ޔޫކްރެއިނުގެ މިނިވަންކަން ދިފާޢުކޮށް ސިޔާދަތު ހިމާޔަތްކުރުމަށް ކުރަމުންދާ ހަނގުރާމައިގައި އެހީތެރިކަން ފޯރުކޮށްދިނުމަށް އެ ޤައުމަށް އިތުރު 2 ބިލިޔަން ޑޮލަރުގެ އަސްކަރީ އެހީ ފޮނުވާނެ ކަން އެމެރިކާއިން ހާމަކޮށްފިއެވެ. އެމެރިކާގެ މި ކަން ހާމަކޮށްފައި މި ވަނީ، ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައަށް އެއް އަހަރު ފުރުމާ ދިމާކޮށެވެ. ރަޝިޔާ ސިފައިން ޔޫކްރެއިނަށް އަރާފައި ވަނީ ހުސްވި 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ.
ޔޫކްރެއިނަށް އަލަން ފޮނުވާ އަސްކަރީ އެހީގެ ސާމާނުގެ ތެރޭގައި ހިމެނެނީ "ހައިމާސް" ރޮކެޓާއި، 155 މިލިމީޓަރުގެ އާޓިލަރީ ވަޒަނާއި، ޑްރޯންއާއި، ޑްރޯން ހަމަލާތަކުން ދިފާޢުވާން ބޭނުންކުރާނެ ނިޒާމުތަކާއި، މައިން ސާފުކުރާ ސާމާނެވެ. މީގެ އިތުރުން، ޔޫކްރެއިން ސިފައިންނަށް އަސްކަރީ ތަމްރީނާއި، ހަތިޔާރުތަކުގެ މެއިންޓެނެންސް ބެލެހެއްޓުމުގެ ތަމްރީނު ފޯރުކޮށްދޭނެ ކަމުގައި ވެސް ޕެންޓެގަންއިން ބުންޏެވެ.
މީގެ އިތުރުން، ދުރުރާސްތާ މިސައިލާއި ހުޅަނގުގެ ޤައުމުތަކުގައި ބޭނުންކުރާ އަސްކަރީ މަތިންދާބޯޓު ގަތުމަށް ވެސް އެމެރިކާއިން ޚަރަދުކުރާނެ ކަމުގައި ޕެންޓަގަންއިން ބުންޏެވެ. ނަމަވެސް، އޭގެ ތެރޭގައި އެމެރިކާގެ އަސްކަރިއްޔާއިން ބޭނުންކުރާ އަސްކަރީ މަތިންދާބޯޓުތަކެއް ނުހިމެނޭނެއެވެ.
ޔޫކްރެއިން ދިފާޢު ކުރުމަށް އެ ޤައުމުގެ އަސްކަރިއްޔާއިން ކުރަމުންދާ ހަނގުރާމައިގައި އެ ޤައުމަށް އެންމެ ބޮޑަށް އެހީތެރިކަން ފޯރުކޮށްދެމުންދާ ޤައުމަކީ އެމެރިކާއެވެ. އަދި، އެމެރިކާއިން ވަނީ އެ ޤައުމާ އެކު ޔޫކްރެއިނަށް އެހީތެރިކަން ފޯރުކޮށްދޭނެ ޤައުމުތަކުގެ ކޯލިޝަނެއް އުފައްދާފައެވެ.
ރަޝިޔާ-ޔޫކްރެއިން ހަނގުރާމަ ފެށިފަހުން މިހާތަނަށް 32 ބިލިޔަން ޑޮލަރުގެ އަސްކަރީ އެހީތެރިކަން ޔޫކްރެއިނަށް ފޯރުކޮށްދިނުމަށް އެމެރިކާއިން ވަނީ ވަޢުދުވެފައެވެ. އަދި، އެހެން ޤައުމުތަކުން ވެސް ވަނީ 20 ބިލިޔަން ޑޮލަރުގެ އަސްކަރީ ސާމާނު ޔޫކްރެއިނަށް ފޯރުކޮށްދޭނެ ކަމަށް ބުނެފައެވެ.
ރަޝިޔާގެ ރައީސް ވްލަޑިމިޔަރ ޕުޓިން އުންމީދުކުރެއްވި ގޮތަށް، ޔޫކްރެއިން ސިފައިން އަމާންދީފައި ނުވާ ކަމަށާއި، އޭނާ އުންމީދުކުރެއްވި ގޮތާ ޚިލާފަށް ޔޫކްރެއިނުގެ ސިފައިން އެ މީހުންގެ ޤައުމުގެ ދިފާޢުގައި ތެދުވެފައިވާ ކަމަށް އެމެރިކާގެ ދިފާޢީ ވަޒީރު އޮސްޓިން ލޮއިޑް ވިދާޅުވިއެވެ. "ހަނގުރާމައަށް އެއް އަހަރު ފުރުނު ނަމަވެސް ޔޫކްރެއިން ސިފައިންގެ އަޒުމަކަށް ބަދަލެއް އައިސްފައެއް ނުވޭ،" އޮސްޓިން ވިދާޅުވިއެވެ.
އެމެރިކާއާއި ހުޅަނގުގެ ބާރުތަކުން ދަނީ ޔޫކްރެއިނުގެ އަސްކަރިއްޔާއަށް ބޭނުންވާނެ ހުރިހާ ސާމާނެއް ފޯރުކޮށްދެމުންނެވެ. މީގެ ތެރޭގައި ހަތިޔާރުގެ އިތުރުން ޔުނީފޯމާއި، ރޮކެޓް ސިސްޓަމާއި، މިސައިލުން ދިފާޢުވާ ނިޒާމުތަކުގެ އިތުރުން އަސްކަރީ އުޅަނދުފަހަރު ހިމެނެއެވެ. ނަމަވެސް، ޔޫކްރެއިނުން ދަނީ ބަރުހަތިޔާރާއި އެންމެ ފަހުގެ ޒަމާނީ އަސްކަރީ މަތިންދާބޯޓުތަކާއި ޓޭންކުތައް ހޯދަން މަސައްކަތް ކުރަމުންނެވެ.
ޔޫކްރެއިނުން ހޯދުމަށް އެދިފައިވާ ބައެއް ހަތިޔާރުގެ ތެރޭގައި "ޕޭޓްރިއަޓް" މަރުކާގެ ވައިގެ ދިފާޢީ ނިޒާމާއި "އެފް-16" މަރުކާގެ އަސްކަރީ މަތިންދާބޯޓާއި، ޒަމާނީ ޓޭންކު ހިމެނެއެވެ. މީގެ ތެރެއިން ޕޭޓްރިއަޓް މިސައިލާއި އެންމެ ފަހުގެ އަސްކަރީ ޓޭންކުތައް ޔޫކްރެއިނަށް ފޯރުކޮށްދޭން ނޭޓޯގެ ޤައުމުތަކުން މިހާރު ވަނީ އެއްބަސްވެފައެވެ. އަދި، އެ ތަކެތި ފޮނުވަން މިހާރު ދަނީ މަސައްކަތް ކުރަމުންނެވެ.