ތިލަފުށިން ބިން ވިއްކާނީ ސަރުކާރުގެ ފޮރިން ޑިރެކްޓް އިންވެސްޓްމަންޓް ޕޮލިސީ، އެފްޑީއައިގެ ދަށުން ހުއްދަ އޮތް، އަދި ރާއްޖޭގައި ރަޖިސްޓްރީކޮށްފައިވާ ކުންފުނިތަކަށްކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ބުނެފިއެވެ.
ރާއްޖޭގައި ސިނާއީ މަސައްކަތްތަކަށް ހުރި ދަތިތަކަށް ހައްލެއް ހޯދައިދިނުމަށާއި ގްރޭޓަރ މާލެ ރީޖަންގެ އިންޑަސްޓްރިއަލް ހަބެއްގެ ގޮތުގައި ތިލަފުށި ފޭސް 2 ތަރައްޤީކުރުމުގެ މަސައްކަތް އެޗްޑީސީން އަންނަނީ ކުރަމުންނެވެ. މިގޮތުން ތިލަފުށިން 4.3 ހެކްޓަރުގެ ބިން ބީލަމުގެ އުސޫލުން ދޫކުރުމަށް ވަނީ ނިންމާފައެވެ.
އެޗްޑީސީން ނެރުނު ބަޔާނެއްގައި ބުނީ ތިލަފުށިން ބީލަމުގެ އުސޫލުން ސިނާއީ ބޭނުމަށް ވިއްކާނީ ސަރުކާރުގެ ފޮރިން ޑިރެކްޓް އިންވެސްޓްމަންޓް ޕޮލިސީ (އެފްޑީއައި) ގެ ދަށުން ހުއްދަ ދީފައި އޮތް، އަދި ރާއްޖޭގައި ރަޖިސްޓްރީކޮށްފައިވާ ކުންފުނިތަކަށްކަމަށެވެ. އަދި ޕްރޮޖެކްޓް ބޭސިސްގައި ކޮންސްޓްރަކްޝަން މަޝްރޫއުތައް ހިންގުމަށް ހުއްދަދެވިފައިވާ ކުންފުނިތަކަށް އެ ބީލަމުގައި ބައިވެރި ނުވެވޭނެކަމަށްވެސް ބަޔާނުގައިވެއެވެ.
އެޗްޑީސީން ބުނީ ބިން ކުއްޔަށް ނެގުމަށް ހުށަހަޅާ ބޭރުގެ ކުންފުނިތަކުން ބިން ބޭނުންކުރުމަށް ހުށަހަޅާފައިވާ އިންޑަސްޓްރިއަލް ބޭނުންތަކަކީ އެ ފަރާތްތަކަށް އެފްޑީއައި ޕޮލިސީގެ ދަށުން ހުއްދަދެވިފައިވާ ވިޔަފާރި ބޭނުންތަކެއްތޯ އިކޮނޮމިކް މިނިސްޓްރީ ބަލާނެކަމަށެވެ.
ތިލަފުށިން ބީލަމުގެ އުސޫލުން ސިނާއީ ބޭނުމަށް ބިން ގަތުމުގެ ފުރުސަތު ހުޅުވާލާނެކަން އެޗްޑީސީން އިއުލާންކުރީ މިމަހުގެ 7 ވަނަ ދުވަހުއެވެ.
އެޗްޑީސީން ބުނީ ތިލަފުށިން ވިއްކާ ބިންތަކުގެ ތެރެއިން 90 އިންސައްތަ ބިން ވިއްކާނީ ދިވެހިންނަށްކަމަށެވެ. އަދި ބޭރު މީހުންނަށް ވިއްކާނީ 10 އިންސައްތަކަމަށްވެސް އެޗްޑީސީން ބުނެއެވެ.