ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙަށް ތާޢީދުކުރުމުގެ ކުރިން އެމްޑީޕީއާއެކު މަޝްވަރާކުރުމަށް ޢަދާލަތު ޕާޓީން ނިންމައިފިއެވެ.
މިސަރުކާރުގެ ކޯލިޝަނުގައި މިހާރުވެސް ހިމެނޭ އަދާލަތު ޕާޓިން މިހެން ނިންމީ ރޭ ބޭއްވި އެޕާޓީގެ ކުއްލި ބައްދަލުވުމެއްގައެވެ. އަދާލަތު ޕާޓިން ބުނީ އެމްޑީޕީގެ ރިޔާސީ ކެންޑިޑޭޓު، ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙު، ޢަދާލަތު ޕާޓީގެ ތާއީދަށް އެދިވަޑައިގެންފައިވާތީ އެކަމާމެދު އެމްޑީޕީއާއެކު މަޝްވަރާކުރުމަށް، މަޝްވަރާ މަޖިލީހުގެ ކުއްލިބައްދަލުވުމުގެ ތަނަވަސް އަޣްލަބިއްޔަތުން ނިންމާފައިވާކަމަށެވެ. ރައީސް ވަނީ އެ ސިޓީފުޅު ކޯލިޝަނުގައި ހިމެނޭ ޖުމްހޫރީ ޕާޓީއާއި އެމްއާރުއެމަށްވެސް ފޮނުއްވާފައެވެ. ނަމަވެސް އެ ސިޓީފުޅާމެދު އަދި ވަކިގޮތެއް އެޕާޓީތަކުން ނިންމާފައެވެ. ރިޔާސީ އިންތިޚާބާމެދު ޖުމްހޫރީ ޕާޓިން ނިންމާ މުހިންމު ނިންމުންތައް މިމަހު 24އިން 25އަށް ބާއްވާ ޤައުމީ ކޮންފަރެންސުން ނިންމާނެއެވެ.
ކުރިއަށް އޮތް ރިޔާސީ އިންތިޚާބުގައި ކޯލިޝަން ހެދުމާއި ގުޅޭގޮތުން މަޝްވަރާކުރުމުގެ ބާރު އެމްޑީޕީގެ ރިޔާސީ ކެނޑިޑޭޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް ދިނުމަށް އެމްޑީޕީގެ ގައުމީ މަޖިލީހުން ވަނީ ނިންމާފައެވެ.
ރައީސްގެ ސިޓީފުޅާމެދު މަޝްވަރާކުރުމަށްފަހު އަދާލަތު ޕާޓިން ނެރުނު ބަޔާނުގައި ވަނީ ކުރިއަށް އޮތް ރިޔާސީ ދައުރުގައި އަދާލަތު ޕާޓީއާ ގުޅިގެން ސަރުކާރެއް އުފެއްދުމަށްޓަކައި، މިއަހަރުގެ ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞަލިޙަށް ތާޢީދުކުރުމަށް، އެމްޑީޕީގެ ސިޓީން އެމަނިކުފާނު އެދިވަޑައިގެންފައިވާތީ، މި ހިނގާ ރިޔާސީ ދައުރުގައި ވޭތުވެދިޔަ ދައުރުތަލާއި އަޅާބަލާއިރު ސަރުކާރުގައި ކުރެވުނު ފަހި ތަޖުރިބާއަށް ރިޔާޢަތްކޮށް އެމްޑީޕީގެ ރިޔާސީ ކެނޑިޑޭޓަށް އަދާލަތު ޕާޓީގެ ތާޢީދު ދިނުމުގެ ކުރިން އެޕާޓީއާއެކު މަޝްވަރާކުރުމަށް އަދާލަތު ޕާޓިގެ މަޝްވަރާ މަޖިލީހުން ނިންމާފައިވާކަމަށެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވިސްނުންފުޅަކީ ކުރިއަށް އޮތް ރިޔާސީ އިންތިޚާބުގައިވެސް ކޯލިޝަނަކާއެކު ވާދަކޮށް ވެރިކަމަށް ވަޑައިގަތުންކަމަށް މީޑިއާގައި މީގެކުރިން ދެއްކެވި ވާހަކަފުޅުތަކުގައި ވަނީ ހާމަކުރައްވާފައެވެ. ރިޔާސީ ޕްރައިމަރީގައި ވާދަކުރެއްވިއިރުވެސް ރައީސް ސާލިހު ވިދާޅުވެފައިވަނީ އެމްޑީޕީއަށް އަނެއްކާވެސް ވެރިކަން ލިބޭނީ ކޯލިޝަން ހަދައިގެންކަމަށެވެ. އެހެންކަމުން ޕާޓީތަކާއި މަޝްވަރާކޮށްގެން ކޯލިޝަން ހެދުމަށް ތައްޔާރަށް ހުންނެވިކަމަށް ރައީސް ސާލިހު ވަނީ ވިދާޅުވެފައެވެ.