ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމަ ހުއްޓުވައި، ދެ ޤައުމު ސުލްޙަކުރުވަން ޗައިނާއިން އިސްނަގައިގެން ރޭވުމެއް ހުށަހެޅުމުން އެމެރިކާގެ ރައީސް ޖޯ ބައިޑަން އެ ކަމާ ނުރުހުން ފާޅުކުރައްވައިފިއެވެ. ރަޝިޔާ-ޔޫކްރެއިން ހަނގުރާމަ ހުއްޓައިލުމަށް މަޝްވަރާގެ މަގު އިސްކޮށް، ސުލްޙަ ޤާއިމުކުރުމަށް ގޮވައިލާ، އެ ކަން ހާސިލުކުރުމަށް މަސައްކަތް ކުރާނެ ގޮތުގެ ރޭވުމެއް ޗައިނާއިން ވަނީ ހުށަހަޅާފައެވެ.
މި ރޭވުމާ މެދު ނުރުހުން ފާޅުކުރައްވައި ވާހަކަފުޅު ދައްކަވަމުން ބައިޑަން ވިދާޅުވީ، ރަޝިޔާއާއި ޗައިނާއާ ދެމެދު ސުލްޙަ ޤާއިމުކުރަން ޗައިނާއިން އިސްނަގައިގެން މަސައްކަތް ކުރުމަކީ އެއްވެސް ގޮތަކަށް "ހަމަޖެހޭ" ކަމެއް ނޫން ކަމުގައެވެ. "ޗައިނާގެ ޕްލޭނަށް “ރަޝިޔާގެ ރައީސް ވްލަޑިމިޔަރ” ޕުޓިން އެ ދަނީ ތަރުހީބު ދެމުން. މަރުޙަބާ ކިޔަމުން. ޕުޓިން މަރުޙަބާ ކިޔާފައިވާ އެއްވެސް ޕްލޭނެއް ރަނގަޅުވާނެ އެއް ގޮތެއް ވެސް އޮންނާނެތަ؟" މި ކަމާ މެދު ސުވާލު އުފައްދަވަމުން ބައިޑަން ވިދާޅުވިއެވެ.
"ޗައިނާގެ ޕްލޭން އަޅުގަނޑު ދުށިން. އެ ޕްލޭން ރާވާފައި އޮތީ މުޅިން ވެސް ރަޝިޔާއަށް ފައިދާވާނެ ގޮތަށް،" ބައިޑަން ވިދާޅުވިއެވެ. އަދި، ޗައިނާއަކީ ރަޝިޔާއާއި ޔޫކްރެއިނާ ދެމެދު ސުލްޙަ ކުރުވަން ކުފޫހަމަވާ ޤައުމެއް ނޫން ކަމުގައި ވެސް ބައިޑަން ސިފަކުރެއްވިއެވެ. މި ކަމުގެ ތެރެއަށް ޗައިނާއިން ވަންނަން މަސައްކަތް ކުރުމަކީ ހަމަޖެހޭ ކަމެއް ނޫން ކަމުގައި ވެސް އޭނާ ވިދާޅުވިއެވެ.
ޗައިނާގެ ހުށަހެޅުމުގައި ވަނީ ދެ ފަރާތުން ވެސް ދޫދިނުމަށް ގޮވައިލާފައެވެ. އަދި، މަޑުމަޑުން ހަމަލާ ބަދަލުކުރުންތައް ހުއްޓައިލުމަށް ބާރު އަޅާފައެވެ. މީގެ އިތުރުން، ނިއުކްލިޔަރ ހަތިޔާރެއް ބޭނުން ކުރުމަކީ އެއްވެސް ހާލެއްގައި ކޮށްގެންވާނެ ކަމެއް ނޫން ކަމުގައި ވެސް ޗައިނާގެ ހުށަހެޅުމުގައި ފާހަގަކޮށްފައިވެއެވެ.
ރަޝިޔާއަށް ހަތިޔާރު ފޯރުކޮށްދޭން ޗައިނާއިން މަސައްކަތް ކުރަމުންދާ ކަމުގައި ވެސް އެމެރިކާއިން ދާދިފަހުން ވަނީ ތުހުމަތުކޮށްފައެވެ. މި ކަމާ ގުޅޭގޮތުން އެމެރިކާގެ ޚާރިޖީ ވަޒީރު އެންތަނީ ބްލިންކަން ވިދާޅުވެފައި ވަނީ، ޗައިނާއިން ރަޝިޔާއަށް ހަތިޔާރު ފޯރުކޮށްދީ، ރަޝިޔާއިން ޔޫކްރެއިނުގައި ކުރަމުންދާ ހަނގުރާމައަށް އެހީތެރިވެދޭން މަސައްކަތް ކުރަމުންދާ ކަމުގައެވެ. ނަމަވެސް، ޗައިނާއިން މި ތުހުމަތުތައް ދޮގުކުރެއެވެ.
ޗައިނާގެ ޕްލޭނާ މެދު ވާހަކަފުޅު ދައްކަވަމުން ބައިޑަން ވަނީ އެމެރިކާގައި އުފައްދާ "އެފް-16" މަރުކާގެ އަސްކަރީ މަތިންދާބޯޓުތައް ޔޫކްރެއިނަށް ފޮނުވުމާ ދެކޮޅަށް ވާހަކަފުޅު ދައްކަވާފައެވެ. އޭނާ ވިދާޅުވީ، ޔޫކްރެއިނުގެ ރައީސް ވޮލޮޑޮމީރް ޒެލެންސްކީ އެދިވަޑައިގެންނެވި ނަމަވެސް، ޔޫކްރެއިނަށް އެ ފަދަ އަސްކަރީ މަތިންދާބޯޓު ފޯރުކޮށްދިނުމުގެ ވަގުތު އަދި ނުޖެހޭ ކަމުގައެވެ.
ނަމަވެސް، އެމެރިކާއިން ދާދިފަހުން ވަނީ ޔޫކްރެއިނަށް އެންމެ ފަހުގެ ޒަމާނީ ހަތިޔާރު ފޯރުކޮށްދޭން އެއްބަސްވެފައެވެ. އޭގެ ތެރޭގައި "ޕޭޓްރިއަޓް" މަރުކާގެ މިސައިލް ސިސްޓަމްތަކާއި، "އެބްރާމްސް" މަރުކާގެ އަސްކަރީ ޓޭންކުތައް ހިމެނެއެވެ. އިނގިރޭސިވިލާތާއި ޖަރުމަނުވިލާތުން ވެސް ދާދިފަހުން ވަނީ ޔޫކްރެއިނަށް އެންމެ ފަހުގެ ޒަމާނީ އަސްކަރީ ޓޭންކު ފޮނުވުމުގެ މަސައްކަތް ފަށާފައެވެ.