އަލިފާން ރޯވި މ.ނިރުފެހިގެ ސާފުކުރުމުގެ މަސައްކަތް ކުރަމުން ދަނިކޮށް ފެނުނު ފައިތިލައަކީ އަލިފާނުގެ ހާދިސާގައި ނިޔާވި މީހެއްގެ ފައިތިލަކަމަށް ފުލުހުން ވިދާޅުވެއްޖެއެވެ.
މިދިޔަ އަހަރުގެ ނޮވެމްބަރު މަހުގެ 9 ވަނަ ދުވަހުގެރޭ މ. ނިރުފެހިގޭގައި ހިނގި އަލިފާނުގެ ހާދިސާގައި އެންމެ ފުރަތަމަ އަލިފާން ރޯވީ އެގޭ ތިރީގައި ހުރި ގަރާޖުގައެވެ.
ނިރުފެހިގޭގެ އަލިފާނުގެ ޙާދިސާގައި 10 މީހުން ވަނީ ނިޔާވެފައެވެ.
މި ހަދިސާގައި އެތަން ސާފުކުރަމުން ދަނިކޮށް ފައިތިލައެއް ވަނީ ފެނިފައެވެ. މިކަމާ ގުޅިގެން ފުލުހުން މިއަދު ވިދާޅުވީ އެ ފައިތިލައަކީ ހާދިސާގައި ނިޔާވި މީހުންގެ ތެރެއިން މީހެއްގެ ފައިތިލަކަމަށެވެ. އަދި އެ ފައިތިލަ މިހާރު ވަޅުލާފައިވާކަމަށްވެސް ފުލުހުން ވިދާޅުވެއެވެ.
ފުލުހުން ވިދާޅުވީ އަލިފާނުގެ ހާދިސާގެ ތަޙްޤީގު ފުރިހަމަކުރުމަށް ކުރަންޖެހޭ އެންމެ ފަހުގެ މަސައްކަތްތައް ކުރަމުން އަންނަކަމަށެވެ.
އަލިފާނުގެ ހާދިސާގައި މަރުވި މީހުންގެ ހަށިގަނޑު ވަނީ ވަރަށް ބޮޑަށް އަނދާފައެވެ. އެމީހުންގެ ހަށިގަނޑުތައް ނިރުފެހިގެއިން ފެނުއިރު، ގިނަ މީހުންގެ ސިފައާއި ޖިންސުވެސް ވަކި ނުވާކަމަށް ފުލުހުން މަޢުލޫމާތުދީފައިވެއެވެ. ނަމަވެސް ފަހުން އެމީހުންގެ ޓެސްޓްތައް ހަދާ، އެ އެންމެންވަނީ ދެނެގަނެވިފައެވެ.
މ.ނިރުފެހިގޭގައި ހިނގި އަލިފާނުގެ ހާދިސާގައި މަރުވި އެންމެންނަކީވެސް ބިދޭސީންނެވެ. މީގެތެރޭގައި ހިމެނެނީ އިންޑިއާގެ 8 މީހުންނާއި، ބަންގްލަދޭޝްއަށް ނިސްބަތްވާ 2 މީހުންނެވެ. އެއީ 6 ފިރިހެނުންނާއި 4 އަންހެނުންނެވެ.