ތުރުކީވިލާތާއި ސޫރިޔާ ގުޅޭ ސަރަޙައްދީ ރޮނގު ކައިރިއަށް އަނެއްކާ ވެސް ބާރުގަދަ ބިންހެލުމެއް އަތުވެއްޖެއެވެ. އެ ސަރަޙައްދަށް އިތުރު ބިންހެލުމެއް އައިސްފައި މި ވަނީ، ފެބުރުވަރީ 6 ވަނަ ދުވަހު އައި ބާރުގަދަ ބިންހެލުމަށް ދެ ހަފުތާ ފަހުންނެވެ. ފެބުރުވަރީ 6 ގެ ބިންހެލުމުގައި ދެ ޤައުމުގައި މަރުވި މީހުންގެ ޢަދަދު މިހާރު ވަނީ 47,000 އަށްވުރެ މައްޗަށް އަރާފައެވެ.
ތުރުކީގެ އަންތަކްޔާއަށް ފަހުން އައި ބިންހެލުން ރެކޯޑް ކުރެވިފައި ވަނީ ރިކްޓަރ މިންގަނޑުން 6.4ގެ ބާރުމިނުގައެވެ. އެއީ އެ ޤައުމުގެ ދެކުނުގައިވާ ސަރަޙައްދަކެވެ. މި ބިންހެލުމުގެ ލޮޅުންތަކުގެ އަސަރު އަވަށްޓެރި ސޫރިޔާއާއި، މިޞްރުގެ އިތުރުން ލުބުނާނަށް ވެސް ކުރިއެވެ. މި ބިންހެލުން އައިސްފައި ވަނީ ބިމުގެ ފަށަލައިގެ 10 ކިލޯމީޓަރު ފުނަށް ކަމުގައި ވިލާތުގެ ބިންހެލުންތަކާ ބެހޭ އިދާރާ (އީ.އެމް.އެސް.ސީ)އިން ބުނެއެވެ.
ފެބްރުވަރީ 20 ވަނަ ދުވަހުގެ ބިންހެލުމުގައި މިހާތަނަށް ތިން މީހުން މަރުވެފައިވާ ކަން ކަށަވަރު ކުރެވިފައިވާ ކަމަށާއި، އިތުރު 200 އަށްވުރެ ގިނަ މީހުންނަށް އަނިޔާވެފައިވާ ކަމުގައި ތުރުކީގެ ދާޚިލީ ވަޒީރު ސުލައިމާން ސޮއިލޫ ވިދާޅުވިއެވެ. އަދި، ހަތޭ ޕުރޮވިންސުގެ ބައެއް ޢިމާރާތްތައް ވެއްޓި، ގިނަ ޢަދަދެއްގެ ބަޔަކު ޢިމާރާތްތަކުގެ ދަށުގައި ތާށިވެފައިވާ ކަމުގައި އެ ޕުރޮވިންސުގެ މޭޔަރު ލުޠުފީ ސަވާސް ވިދާޅިއެވެ.
ސަމަންދަގުގައި ވެސް މީހަކު މަރުވެފައިވާ ކަމަށާއި، ޢިމާރާތްތައް ވެއްޓިފައިވާ ކަމުގައި އެ ޤައުމުގެ ކާރިސާތަކުގައި ހަރަކާތްތެރިވާ އިދާރާ (އޭ.އެފް.އޭ.ޑީ) އިން ބުނެއެވެ. ނަމަވެސް، ބިންހެލުން އައި ވަގުތު އެ ރަށުގައި ދިރިއުޅެމުން ގޮސްފައި ވަނީ މަދު ބަޔެއް ކަމަށް ވެސް އޮފިޝަލުން ވިދާޅުވިއެވެ.
ތުރުކީވިލާތަށް އިތުރު ބިންހެލުމަށް އައިސްފައި މި ވަނީ، ފެބުރުވަރީ 6 ވަނަ ދުވަހުގެ ބިންހެލުމުގައި ލިބުނު ގެއްލުންތައް ބައްލަވައިލައްވަން އެމެރިކާގެ ޚާރިޖީ ވަޒީރު އެންތަނީ ބްލިންކަން އެ ސަރަޙައްދަށް ޒިޔާރަތެއް ކުރެއްވިތާ ގަޑިއިރުތަކެއް ފަހުންނެވެ. ދަތުރުފުޅުގައި އޭނާ ވަނީ، ތުރުކީވިލާތަށް އެހީތެރިކަން ފޯރުކޮށްދިނުމުގައި އެމެރިކާއިން ދެމިއޮންނާނެ ކަމުގައި ވިދާޅުވެފައެވެ.
މީގެ ދެ ހަފުތާ ކުރިން އައި ބާރުގަދަ ބިންހެލުމުގައި މަރުވި މީހުންގެ ޢަދަދު މިހާރު ވަނީ 41,156 އަށް އަރާފައެވެ. އެ ބިންހެލުމުގައި ތުރުކީވިލާތުގައި އެކަނިވެސް 385,000 އަށްވުރެ ގިނަ އެޕާޓްމަންޓް ސުންނާފަތިވެފައިވާއިރު، ޢިމާރާތްތަކުގެ ދަށުގައި އަދިވެސް މީހުން ތާށިވެފައިވާ ކަމަށް ބެލެވޭ ކަމުގައި އޮފިޝަލުން ބުނެއެވެ. ނަމަވެސް، ދިރިތިބި ކަމަށް ބެލެވޭ މީހުން ސަލާމަތް ކުރުމުގެ މަސައްކަތްތައް ރަސްމީގޮތުން ވަނީ ހުއްޓައިލާފައެވެ.
ބިންހެލުމުގެ އަސަރު ތުރުކީވިލާތުގެ 11 ޕުރޮވިންސަކަށް ކޮށްފައިވާއިރު، ގެދޮރު ނެތި ހާލުގައި ޖެހިފައިވާ މީހުންނަށް 200,000 އެޕާޓްމަންޓް ބިނާކޮށްދިނުމުގެ މަސައްކަތް އަންނަ މާރިޗު މަހު ފަށާނެ ކަމުގައި ތުރުކީގެ ރައީސް ރަޖަބް ޠައްޔިބް އުރުދުޣާން ވަނީ ވިދާޅުވެފައެވެ. ބިންހެލުމުގައި ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށްދިނުމަށް އެމެރިކާއިން އެކަނިވެސް ވަނީ 185 މިލިޔަން ޑޮލަރުގެ އެހީ ފޮނުވާފައެވެ.
ބިންހެލުންތަކުން ސަލާމަތްވި މީހުންގެ ތެރޭގައި 356,000 އަށްވުރެ ގިނަ މާބަނޑު އަންހެނުން ހިމެނޭ ކަމުގައި އ.ދ.ގެ އިދާރާތަކުން ބުންޏެވެ. އަދި، އެ މީހުންނަށް މިހާރުންމިހާރަށް ޞިއްޙީ ފަރުވާ ބޭނުންވާ ކަމުގައި ވެސް އ.ދ.އިން ބުނެއެވެ.
އެއީ ތުރުކީވިލާތުގައި ތިބި 226,000 އަންހެނުންނާއި ސޫރިޔާގައި ދިރިއުޅޭ 130,000 އަންހެނުންނެވެ. މީގެ ތެރެއިން 38,000 އެއްހާ މީހުން ކުރިއަށް އޮތް މަސް ދުވަހުގެ ތެރޭގައި ވިހާނެ ކަމަށާއި، މީގެ ތެރެއިން ގިނަ މީހުން މި ވަގުތު ދިރިއުޅެމުން ދަނީ ވަގުތީ ހިޔާތަކުގައި ވަރަށް ނިކަމެތި ހާލުގައި. ކަމުގައި ވެސް އޮފިޝަލުން ވިދާޅުވެއެވެ.
12 ވަރަކަށް އަހަރުވީ ދާޚިލީ ހަނގުރާމައިގައި ހާލުގައި ޖެހިފައިވާ ސޫރިޔާ ރައްޔިތުންގެ ތެރެއިން 4,525 މީހުން ވަނީ ފެބުރުވަރީ 6ގެ ބިންހެލުމުގައި މަރުވެފައެވެ. މީގެ ތެރޭގައި އެ ޤައުމުގެ ސަރުކާރުގެ ބާރުގެ ދަށުގައި އޮތް ސަރަޙައްދުތަކުން މަރުވި 1,414 މީހުން ހިމެނެއެވެ. ބިންހެލުމުގައި އެންމެ ބޮޑަށް ގެއްލުންވެފައި ވަނީ އިދިކޮޅު ހަނގުރާމަވެރި ޖަމާޢަތްތަކުގެ ބާރުގެ ދަށުގައިވާ ސަރަޙައްދުތަކަށެވެ.
އެ ސަރަޙައްދުތަކުގައި އިންސާނީ އެހީއަށް ބޭނުންވެފައިވާ މީހުންނަށް އެހީގެ ސާމާނު ފޯރުކޮށްދިނުމަށް އ.ދ.އިން މަސައްކަތް ކުރަމުންދާއިރު، މިހާތަނަށް 197 ލޮރީގެ ސާމާނު އެ ސަރަޙައްދަށް ވަނީ ފޮނުވާފައެވެ. އެ ތަކެތި އެތެރެކޮށްފައި ވަނީ ތުރުކީއާއި ސޫރިޔާ ގުޅޭ ސަރަޙައްދީ ރޮނގު ހުރަސްކޮށެވެ.