އެއް ލީޑަޝިޕުން އަނެއް ލީޑަރޝިޕަށް ބަދަލުވުމުގައި ޕާޓީގެ ސިޔާސަތުތަކާއި، އުސޫލާއި، ހަމަތަކަށް ބަދަލު ނައިސް ކުރިއަށްދާ ހަމައެކަނި ސިޔާސީ ޕާޓީއަކީ އަދާލަތު ޕާޓީކަމަށް އެޕާޓިގެ ރައީސް އަދި ހޯމް މިނިސްޓަރ ޢިމްރާން އަބްދުﷲ ވިދާޅުވެއްޖެއެވެ. އިމްރާން މިހެން ވިދާޅުވީ ޢަދާލަތު ޕާޓީގެ ސްޓްރެޓެޖިކް ޕްލޭންގައިވާ ލަނޑުދަނޑިތައް ހާސިލް ކުރުމަށް މަސައްކަތް ކުރާނެ ގޮތްތަކެއް ކަނޑައެޅުމަށް ކުރިއަށްގެންދާ "ހޭރިޔާ" ޕްރޮގްރާމް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
އިމްރާން ވިދާޅުވީ އަދާލަތު ޕާޓީ އުފެއްދުމުގެ އޮތީ އެންމެ ބޭނުމެއްކަމަށެވެ. ޕާޓީިން ފެށުނީއްސުރެ މަސައްކަތް ކުރަމުން ދަނީ ރާއްޖޭގައި ފުޅާވެ ބޮޑުވަމުން އަންނަ ޑިމޮކްރެޓިކް ވެށި، އިސްލާމީ އަޚްލާގުން ދުރުވިޔަ ނުދިނުމަށްކަމަށެވެ.
އަދާލަތު ޕާޓީއަކީ 2005ވަނަ އަހަރު ސިޔާސީ ޕާޓީތައް އުފެއްދުމުގެ ހުއްދަ ދިނުމާއެކު، 3ވަނައަށް ރާއްޖޭގައި އުފެއްދި ސިޔާސީ ޕާޓީއެކެވެ. ޢިމްރާން ވިދާޅުވީ ޢަދާލަތު ޕާޓީގެ ކޮންމެ މަސައްކަތެއް ބިނާވަނީ އިސްލާމީ، ޝަރުޢީ އަދި އިސްލާޙީ މަސައްކަތްތަކުގެ މައްޗަށްކަމަށެވެ.
އިމްރާން ވިދާޅުވީ ޕާޓީ އުފެއްދި ދުވަހުން ފެށިގެންވެސް ޕާޓީ ދާންވީ މިސްރާބު ވަރަށް ސާފުކަމަށެވެ. އަދި މިހާތަނަށް ރާއްޖޭގެ ސިޔާސީ ޕާޓީތަކުގެ މަސްރަޙައް އައި ބަދަލުގައިވެސް، ފެށުނީއްސުރެ އެއް ޢަމާޒަކަށް މަސައްކަތް ކުރި ޕާޓީއަކީ އަދާލަތު ޕާޓީކަމަށް ޢިމްރާން ވިދާޅުވިއެވެ.
"ބަދަލެއް ނައިސް އެއްގޮތެއްގައި މަޑުމަޑުން ކުރިއަށްދާ ހަމައެކަނި ސިޔާސީ ޕާޓީއަކީ އަދާލަތު ޕާޓީއޭ ބުނުމަކުން ދޮގަކަށް ނުވާނެ. އެއް ލީޑަޝިޕުން އަނެއް ލީޑަޝިޕަށް ބަދަލުވިއިރުވެސް، ޕާޓީގެ ޢުސޫލާއި ހަމައާއި ޤަބޫލުކުރާ ހަމައަށް ބަދަލެއް ނާދެ." ޢިމްރާން ވިދާޅުވިއެވެ.
އިމްރާން ވިދާޅުވީ ޢަދާލަތު ޕާޓީގެ ކުރިން އުފެދުނު ދެ ޕާޓީގެ ޙާލަތަށް ބެލިއަސް އެކަން ހާމަވާނެކަމަށެވެ.
"ހޭރިޔާ" ޕްރޮގްރާމްގައި ވާހަކަދައްކަމުން މިނިސްޓަރ ޢިމްރާން ވިދާޅުވީ ރާއްޖޭގެ ދަޢުލަތުގެ ނިޒާމަށް މިވަގުތު އެންމެ ބޮޑަށް ބޭނުންޖެހިފައިވަނީ ޝަރުޢީ، ސިޔާސީ ޢުސޫލު ހިންގާނެ ޤާބިލު ޒުވާން ލީޑަޝިޕެއްކަމަށެވެ. އަދާލަތު ޕާޓީން ފެށި ހޭރިޔާ ޕްރޮގްރާމްގެ ސަބަބުން އެފަދަ ލީޑަރޝިޕެއް ސިޔާސީ މައިދާނަށް ނެރެވޭނެކަމަށް އުއްމީދުކުރައްވާކަމަށް ޢިމްރާން ވިދާޅުވިއެވެ.
އަދާލަތު ޕާޓީގައި 9700އަށްވުރެ ގިނަ މެންބަރުން އެބަތިއްބެވެ.