ގެދޮރު ފަދަ ތަންތަން ކުއްޔަށް ދިނުމުގެ މުޢާމަލާތްތަކުގައި އޮޅުވާލައިގެން ބޮޑެތި ޢަދަދުތަކުން ފައިސާ ހޯދުމުގެ މައްސަލަތައް ހުށަހެޅޭތީ އެކަމަށް ސަމާލުވުމަށް ޕްރޮސެކިއުޓަރ ޖެނެރަލްގެ އޮފީހުން އިލްތިމާސްކޮށްފިއެވެ.
ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ ގެދޮރު ފަދަ ތަންތަން ކުއްޔަށް ދިނުމުގެ މުޢާމަލާތްތަކުގައި ޞައްޙަނޫން ލިޔުން އުފައްދައި ކުއްޔަށް ހިފާ ފަރާތަށް އޮޅުވާލައިގެން ބޮޑެތި ޢަދަދުތަކުން ފައިސާ ހޯދުމުގެ މައްސަލަތައް ހުށަހެޅެމުންދާކަމަށެވެ.
ޕީޖީ އޮފީހުން ވިދާޅުވީ ގޭގެ ވެރިފަރާތުގެ އަތުން ތަނެއް ހުއްޔަށް ނެގުމަށްފަހު އެތަނުގެ އެއްބަސްވުމަށް ބަދަލު ގެނެސްގެނެސް އެހެން މީހުންނަށް އެތަން ކުއްޔަށް ދިނުމުގެ ނަމުގައި ބޮޑެތި އަދަދުތަކުން ފައިސާ ނަގަމުންދާކަމަށެވެ. އަދި މިފަދަ ތަންތަނުގެ ހަގީގަތް އެނގޭއިރު ބައެއް ފަރާތްތަކުގެ އަތުން ލައްކައިން ފައިސާ އަތުލާފައި ހުންނަކަން ފާހަގަވެފައިވާކަމަށް ޕީޖީން ބުނެއެވެ.
ގިނަ ފައިސާ ހިމެނޭ ކުލީގެ މުޢާމަލާތްތައް ހިންގެވުމުގައި ޤާނޫނީ ވަކީލެއްގެ އެހީތެރިކަން ހޯއްދަވާ. އަދި ތަނުގެ ވެރިފަރާތް ކަށަވަރު ކުރެއްވުން މުހިންމު. 2/2 pic.twitter.com/3C6iLi3bwW
— PGOMV (@PGO_MV) February 18, 2023
ޕީޖީ އޮފީހުން ވިދާޅުވީ މިފަދަ އޮޅުވާލުންތަކުން ސަލާމަތްވުމަށް އެޅިދާނެ ފިޔަވަޅުތަކެއް ހުންނަކަމަށެވެ. އެގޮތުން ކުއްޔަށް ދޫކުރާ މީހާއަކީ ހަގީގަތުގައިވެސް އެބުނާ މުއްދަތަކަށް އެތަން ކުއްޔަށް ދެވޭނެ މީހެއްކަން ކަށަވަރު ކުރުމާއި ޝައްކުވާ ހާލަތްތަކުގައި ގޭގެ އަސްލު ވެރިފަރާތާއި ބައްދަލުކޮށް، ކަންކަން އޮޅުން ފިލުވުން ހިމެނެއެވެ.
މީގެއިތުރުން ގިނަ ފައިސާ ހިމެނޭ ކުލީގެ މުޢާމަލާތްތައް ހިންގެވުމުގައި ޤާނޫނީ ވަކީލެއްގެ އެހީތެރިކަން ހޯއްދެވުމަށްވެސް ޕީޖީ އޮފީހުން އިލްތިމާސްކުރައްވައެވެ.
ތަންތަން ކުއްޔަށް ހިފުމުގެ މުއާމަލާތްތަކުގައި ސަމާލުވުމަށް ޕީޖީން އިލްތިމާސްކޮށްފައިވާއިރު، މިފަހަކަށް އައިސް މިފަދަ މައްސަލަތައް ދަނީ އިތުރުވަމުންކަން ފާހަގަކޮށްލެވެއެވެ.