ފެބްރުއަރީ 6 ވަނަ ދުވަހު އައި ބާރުގަދަ ބިންހެލުމުގައި ތުރުކީވިލާތާއި ސޫރިޔާގައި މަރުވި މީހުންގެ ޢަދަދު 46,000 އަށްވުރެ މައްޗަށް އުފުލިފައިވާއިރު، އެ ޢަދަދު ކުރިއަށް އޮތް ދުވަސްތަކުގައި އިތުރުވާނެ ކަމަށް ބެލެވޭ ކަމުގައި އެ ދެ ޤައުމުން ހާމަކޮށްފިއެވެ. ބިންހެލުމުގައި ތުރުކީވިލާތުގައި އެކަނިވެސް 345,000 އަށްވުރެ ގިނަ އެޕާޓްމަންޓް ވަނީ ހަލާކުވެފައެވެ. އަދި، ގިނަ ޢަދަދެއްގެ ބަޔެއްގެ ހަށިތައް އަދިވެސް ނުފެނެއެވެ.
ބިންހެލުމުގައި އެތަކެއް ހާސް ބަޔަކު މަގުމަތިވެ، ހާލުގައި ޖެހިފައިވާއިރު، ސޫރިޔާގެ ރައްޔިތުންގެ ހާލަތު ވަރަށް ދެރަ ކަމުގައި ދުނިޔޭގެ ކާބޯތަކެއްޗާ ބެހޭ ޕުރޮގުރާމު (ޑަބްލިޔު.އެފް.ޕީ)އިން ބުނެއެވެ. ބިންހެލުމުގައި ސޫރިޔާގައި އެންމެ ބޮޑަށް ގެއްލުން ލިބިފައި ވަނީ އެ ޤައުމުގައި އުތުރުގައި އޮންނަ، ސަރުކާރާ ދެކޮޅު ހަނގުރާމަވެރިންގެ އަތްދަށުގައި އޮތް ސަރަޙައްދުތަކަށެވެ.
އެ ސަރަޙައްދުގައި ހާލުގައި ޖެހިފައިވާ އެތަކެއް މިލިޔަން ރައްޔިތުންނަށް ކާބޯތަކެއްޗާއި އިންސާނީ އެހީ ފޯރުކޮށްދޭން ކުރަމުންދާ މަސައްކަތްތަކަށް ހުރަސް ނޭޅުމަށް ޑަބްލިޔު.އެފް.ޕީ.ގެ އިތުރުން ބައިނަލްއަޤުވާމީ އެހެން ޖަމުޢިއްޔާ ޖަމާޢަތްތަކުން ދަނީ ބާރު އަޅަމުންނެވެ. ތުރުކީވިލާތާއި ސޫރިޔާގައި ސުންނާފަތިވެފައިވާ އެތަކެއް ހާސް ޢިމާރާތުގެ ދަށުވެފައިވާ ކަމަށް ބެލެވޭ އެތަކެއް ހާސް މީހުންގެ ހަށިތައް ހޯދުމަށް އޮފިޝަލުން ދަނީ ހުއްޓުމެއް ނެތި މަސައްކަތް ކުރަމުންނެވެ.
ޢިމާރާތްތަކުން ދަށުން ދިރިތިއްބާ ގިނަ ޢަދަދެއްގެ ބަޔަކު ސަލާމަތްކުރެވޭނެ ކަމުގެ އުންމީދު ފަނޑުވެފައިވީ ނަމަވެސް، އަދިވެސް ބައެއް މީހުން ދަނީ ފެންނަމުންނެވެ. ބިންހެލުމަށް 12 ދުވަސް ފަހުން ވެސް ޢިމާރާތްތަކެއްގެ ދަށުން ދިރިތިއްބާ ބަޔަކު ވަނީ ސަލާމަތް ކުރެވިފައެވެ.
ތުރުކީގެ ދެކުނުގައިވާ އަންތަކްޔާގެ ޢިމާރާތެއްގެ ދަށުން އެއް ޢާއިލާއެއްގެ ފަސް މެންބަރުން ވަނީ ދިރިތިއްބާ ފެނިފައެވެ. އެއީ، ސޫރިޔާއަށް ނިސްބަތްވާ ދެމަފިރިންނާއި ތިން ކުދިންނެވެ. ނަމަވެސް، އެންމެ ކުޑަކުއްޖާއަށް ފަރުވާދެމުން ދަނިކޮށް އެ ކުއްޖާ ވަނީ މަރުވެފައެވެ. އަދި، ބޮޑަށް ދެ ކުދިންގެ ފުރާނަ ވެސް ސަލާމަތް ކުރެވޭ ގޮތެއް ނުވިއެވެ. އެ ޢާއިލާއިން ސަލާމަތްވީ ދެމަފިރިންނާއި އެންމެ ކުއްޖެކެވެ.
ބިންހެލުމާ ގުޅިގެން ސޫރިޔާގެ އުތުރުގެ ސަރަޙައްދުތަކުގައި ގެދޮރުނެތި ހާލުގައި ޖެހިފައިވާ މީހުންގެ ޢަދަދު 5.3 މިލިޔަނަށްވުރެ އިތުރުވާނެ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އަންދާޒާ ކުރާއިރު، އެ ޤައުމުގައި ކާބޯތަކެއްޗާއި އިންސާނީ އެހީއަށް ޖެހިފައިވާ މީހުންނަށް އެހީގެ ސާމާނު ފޯރުކޮށްދޭން އ.ދ.އިން އިސްނަގައިގެން ދަނީ މަސައްކަތް ކުރަމުންނެވެ. އެ ސަރަޙައްދުތަކަށް އެހީގެ ސާމާނު ހިފައިގެން މިހާތަނަށް 143 ޓްރަކް ވަނީ އެތެރެވެފައެވެ.
އެ އުޅަނދު ފަހަރު ސޫރިޔާއަށް އެތެރެވީ، ތުރުކީވިލާތާ ގުޅޭ ބާބް އަލް-ޙަވާ އަދި ބާބް އަލް-ސަލާމާ ސަރަޙައްދީ ރޮނގު ހުރަސްކޮށެވެ. "ސޫރިޔާގެ އުތުރުގައި ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމުގެ މަސައްކަތް ވަނީ ފެށިފައި. އަދި، ކުރިއަށް އޮތް ހަފުތާތަކުގެ ތެރޭގައި އެހީ ހިފައިގެން އިތުރު ޓްރަކްތައް އެ ސަރަޙައްދަށް ދަތުރުކުރާނެ،" އ.ދ.ގެ އިންސާނީ އެހީއާ ބެހޭ އިދާރާ (އޯ.ސީ.އެޗް.އޭ)ގެ ތަރުޖަމާނު ޔެންސް ލާރކް ވިދާޅުވިއެވެ.
ސޫރިޔާގައި ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމުގައި އިސްކޮށް ހަރަކާތްތެރިވަމުން ދަނީ އ.ދ.ގެ ހިޖުރަކުރާ މީހުންނާ ބެހޭ އިދާރާއާއި، އ.ދ.ގެ ރެފިޔުޖީންނާ ބެހޭ އިދާރާ (ޔޫ.އެން.އެޗް.ސީ.އާރް)އާއި، އާބާދީއާބެހޭ އިދާރާއާއި، ކުޑަކުދިންނާ ބެހޭ ފަންޑު (ޔުނިސެފް)ގެ އިތުރުން ޑަބްލިޔު.އެފް.ޕީ.އިންނެވެ. ސޫރިޔާއަށް ފޮނުވާފައިވާ އެހީގެ ސާމާނުގެ ތެރޭގައި ހިމެނެނީ ވަގުތީ ހިޔާވަހިކަން ފޯރުކޮށްދިނުމަށް ބޭނުންވާނެ ޓެންޓާއި، ގޮދަޑިޔާއި، ރަޖަޔާއި، އަންނައުނާއި، ކޮލެރާއަށް ޓެސްޓުކުރަން ބޭނުންކުރާ ކިޓާއި، ބޭސްފަރުވާގެ ސާމާނެވެ.