ރައްޔިތުންގެ މަޖިލީހުގެ ގުރައިދޫ ދާއިރާގެ މެންބަރު އަލްއުސްތާޛް އިބްރާޙިމް ރިޟާ އަވަހާރަވުމާ ގުޅިގެން ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު ރިޟާގެ އާއިލާއަށް ތަޢުޒިޔާ ވިދާޅުވެއްޖެއެވެ.
ގުރައިދޫ ދާއިރާގެ ޢިއްޒަތްތެރި މެންބަރު އަލްއުސްތާޛު އިބްރާހީމް ރިޟާއަކީ ރައްޔިތުންގެ މަޖިލީހުގައި ވަރަށް ގިނަ ދުވަހު މަސައްކަތްކުރެއްވި ބޭފުޅެއް. މަރްޙޫމްގެ ޢާއިލާއަށް އިޚްލާޞްތެރި ތަޢުޒިޔާ ދަންނަވަން. މަރްޙޫމްގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށި.
— Ibrahim Mohamed Solih (@ibusolih) February 23, 2023
ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހު ފޮނުއްވި މެސެޖުގައި ވިދާޅުވީ ގުރައިދޫ ދާއިރާގެ މެންބަރު އިބްރާހީމް ރިޟާއަކީ ރައްޔިތުންގެ މަޖިލީހުގައި ވަރަށް ގިނަ ދުވަހު މަސައްކަތްކުރެއްވި ބޭފުޅެއްކަމަށް ވިދާޅުވެ ރިޟާގެ ފުރާނަފުޅަށް ސުވަރުގޭގެ ނިޢުމަތް މިންވަރު ކުރެއްވުމަށް އެދި ދުޢާ ކުރައްވާފައެވެ.
ރިޟާ އަވަހާރަވީ ކެންސަރުގެ އާލާސްކަންފުޅަކަށް މެލޭޝިއާގައި ފަރުވާ ހޯއްދަވަމުން ދަނިކޮށް ރޭގެ ވަގުތެއްގައެވެ. ރިޟާގެ ޖަނާޒާ ބޭއްވުމަށް ހަމަޖެހިފައިވަނީ، މާދަމާ ހެނދުނު މެލޭޝިއާގަޑިން 11:00ގައި އެޤައުމުގެ ސުރައު ޕެރަންޑާ، ޑަމަންސަރާގައެވެ.
އިދިކޮޅު ޕީޕީއެމްގެ މެމްބަރެއްގެ ގޮތުގައި މަޖިލިސް ތަމްސީލުކުރައްވަމުން ގެންދެވި ރިޟާއަކީ މަޖިލީހުގައި އެންމެ ގިނަ ދުވަސްވީ އެއް މެމްބަރެވެ. ރިޟާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ. ރިޟާ ގެންދެވީ މަޖިލީހުގެ ޖުޑިޝަރީއާއި، މިނިވަން މުވައްސަސާތަކުގެ ކޮމިޓީގެ މެންބަރުކަންވެސް ކުރައްވަމުންނެވެ.
ޤާނޫނީ ވަކީލުކަންވެސް ކުރައްވަމުން ގެންދެވި ރިޟާ ވަނީ ރައްޔިތުން މަޖިލީހުގެ މިދިޔަ ދައުރުގައި އެމަޖިލީހުން ޖޭއެސްސީއަށްް ކަނޑައެޅުއްްވި މެމްބަރުގެ ގޮތުގައި އެ ކޮމިޝަންގައިވެސްް މަސައްކަތް ކުރައްވާފައެވެ. އަދި ޖޭއެސްސީގެ ނައިބު ރައީސްގެ މަޤާމުވެސް ރިޟާވަނީ ފުރުއްވާފައެވެ.
MP Ibrahim Riza akee Rayyithunge Majlis ge membarukan 3 dhaurehgai kurevvi Raajjeyge siyasee hayaathuge nuhanu bodu baiverieh adhi Raajje siyaasee party ge nizam ah badhalukurumuge hissadhaareh. Maaiy Allah marhoom ah suvaruge minvarukuravva, aaila ah kehtherikan dhevvashi.Aameen
— Mohamed Nasheed (@MohamedNasheed) February 23, 2023
ރިޟާ އަވަހާރަވުމާ ގުޅިގެން ރައްޔިތުންގެ މަޖިލީހުގެ ރައީސްވެސް އެއާއިލާއަށް ތަޢުޒިޔާ ފޮނުއްވާފައެވެ. ރައީސް ނަޝީދުގެ މެސެޖްގައިވަނީ ރިޟާއަކީ މަޖިލީހުގެ މެމްބަރުކަން 3 ދައުރުގައި ކުރެއްވި އަދި ރާއްޖޭގެ ސިޔާސީ ހަޔާތުގެ ނުހަނު ބޮޑު ބައިވެރިއެއް ކަމަށެވެ. އަދި ރާއްޖެ ސިޔާސީ ޕާޓީގެ ނިޒާމަށް ބަދަލުކުރުމުގެ ހިއްސާދާރެެއް ކަމަށްވެސް މަޖިލީހުގެ ރައީސްވަނީ ވިދާޅުވެފައެވެ. ރައީސް ނަޝީދުވަނީ މަރުހޫމަށް ސުވަރުގެ މިންވަރު ކުރައްވާ އާއިލާއަށް ކެތްތެރިކެން ދެއްވުން އެދި ދުއާ ކުރައްވާފައެވެ.