ބާރުގަދަ ތޫފާނެއް ކަމުގައިވާ ގެބްރިއޭލް ނިއު ޒިލެންޑުގެ އުތުރުގެ ސަރަޙައްދުތަކަށް އެރުމާ ގުޅިގެން ހިނގި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކުގައި މަރުވި މީހުންގެ ޢަދަދު 11 އަށް އަރައިފިއެވެ. މި ތޫފާނާ އެކު، އެ ޤައުމުގެ އުތުރުގައި އޮންނަ ނޯތް އައިލެންޑުގެ ރަށްތަކަށް ވަނީ ބޮޑެތި ގެއްލުންތަކެއް ލިބިފައެވެ.
ތޫފާން ގެބްރިއޭލް ނިއު ޒިލެންޑުގެ އުތުރުގެ ސަރަޙައްދުތަކަށް އަރާފައި ވަނީ ޖަނަވަރީ 12 ވަނަ ދުވަހުއެވެ. މި ތޫފާނުގެ އަސަރު އެންމެ ބޮޑަށް ކޮށްފައި ވަނީ ނޯތް އައިލެންޑުގެ އުތުރާއި އިރުމަތީ އައްސޭރިފަށުގެ ސަރަޙައްދުތަކަށެވެ. އެންމެ ބޮޑަށް ގެއްލުން ލިބިފައިވާ ރަށްތަކުގެ ތެރޭގައި އޮކްލެންޑާއި ހޯކްސް ބޭ ހިމެނެއެވެ. މި ތޫފާނާ ގުޅިގެން ނޯތް އައިލެންޑުގައި ވަނީ ކުއްލި ހާލަތު އިޢުލާނުކޮށްފައެވެ.
މި ތޫފާނާ ގުޅިގެން ނޯތް އައިލެންޑުގެ ބޮޑު ސަރަޙައްދެއްގައި ފެންބޮޑުވެފައިވާއިރު، އެތަކެއް ހާސް ބަޔަކު ގެއްލިފައިވާ ކަމަށް އެ ޤައުމުގެ އޮފިޝަލުން ވިދާޅުވެއެވެ. މިއީ، ފާއިތުވި ޤަރުނެއްހާ ދުވަހުގެ ތެރޭގައި އެ ޤައުމަށް ކުރިމަތިވި އެންމެ ބޮޑު ޤުދުރަތީ ކާރިސާ ކަމުގައި ބޮޑުވަޒީރު ކްރިސް ހިޕްކިންސް ވިދާޅުވިއެވެ.
އެންމެ ފަހުން މަރުވެފައިވާ ބަޔަކު ފެނިފައި ވަނީ، ތޫފާނުގެ ސަބަބުން އެންމެ ބޮޑަށް ގެއްލުން ލިބުނު ހޯކްސް ބޭއިންނެވެ. އަދި، 5,600 އަށްވުރެ ގިނަ މީހުންގެ ޚަބަރެއް އަދިވެސް ނުވާ ކަމަށާއި، އެ މީހުންނާ ގުޅުމަށް މަސައްކަތް ކުރަމުންދާ ކަމުގައި ނޯތް އައިލެންޑުގެ ފުލުހުން ބުންޏެވެ.
ތޫފާނާ ގުޅިގެން ލިބިފައިވާ ގެއްލުންތައް ދެނެގަތުމަށް އޮކްލެންޑުގެ އޮފިޝަލުން މިހާރު ދަނީ މަސައްކަތް ކުރަމުންނެވެ. އަދި، ފެންބޮޑުވުމާ ގުޅިގެން ގެދޮރުގައި ތާށިވެފައިވާ މީހުން ސަލާމަތް ކުރުމަށް އެ ޤައުމުގެ އަސްކަރިއްޔާއިން ދަނީ ހެލިކޮޕްޓަރުތައް ބޭނުންކޮށްގެން މަސައްކަތް ކުރަމުންނެވެ. އަދި، ހާލުގައި ޖެހިފައިވާ މީހުން ތިބި ސަރަޙައްދުތަކަށް ކާބޯތަކެއްޗާއި އެހީގެ ސާމާނު ވައިގެ މަގުން ފޯރުކޮށްދޭން މަސައްކަތް ކުރަމުންނެވެ.
ތޫފާނުގައި ކަރަންޓު ވިއުގައަށް ލިބުނު ގެއްލުންތަކުގެ ސަބަބުން ކަރަންޓުގެ ޚިދުމަތް މެދުކެނޑިފައިވާ ގެދޮރާއި ވިޔަފާރިތަކުގެ ޢަދަދު 62,000 އަށް އަރާއިރު، އޭގެ ތެރެއިން 40,000 ޢިމާރާތް ހުރީ ހޯކްސް ބޭގައެވެ. އެ ތަންތަނަށް ކަރަންޓުގެ ޚިދުމަތް އަލުން ގުޅައިދިނުމަށް ވެސް އޮފިޝަލުން ދަނީ މަސައްކަތް ކުރަމުންނެވެ. ހޯކްސް ބޭއަކީ 170,000 މީހުން ދިރިއުޅޭ ރަށެކެވެ.
ހާލުގައި ޖެހިފައިވާ މީހުން ސަލާމަތް ކުރުމަށް ހުއްޓުމެއް ނެތި އޮފިޝަލުން މަސައްކަތް ކުރަމުންދާއިރު، ތޫފާނާ ގުޅިގެން ގެއްލުން ލިބިފައިވާ ސަރަޙައްދުތަކަށް އިތުރު ސިފައިންނާއި ފުލުހުން ފޮނުވުމަށް ނިއު ޒުލެންޑު ސަރުކާރުން ދަނީ މަސައްކަތް ކުރަމުންނެވެ.