ވީނުވީއެއް ނޭނގި ގެއްލުނު ބަންގްލަދޭޝަށް ނިސްބަތްވާ މުހައްމަދު ލިޓަންގެ މަރުގެ ތުހުމަތުގައި ހައްޔަރުކުރި ގދ. ތިނަދޫ މަނާރު، މުޙައްމަދު ނިޒާމްގެ މައްޗަށް ތިން ދަޢުވާއެއް އުފުލުމަށް މަސައްކަތްކުރައްވާކަމަށް ޕްރޮސެކިއުޓަރ ޖެނެރަލް އަލްއުސްތާޛް ޙުސައިން ޝަމީމް ވިދާޅުވެއްޖެއެވެ.
ލިޓަންއާއި ނިޒާމް ތެޔޮ ބޯޓެއްގައި ކަނޑުމައްޗަށް ނިކުމެ އުޅެނިކޮށް ޚަބަރެއް ނުވެގެން އެ މީހުން ހޯދަން ފެށީ ޑިސެމްބަރުމަހުގެ 28 ވަނަ ދުވަހުއެވެ. އަދި އެމީހުން ހޯދަމުންދަނިކޮށް އެމީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފައެވެ. އަދި ގެއްލުނުކަމަށް ބުނާ ނިޒާމް މާލެއިން ފެނިގެން ފުލުހުން އޭނާ ހައްޔަރުކުރީ ޖެނުއަރީމަހުގެ 3 ވަނަ ދުވަހުއެވެ. ފުލުހުން ނިޒާމް ހައްޔަރުކުރީ ލިޓަންގެ މަރުގެ ތުހުމަތުގައިކަމަށްވާއިރު، އޭނާގެ މައްޗަށް ދައުވާކުރަން ޕީޖީ އޮފީހަށް ފޮނުވީ މިމަހުގެ 14 ވަނަ ދުވަހުއެވެ.
ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވީ، ނިޒާމްގެ މައްޗަށް ގަސްތުގައި މީހަކު މެރުމާއި، ވައްކަމާއި، މަސްތުވާތަކެތީގެ މުޢާމަލާތު ކުރުމުގެ ކުށުގެ ދަޢުވާ ކުރުމަށް ތައްޔާރުވަމުން އަންނަކަމަށެވެ. ޝަމީމް ވިދާޅުވީ، ނިޒާމް ދައްކާފައިހުރި ވާހަކަތަކާއި، އެހެން ހެކިތަކުން، އޭނާ ކުރިކަމަކުން ލިޓަން މަރުވެފައިވާކަމަށް ޤަބޫލުކުރެވޭކަމަށެވެ. އަދި ތެޔޮ ބޯޓުގައި ހުރި ފައިސާ ވަގަށް ނެގިކަމުގެ ތުހުމަތުވެސް ނިޒާމްގެ މައްޗަށްކުރެވޭކަމަށާއި، އެކަމަށް ބާރުލިބޭ ހެކިވެސް ލިބިފައިވާކަމަށް ޝަމީމް ވިދާޅުވިއެވެ. އަދި ނިޒާމް ހައްޔަރުކުރި ވަގުތު އޭނާގެ އަތުގައި މަސްތުވާތަކެތި ހުރިކަމަށްވެސް ޝަމީމް ވިދާޅުވިއެވެ.
ލިޓަން މަރާލިކަމުގެ ތުހުމަތު ނިޒާމްގެ މައްޗަށް ކުރެވޭއިރު، އަދިވެސް ލިޓަން ފެނިފައެއް ނުވެއެވެ. މިދިޔަ މަހުގެ 2 ވަނަ ދުވަހު ވ.އަތޮޅު ވެމްޕަރު ފަޅުން ފެނުނު ހަށިގަނޑަކީ ލިޓަންގެ ހަށިގަނޑުކަމަށް ބެލެވުނެވެ. ނަމަވެސް އެ ހަށިގަނޑު ސާމްޕަލް ނަގައި ޓެސްޓުކުރުމަށްފަހު ފުލުހުން ވަނީ އެއީ ލިޓަންގެ ހަށިގަނޑު ނޫންކަމަށް ވިދާޅުވެފައެވެ.
ނިޒާމް ހައްޔަރުކޮށްފައިވާއިރު، އޭނާގެ ބަންދަށް ވަނީ ދެ މަސް ދުވަހުގެ މުއްދަތެއް ޖަހާފައެވެ.