އިދިކޮޅު މުޒާހަރާތަކުގައި ބޭއަދަބީ ބަސް ބޭނުންކޮށް، 18 އަހަރު ނުފުރޭ ކުއްޖަކު ބޭނުންކުރި: އެޗްއާރްސީއެމް

އިދިކޮޅު ޕީ.ޕީ.އެމް/ޕީ.އެން.ސީ ކޯލިޝަނުން މާލެއާއި އަތޮޅުތެރޭގައި ކުރިއަށް ގެންދާ ހަރަކާތްތަކުގައި އެއްވެ އުޅުމުގެ މިނިވަންކަމާއި ޚިޔާލުފާޅުކުރުމުގެ މިނިވަންކަމާއި ޚިލާފްވާފަދަ ކަންކަން ފާހަގަވެފައިވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އެޗްއާރްސީއެމުން ހާމަކުރައްވައިފިއެވެ.

އެޗްއާރްސީއެމުން ނެރުނު ނޫސް ބަޔާނުގައިވަނީ ޑިސެމްބަރު މަހުގެ 25 ވަނަ ދުވަހުން ފެށިގެން ޕީ.ޕީ.އެމް/ޕީ.އެން.ސީ ކޯލިޝަނުން މާލެއާއި އަތޮޅުތެރޭގެ ބައެއް ރަށްރަށުގައި ސިލްސިލާކޮށް ކުރިއަށްގެންދާ ހަރަކާތްތައް ކޮމިޝަނުން ވަރަށް ގާތުން މޮނީޓަރ ކުރަމުންދާ ކަމަށެވެ. އެގޮތުން މާލެއާއި އަތޮޅުތެރޭގައި ކުރިއަށްގެންދިޔަ 49 ހަރަކާތެއް ކޮމިޝަނުން މޮނީޓަރކޮށްފައިވާ ކަމަށެވެ.

ކޮމިޝަނުން މިހަރަކާތްތައް މޮނިޓަރ ކުރުމުގެ ތެރޭގައި މުޒާހަރާގެ ބައިވެރިންގެ ފަރާތުންވެސް އެއްވެ އުޅުމުގެ މިނިވަންކަމާއި ޚިޔާލުފާޅުކުރުމުގެ މިނިވަންކަމާ ޚިލާފުވާ ފަދަ ކަންކަން ކޮށްފައިވާކަން ފާހަގަކުރެވިފައިވާ ކަމަށް އެޗްއާރްސީއެމުން ވިދާޅުވެއެވެ. އެގޮތުން، މަގުމަތީގެ އަދަބުތަކާ ޚިލާފުވާގޮތަށް ނުވަތަ އާންމުންނަށް އުނދަގޫވާ ފަދަ ގޮތަށް ޓްރެފިކް ބްލޮކްކުރުމާއި ބޭއަދަބީ ބަސްތަކާއި ޝިއާރުތައް ބޭނުންކުރުން ފާހަގަކުރެވިފައިވެއެވެ. އަދި ދިވެހި ފުލުހުންގެ މަސައްކަތަށް ހުރަސްއެޅޭ ފަދަ ގޮތްގޮތަށް މުޒާހަރާގެ ބައިވެރިންގެ އަމަލުތައް ހުރިކަމަށާއި، މުޒާހަރާގެ ބައިވެރިންގެ ތެރޭގައި 18 އަހަރު ނުފުރޭ ކުޑަކުއްޖަކު ބައިވެރިކޮށްފައިވާކަން ފާހަގަކުރެވިފައިވާ ކަމަށްވެސް ކޮމިޝަނުން ވިދާޅުވެއެވެ.

މީގެ އިތުރުން އާންމު ރައްޔިތުންގެ ފަރާތުންވެސް މުޒާހަރާގެ ބައިވެރިންގެ ގަޔަށް ފެން ޖެހުމާއި، ސައިކަލެއްގައި ގޮސް ވަންނަން އުޅުންފަދަ ނޭދެވޭ އަދި ގެއްލުން ލިބިދާނެފަދަ އަމަލުތަކެއްކޮށްފައިވާކަން ފާހަގަކުރެވިފައިވާ ކަމަށްވެސް އެޗްއާރްސިއެމުން ވިދާޅުވެއެވެ.

ބައެއް ހާލަތްތަކުގައި މުޒާހަރާ ރޫޅާލުމުގައި ފުލުހުން ބާރުގެ ބޭނުންކުރާކަމާއި އަދި ބައެއް ހާލަތްތަކުގައި އެއްވުން ރޫޅާލުމުގެ ކުރިން އިންޒާރުދީފައިނުވާކަމާއި އިންޒާރުދިނުމަކާނުލާ ޕެޕާ ސްޕަރޭ ޖަހާފައިވާކަން ވެސް ފާހަގަކުރެވިފައިވާ ކަމަށް އެޗްއާރްސިއެމްގެ ބަޔާނުގައިވެއެވެ.

އަދި ކޮމިޝަނަށް ފާހަގަކުރެވުނު މިކަންތައްތަކާއި ކޮމިޝަނަށް ހުށަހަޅާފައިވާ މައްސަލަތައް ބަލަމުންދާކަމަށްވެސް އެޗްއާރްސީއެމުން ވިދާޅުވެއެވެ.

އެޗްއާރްސީއެމްގެ ބަޔާނުގައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން އެއްވެ އުޅުމުގެ މިނިވަންކަމުގެ ހައްގު ރައްޔިތުންނަށް ދީފައިވާއިރު، އެހައްގުގެ ބޭނުން ކުރުމުގައި އެއްބަޔަކު އަނެއްބައެއްގެ ހައްގަށް އަރައިނުގަނެ ހައްގުތަކަށް އިހުތިރާމްކުރުމަކީ މުޖުތަމައުގެ
ހަމަޖެހުމަށްޓަކައި މުހިންމުކަމެއް ކަމަށެވެ.

އެޗްއާރްސީއެމުންވަނީ މުޒާހަރާގައި ހަރަކާތްތެރިވާ ނޫސްވެރިންވެސް މުޒާހަރާތައް އޮބްޒަރވް ކުރުމުގައި އަމަލުކުރަންޖެހޭ މިންގަނޑުތައް ހިފަހައްޓައި ޒިންމާދާރުކަމާއެކު އާންމުންނަށް މައުލޫމާތު ފޯރުކޮށްދިނުމަށް އިލްތިމާސްކުރައްވާފައެވެ.

އަދި މުޒާހަރާ ރޫޅާލުމުގައި ޤާނޫނާއި ޤަވާޢިދުގެ ތެރެއިން ފުލުހުންގެ އަމަލުތައް ބެހެއްޓުމަށް ދިވެހި ފުލުހުންގެ ޚިދުމަތަށް އިލްތިމާސްކުރައްވާފައެވެ. އަދި އެއްވެއުޅުމުގެ ޤާނޫނުން މަނާ ކުރާ ކަންތައްތައް ކުރުމުން ދުރުހެލިވުމަށް މުޒާހަރާގެ ބައިވެރިންނާއި، ދިފާޢީ ބާރުތަކާއި އަދި އާންމުންނަށްވެސް އެޗްއާރްސީއެމުންވަނީ އިލްތިމާސްކުރައްވާފައެވެ.