އިންޑިޔާ ކަނޑުގައި އުފެދުނު ބާރުގަދަ ތޫފާނެއް ކަމުގައިވާ ފްރެޑީ މަޑަގަސްކަރައަށް އެރުމާ ގުޅިގެން ހިނގި ހާދިސާތަކުގައި އެކަކު މަރުވެއްޖެއެވެ. ތޫފާން ފްރެޑީ އަރާފައި ވަނީ މަޑަގަސްކަރައިގެ އިރުމަތީގެ ސަރަޙައްދުތަކަށެވެ. ތޫފާނާ ގުޅިގެން އެ ސަރަޙައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ.
ތޫފާން ފްރެޑީ މަޑަގަސްކަރައާއި މޮރިޝަސްގެ ސަރަޙައްދުތަކަށް އަރާފައި ވަނީ، އެ ސަރަޙައްދަށް ބާރުގަދަ އެހެން ތޫފާނެއް ކަމުގައިވާ ޗެނީސޯ އެރިތާ މަދު ހަފުތާތަކެއް ފަހުންނެވެ. އެ ފަހަރު މަޑަގަސްކަރައިން 33 މީހުން މަރުވިއެވެ. އަދި، އެތަކެއް ހާސް މީހުންގެ ގެދޮރު ހަލާކުވިއެވެ.
ތޫފާން ފްރެޑީއާއެކު ބޯކޮށް ވާރޭވެހި ގަޑިއަކު 130 ކިލޯމީޓަރުގެ ބާރުމިނުގައި ވައި ޖެހެމުންދާ ކަމުގައި މަޑަގަސްކަރައިގެ މޫސުމާ ބެހޭ އިދާރާއިން ހާމަކުރެއެވެ. ގަދަ ވަޔާއެކު ގިނަ ޢަދަދެއްގެ ގެދޮރުގެ ފުރާޅު އެއްލައިލާފައިވާ ކަމުގައި އެ ޤައުމުގެ އޮފިޝަލުން ވިދާޅުވެއެވެ. އަދި، އައްސޭރިފަށުގެ ސަރަޙައްދުތަކަށް ވަނީ ބިޔަ ރާޅުތައް އަރާފައެވެ.
މި ތޫފާނާ ގުޅިގެން މަޑަގަސްކަރައިގެ އިރުމަތީ ސަރަޙައްދުތަކުގެ ކަނޑުތައް ވަނީ ވަރަށް ގަދަވެފައެވެ. އަދި، މިހާތަނަށް އެކަކު މަރުވެފައިވާއިރު، އޭނާ މަރުވެފައި ވަނީ ގެނބިގެން ކަމުގައި އޮފިޝަލުން ވިދާޅުވެއެވެ. 27 އަހަރުގެ ފިރިހެނެއް މަރުވެފައި ވަނީ މަހަނޯރޯ ކިޔާ ރަށެއްގެ އައްސޭރިފަށުގެ ސަރަޙައްދުގައެވެ.
ތޫފާން ފްރެޑީއާ ގުޅިގެން މަޑަގަސްކަރައިގައި ސްކޫލްތަކާއި އޮފީސްތައް ވަނީ ބަންދުކޮށްފައެވެ. އަދި، މަގުތައް ބަންދުކޮށް، ދަތުރުފަތުރުކުރުން ވަނީ ވަގުތީ ގޮތުން މެދުކަނޑައިލާފައެވެ. މި ތޫފާނާ ގުޅިގެން މިހާތަނަށް 7,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
މި ތޫފާނާ ގުޅިގެން މޮރިޝަސްގައި ވެސް ވަނީ ވައިގެ އުދުހުންތައް މެދުކަނޑައިލާ، ގިނަ އޮފީސްތަކާއި ފިހާރަތަކާއި ބޭންކުތައް ބަންދުކޮށްފައެވެ. އަދި، ޢާންމު ދަތުރުފަތުރުގެ ޚިދުމަތްތައް ވެސް ވަނީ މެދުކަނޑައިލާފައެވެ. މި ތޫފާނާ އެކު މޮރިޝަސްގެ ސަރަޙައްދުތަކަށް ގަޑިއަކު 280 ކިލޯމީޓަރުގެ ބާރުމިނުގައި ވައިޖެހޭނެ ކަމަށް އެ ޤައުމުގެ މޫސުމާ ބެހޭ އިދާރާއިން އިންޒާރުކޮށްފައިވެއެވެ.