖުތަމަޢުގައި ހަމަހަމަކަން ޤާއިމުކުރުމުގައިވެސް ރާއްޖެއަކީ ކާމިޔާބު ޤައުމެއްކަމަށް މިނިސްޓަރ ވިދާޅުވިއެވެ. އެގޮތުން އެންމެ މުހިންމު ކަމެއްގެ ގޮތުގައި މިނިސްޓަރ ފާހަގަކުރެއްވީ، ޤައުމުގެ ކަންކަން ނިންމުމުގައި އަންހެނުންނަށް ފުރުޞަތު ދިނުމަށް ޤާނޫނަށް ގެނައި އިސްލާހެވެ. ލާމަރުކަޒީ ޤާނޫނަށް ގެނައި އިސްލާހުގައި ބުނާގޮތުން ކައުންސިލްތަކުގެ %33 ގޮނޑި އަންހެނުންނަށް ލިބެންޖެހެއެވެ.
މިނިސްޓަރ ޝާހިދު ވަނީ ގޮތް ނިންމުމުގައި ބައިނަލްއަޤްވާމީ މައިދާނުގައި ޒުވާނުންގެ ޚިޔާލާއި، ދަޢުރު އަދިވެސް އިތުރުކުރަންޖެހޭކަން ފާހަގަކުރައްވާފައެވެ.
މީގެ އިތުރުން މިނިސްޓަރުގެ ވާހަކަގައި އެންމެ ބޮޑަށް ފާހަގަކުރައްވާފައިވަނީ އެންމެ ކުޑަކޮށް ތަރައްޤީވެފައިވާ ޤައުމުތަކާއި ތަރައްޤީވަމުން އަންނަ ޤައުމުތަކަށް ދޭ އެހީތައް ފުޅާކުރުމެވެ. އެގޮތުން މޫސުމީ ބަދަލުތަކުގެ ގެއްލުން ކުދި ޤައުމުތަކަށް ބޮޑުކަމާއި، ނަމަވެސް މޫސުމަށް ގެއްލުންވާ ކަންކަމުގައި ކުދި ޤައުމުތަކުގެ ޙިއްސާ ކުޑަކަމަށް ވިދާޅުވިއެވެ.
އެހެން ކަމުން މިފަދަ ގެއްލުން ކުޑަކޮށް، ރައްކާތެރި ތިމާވެށީގެ މާޙައުލެއް ހޯދައިދިނުމަށް އެފަދަ ޤައުމުތަކަށް، ތަރައްޤީވެފައިވާ ޤައުމުތަކުން ދޭ އެހީ އިތުކުރަންޖެހޭކަން ފާހަގަކުރެއްވިއެވެ. މިސާލެއްގެ ގޮތުގައި މިނިސްޓަރ ވިދާޅުވީ ރާއްޖެއިން ޖައްވަށް ބޭރުކުރާ ވިހަ ގޭހުގެ މާއްދާގެ ނިސްބަތަކީ %0.01ކަމަށާއި، ނަމަވެސް މޫސުމީ ގެއްލުމުގެ އަސަރު އެންމެ ފުރަތަމަ ކުރަނީ ރާއްޖެ ފަދަ ކުދި ޤައުމުތަކަމަށެވެ.
މިނިސްޓަރ ވިދާޅުވީ ދިވެހި ރާއްޖެއިން ކައުންސިލްގެ މެމްބަރެއްގެ މަސައްކަތާ އަލުން ހަވާލުވަނީ ކައުންސިލަށް ބޭނުންވާ ތަފާތު ޚިޔާލުތަކާއި، ކައުންސިލްގައި ހުރިހާ ޤައުމުތަކެއްގެ ވެސް ހަމަހަމަ ބައިވެރިވުން ކަށަވަރުކުރުމުގެ ނިޔަތުގައިކަމަށެވެ.