ތ. ބުރުނީގައި އެކްސްކަވޭޓަރަކުން ރުއްތަކެއް ނެގުމުގެ މަސައްކަތް ކުރަނިކޮށް، ވެއްޓުނު ރުކަކުން ޖެހި މީހަކު މަރުވެ އިތުރު ތިން މީހަކަށް ބޮޑެތި އަނިޔާތަކެއް ވެއްޖެއެވެ.
އެ ހާދިސާ ހިނގާފައި ވަނީ ގެއެއްގެ ރުއްތަކެއް ނަގައި އެ ރުއްތައް އެއް ކައިރިއަކަށް ޖެއްސުމުގެ މަސައްކަތް ކުރަމުން ދަނިކޮށް ރުކެއް ކައްސާލައިގެންގޮސް އެމީހުންގެ ގައިގައި ޖެހިގެންނެވެ.
މިއަދު ހަވީރު 4:40 ހާއިރު ހިނގި ހާދިސާގައި އަނިޔާވި މީހުންނަށް ފަރުވާ ދިނުމަށް އެ ރަށު ސިއްހީ މަރުކަޒަށް ގެންދިޔައެވެ. ނަމަވެސް، އިތުރު ފަރުވާ ދިނުމަށް ވަނީ ދ. ކުޑަހުވަދޫގައި ހިންގާ އަތޮޅު ހޮސްޕިޓަލަށް ފޮނުވާލާފައެވެ.
މަޢުލޫމާތު ލިބިފައިވާ ގޮތުގައި މަރުވި މީހާ އާއި އަނިޔާވި 2 މީހުންނަކީ އިންޑިއާ މީހުންނެވެ. ދެން ހިމެނެނީ ބަންގްލަދޭޝް މީހެކެވެ. ޒަޚަމްވި 2 މީހުންގެ ހާލު ސީރިއަސް ކަމަށް މަޢުލޫމާތު ލިބެއެވެ. ނިޔާވި ހަށިގަނޑާއި އަނިޔާވި 3 މީހުން މާލެއަށް ފޮނުވާލުމުގެ މަސައްކަތް މިހާރު ކުރަމުން އަންނަ ކަމަށްވެސް މަޢުލޫމާތު ލިބެއެވެ.
މިހާދިސާއާއި ގުޅިގެން ފުލުހުން އިތުރަށް ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ވިދާޅުވެއެވެ.