އިންޑިޔާ ކަނޑުގެ ސަރަޙައްދުގައި އުފެދިފައިވާ ބާރުގަދަ ތޫފާނެއް ކަމުގައިވާ ފްރެޑީ މޮޒަމްބީކާ ދިމާލަށް ދަތުރުކުރަން ފެށުމާ ގުޅިގެން އެ ޤައުމުގައި ރައްކާތެރިކަމުގެ ފިޔަވަޅުތައް ވަރުގަދަކޮށްފިއެވެ. އެފްރިކާގެ ބައްރުގެ އިރުދެކުނުގައި އޮންނަ މޮޒަމްބީކަކީ 28 މިލިޔަން މީހުންގެ އާބާދީއެއް އޮންނަ ޤައުމެކެވެ.
ތޫފާން ފްރެޑީ މޮޒަމްބީކާ ދިމާލަށް ދަތުރުކުރަމުންދާއިރު، ފެބްރުވަރީ 21 ވަނަ ދުވަހު އެ ތޫފާން ވަނީ މަޑަގަސްކަރައިގެ ސަރަޙައްދުތަކަށް އަރައި، ބޮޑެތި ގެއްލުންތަކެއް ދީފައެވެ. މި ތޫފާނާ ގުޅިގެން އެ ޤައުމުގައި ހިނގި އެކި ހާދިސާތަކުގައި މަރުވި މީހުންގެ ޢަދަދު މިހާރު ވަނީ ފަހަކަށް އަރާފައެވެ. ތޫފާނާ އެކު ގަޑިއަކު 130 ކިލޯމީޓަރުގެ ބާރުގައި ޖެހެމުންދިޔަ ވައިގެ ސަބަބުން އެ ޤައުމުގެ އައްސޭރިފަށުގެ ސަރަޙައްދުތަކުގައި ގިނަ ޢަދަދެއްގެ ޢިމާރާތްތަކަށް ގެއްލުން ލިބުނެވެ.
ފްރެޑީގެ ސަބަބުން މަޑަގަސްކަރައިގައި 16,700 އަށްވުރެ ގިނަ މީހުން ވަނީ ހާލުގައި ޖެހިފައެވެ. މީގެ ތެރޭގައި، ފެންބޮޑުވުމާއި ވައިބާރުވުމުގެ ސަބަބުން ގެއްލުން ލިބުނު 4,500 އަށްވުރެ ގިނަ ގެދޮރުގެ އަހުލުވެރިން ހިމެނެއެވެ. މަޑަގަސްކަރައަށް ފަހު، މޮޒަމްބީކާ ދިމާލަށް ފްރެޑީ ދަތުރުކުރަމުންދިޔަ ނަމަވެސް، ތޫފާނުގެ ބާރު މިހާރު ކޮންމެވެސް ވަރަކަށް ދަށްވެފައިވާ ކަމުގައި ފަރަންސޭސި ވިލާތުގެ މޫސުމާ ބެހޭ އިދާރާއިން ބުނެއެވެ.
މި ތޫފާނާ އެކު މިހާރު ވެސް ގަޑިއަކު 55 ކިލޯމީޓަރުގެ ބާރުމިނުގައި ވައި ޖެހެމުންދާއިރު، މޮޒަމްބީކާ ކައިރިވާ ވަރަކަށް ތޫފާނުގެ ބާރު ގަދަވެދާނެ ކަމަށް ވެސް އެ އިދާރާއިން އިންޒާރު ކުރެއެވެ. އަދި، މި އިންޒާރުތަކާ ގުޅިގެން މޮޒަމްބީކުގެ ރައްޔިތުން ވަނީ ރައްކާތެރިކަމުގެ ފިޔަވަޅުތައް އަޅަން ފަށާފައެވެ.
ފްރެޑީގެ އަސަރު އެންމެ ފުރަތަމަ ކުރާނެ ކަމަށް ބެލެވެނީ މޮޒަމްބީކުގެ ވެރިރަށް މަޕޫޓޯއާ 500 ކިލޯމީޓަރު އުތުރުގައި އޮތް ސަރަޙައްދަށް ކަމުގައި މޫސުމާ ބެހޭ އިދާރާއިން ލަފާކުރެއެވެ. އަދި، މި ތޫފާނުގެ އަސަރު މޮޒަމްބީކާ އިންވެގެން އޮތް ޒިމްބާބުވޭއަށް ވެސް ކުރާނެ ކަމަށް އެ ފަރާތްތަކުން ވަނީ އިންޒާރުކޮށްފައެވެ.
ފްރެޑީއަކީ ފާއިތުވި އަހަރުތަކުގެ ތެރޭގައި މަޑަގަސްކަރައަށް އަރާފައިވާ އެންމެ ބާރުގަދަ އެއް ތޫފާނެވެ. މަޑަގަސްކަރަ އޮންނަ ސަރަޙައްދުގައި ޢާންމު ގޮތެއްގައި ތޫފާންތައް އުފެދެނީ ނޮވެންބަރު މަހުން ފެށިގެން ޖެހިގެން އޮންނަ އަހަރުގެ އޭޕްރީލް މަހާއި ދޭތެރޭގައެވެ.
ހުސްވި 2022 ވަނަ އަހަރު ވެސް މި ފަދަ ބާރުގަދަ ތޫފާނެއް ކަމުގައިވާ ބެޓްސިރާއީ ވަނީ މަޑަގަސްކަރައިގެ ސަރަޙައްދުތަކަށް އަރާފައެވެ. އެ ތޫފާނާ ގުޅިގެން ކުރިމަތިވި އެކި ހާދިސާތަކުގައި 130 މީހުން ވަނީ މަރުވެފައެވެ. އަދި، އެ ޤައުމުގެ އިރުމަތީ އައްސޭރިފަށުގައިވާ މެނަންޖެރޭއަށް ބޮޑެތި ގެއްލުންތަކެއް ލިބުނެވެ. އެއީ، 25,000 މީހުންގެ އާބާދީއެއް ދިރިއުޅޭ ރަށެކެވެ.
ތޫފާން ފްރެޑީ އުފެދިފައި ވަނީ އޮސްޓްރޭލިޔާގެ ހުޅަނގުއުތުރާއި އިންޑޮނީޝިޔާގެ ދެކުނުގެ ކަނޑުގެ ސަރަޙައްދުގައެވެ. އަދި، ފާއިތުވި ތިން ވަރަކަށް ހަފުތާގެ ތެރޭގައި ފްރެޑީ ވަނީ އިންޑިޔާ ކަނޑު ހުރަސްކޮށް، މަޑަގަސްކަރައާ ހަމައަށް ދަތުރުކޮށްފައެވެ. އަދި، މިހާރު ދަތުރުކުރަމުން ދަނީ އެފްރިކާ ބައްރުގެ ޤައުމުތަކާ ދިމާލަށެވެ.