ޖުމްހޫރީ ޕާޓީ، ޖޭޕީގެ ރައީސްއާއި ނާއިބު ރައީސްގެ މަޤާމު އުވާލައިފިއެވެ. ޖޭޕީން މިގޮތަށް ނިންމީ ދަރުބާރުގައި ކުރިއަށްދާ އެޕާޓީގެ ޤައުމީ ކޮންފަރެންސްގައެވެ.
ޖޭޕީގެ ރައީސްއާއި ނާއިބު ރައީސްގެ މަޤާމު އުވާލުމަށް ފާސްވީ ކޮންގްރެސްގައި ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުންނެވެ. ޖޭޕީގެ ރައީސްގެ މަޤާމުގައި މިހާތަނަށް ހުންނެވީ ކުރީގެ ޓޫރިޒަމް މިނިސްޓަރ ޢަލީ ވަޙީދެވެ. އަދި ނާއިބު ރައީސްއަކަށް ހުންނެވީ އަޙްމަދު ސަޢުދެވެ.
ޖޭޕީގެ ރައީސްއާއި ނާއިބު ރައީސްގެ މަޤާމު އުވާލުމާއި ގުޅިގެން، އެޕާޓީގެ އެންމެ އިސް ފަރާތަކީ ލީޑަރެވެ. އޭގެ ފަހަތުން ފަސް ނާއިބު ލީޑަރުން ތިއްބަވާނެއެވެ. ޖޭޕީގެ ލީޑަރުކަމަށް ކުރިމަތިލެއްވީ މިހާތަނަށްވެސް ލީޑަރުކަމުގައި ހުންނެވި ޤާސިމް އިބްރާހީމެވެ. އެހެންކަމުން ޤާސިމް ވަނީ ވޯޓަކާ ނުލައި އެ މަޤާމަށް އިންތިޚާބުވެވަޑައިގެންފައެވެ.
މިފަހަރުގެ ކޮންގްރެސްގައި އެންމެ ވާދަވެރީ ޕާޓީގެ ނާއިބު ލީޑަރުގެ މަޤާމެވެ. ފަސް ނާއިބު ލީޑަރުން އައްޔަންކުރާއިރު، 12 ބޭފުޅުން ކުރިމަތިލެއްވިއެވެ.
ޖޭޕީގެ ކޮންގްރެސްގައި މުހިންމު ނިންމުންތައް ނިންމާނީ މިއަދެވެ. އެގޮތުން އެޕާޓީގެ އިންތިޚާބީ މަޤާމު ތަކަށް ބޭފުޅުން އައްޔަންކުރުމުގެ އިތުރުން ކުރިއަށް އޮތް ރިޔާސީ އިންތިޚާބާމެދު އެޕާޓީން ނިންމާނެ ގޮތެއް ކަނޑައެޅުމަށް ހުށައަޅާފައިވާ ޤަރާރަށްވެސް ގޮތެއް ނިންމާނެއެވެ.
ޖޭޕީގެ ކޮންގްރެސް ނިންމާލާނީ މިރެއެވެ.