އިސްރާޢީލުން ވެރިވެގަނެފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވުން ހުއްޓައިލުމަށް އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް އިސްރާޢީލަށް ގޮވައިލައްވައިފިއެވެ. ޔަހޫދީ އިސްރާޢީލުން ދާދިފަހުން ވަނީ، ފަލަސްޠީނުގެ ބިންތަކުގައި ޔަހޫދީންގެ އިތުރު މީހުން ވަޒަންވެރިވުމަށް ހުއްދަދީފައެވެ. އަދި، ޔަހޫދީންގެ އިތުރު ޢާއިލާތަކަށް ގެދޮރު ބިނާކުރުމުގެ މަޝްރޫޢުތައް ފަށާނެ ކަން އިޢުލާނުކޮށްފައެވެ.
ނަމަވެސް، މި ކަމަށް ބައިނަލްއަޤުވާމީ މުޖުތަމަޢުގެ ފާޑުކިޔުންތައް މި ވަނީ އަމާޒުވެފައެވެ. އ.ދ.ގެ އިތުރުން އެމެރިކާއިން ވެސް ވަނީ އިސްރާޢީލުގެ އައު ސަރުކާރުގެ މި ނިންމުމަށް ފާޑުކިޔާފައެވެ. އަދި، އ.ދ.ގެ ސަލާމަތީ މަޖިލީހުގެ 15 މެންބަރު ޤައުމުން ވެސް ވަނީ އިސްރާޢީލުގެ ނިންމުމާ މެދު ކަންބޮޑުވުން ފާޅުކޮށްފައެވެ.
"
ޔަހޫދީން ވަޒަންވެރިކުރުވުމަށް އިސްރާޢީލުން ހަދާ ކޮންމެ ސެޓްލްމެންޓެއް ނުވަތަ އަވަށަކާ އެކު ސުލްޙައަށް ބޮޑެތި ހުރަސްތަކެއް ކުރިމަތިވޭ. ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވުމަކީ ބައިނަލްއަޤުވާމީ ޤާނޫނުތަކުން މަނާކޮށްފައިވާ ކަމެއް. އެ ކަން ހުއްޓައިލަން ޖެހޭ. އ.ދ.ގެ އެންމެ ބޮޑު ޒިންމާއަކީ ހަމަނުޖެހުންތައް ހުއްޓުވައި ސުލްޙަ ޤާއިމުކުރުން،" ގުތެރޭޝް ވިދާޅުވިއެވެ.
ގުތެރޭޝް މި މޭރުމުން ވާހަކަފުޅު ދައްކަވާފައި މި ވަނީ، ޔަހޫދީ ޓެރެރިސްޓު ސިފައިން ހުޅަނގު އައްސޭރީގެ ނާބުލުސްއަށް އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ 11 މީހުން ޝަހީދުކޮށްލުމާ ގުޅިގެންނެވެ. އެ އުދުވާނުގައި ޔަހޫދީ ޖައްބާރު ސިފައިން ވަނީ ފަލަސްޠީނުގެ 80 އަށްވުރެ ގިނަ މީހުންނަށް ބަޑީގެ ހަމަލާތައް ދީފައެވެ. އަދި، އެއަށްފަހު ޣައްޒާއަށް ވަރުގަދަ ވައިގެ ހަމަލާތަކެއް ވެސް ދީފައެވެ.
އިސްރާޢީލުން ވެރިވެގަނެފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވާތީ އެމެރިކާގެ ޚާރިޖީ ވަޒީރު އެންތަނީ ބްލިންކަން ވެސް ދާދި ފަހުން ވަނީ އިސްރާޢީލަށް ފާޑުވިދާޅުވެފައެވެ. ފަލަސްޠީނުގެ ނުވަ ސަރަޙައްދެއްގައި ޔަހޫދީން ވަޒަންވެރިކުރުވުމަށް އިސްރާޢީލުގެ ކެބިނެޓުން ނިންމުމާ ގުޅިގެން ނެރުއްވި ބަޔާނެއްގައި ބްލިންކަން ވަނީ އެ ނިންމުމަށް ފާޑުވިދާޅުވެފައެވެ.
"އެމެރިކާގެ ކުރީގެ ސަރުކާރުތަކެކޭ އެއް ފަދައިން، ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވުމަކީ [ރައީސް ޖޯ ބައިޑަންގެ] ސަރުކާރުން ވެސް ދެކޮޅު ކަމެއް. މި ފަދަ އަމަލުތަކުގެ ސަބަބުން މަސްރަޙު އިތުރަށް ގޯސްވެ، ހަމަނުޖެހުންތަކާއި ކުރިމަތިލުންތަކަށް ފުރުޞަތު ދެވޭ. އަދި، ދެ މިނިވަން ދަޢުލަތް ޤާއިމުކުރުމަށް ކުރަމުންދާ މަސައްކަތްތަކަށް ހުރަސްއެޅޭ،" ބްލިންކަން ވިދާޅުވެފައިވެއެވެ.
ޔަހޫދީ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 60 އަށްވުރެ މައްޗަށް އަރާފައެވެ. މީގެ ތެރޭގައި 12 ކުޑަކުދިން ވެސް ހިމެނެއެވެ. އަދި، އުމުރުން ދުވަސްވީ އަންހެނެއް ވެސް ހިމެނެއެވެ. އެ އަންހެން މީހާ މަރައިލާފައި ވަނީ އަމިއްލަ ގޭގައި ޤުރުއާނުގެ އާޔަތްތައް ކިޔަވަން އިންދައެވެ.
ހުސްވި 2022 ވަނަ އަހަރަކީ ވެސް އިސްރާޢީލުގެ ލޭއޮހޮރުވުންތައް ގިނަ އަހަރެކެވެ. އެ އަހަރު ޝަހީދުކޮށްލާފައިވާ ފަލަސްޠީނުގެ ރައްޔިތުންގެ އަދަދު 171 އަށް އަރައެވެ. މީގެ ތެރޭގައި 30 އަށްވުރެ ގިނަ ކުށެއް ނެތް ކުޑަކުދިން ވެސް ހިމެނެއެވެ.