ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމަށް ހަދާފައިވާ އެއްބަސްވުމުގެ މުއްދަތު ހަމަވާން ކައިރިވެފައިވާއިރު، އެ އެއްބަސްވުމުގެ ކަންކަން އޮތީ ނާޒުކު ހާލަތެއްގައި ކަމުގައި އ.ދ.އިން ބުނެފިއެވެ. ރަޝިޔާއިން ޔޫކްރެއިނަށް އަރައި ފެށި ހަނގުރާމައާ ގުޅިގެން ހުއްޓިފައި އޮތް ގޮވާން އެކްސްޕޯޓުކުރުމުގެ މަސައްކަތް އަލުން ފަށާފައި ވަނީ 2022 ޖުލައި މަހު އ.ދ.އާއި ތުރުކީވިލާތުން އިސްނަގައިގެން ހެދި އެއްބަސްވުމެއްގެ ދަށުންނެވެ.
އެ އެއްބަސްވުމުގެ މުއްދަތު 2022 ނޮވެންބަރު ވަނީ ހަމަވެފައެވެ. އަދި، މަޝްވަރާތަކަށް ފަހު ރަޝިޔާއާއި ޔޫކްރެއިނުން ވަނީ އެއްބަސްވުމުގެ މުއްދަތު މި އަހަރުގެ މާރިޗު މަހާ ހަމައަށް އިތުރުކޮށްފައެވެ. ދުނިޔޭގެ އެކި ކަންކޮޅުތަކުގައި ބަނޑަށް ޖެހިފައިވާ މީހުންގެ ފުރާނަ ސަލާމަތް ކުރުމަށް، މި އެއްބަސްވުމުގެ މުއްދަތު އަލުން އިތުރުކުރުން މުހިންމު ކަމުގައި އ.ދ.އިން ބުނެއެވެ.
"އެއްބަސްވުމުގެ މުއްދަތު އިތުރުކުރަން މަސައްކަތް ކުރަމުން ދިޔަ ނަމަވެސް، އެ މަސައްކަތްތައް އޮތީ ނާޒުކު ހާލަތެއްގައި. ދުނިޔޭގެ އެކި ކަންކޮޅުތަކުގައި ބަނޑަށް ޖެހިފައިވާ މީހުންގެ ބަނޑުފުރާނަ މުއްތިކޮށްދޭން އެއްބަސްވުމުގެ މުއްދަތު އިތުރުކުރުން ނޫން ގޮތެއް ނެތް،" އ.ދ.ގެ އެހީއާ ބެހޭ އިދާރާގެ އިސްވެރިޔާ މާޓިން ގްރިފިތްސް ވިދާޅުވިއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ފެށި ހަނގުރާމައިގެ ކުރިން ޔޫކްރެއިނަކީ ދުނިޔޭގެ ބާޒާރަށް އެންމެ ގިނަ ޢަދަދަކަށް ގޮވާމުގެ ބާވަތްތައް އެކްސްޕޯޓު ކުރަމުން ދިޔަ ޤައުމެވެ. ނަމަވެސް، ހަނގުރާމައާ ގުޅިގެން އެ ކަމަށް ހުއްޓުންއަރައި، ދުނިޔޭގެ އެކި ކަންކޮޅުތަކުގައި އެތަކެއް މިލިޔަން މީހުންނަށް ކާބޯތަކެއްޗަށް ޖެހުނެވެ. އަދި، ކާބޯތަކެތީގެ އަގުތައް އިންތިހާއަށް އުފުލިގެން ދިޔައެވެ.
ހަނގުރާމަ ފެށުމާ ގުޅިގެން ޔޫކްރެއިނުގެ ބަނދަރުތަކުގައި 20 މިލިޔަން ޓަނުގެ ގޮވާމުގެ ބާވަތްތައް ތާށިވިއެވެ. ނަމަވެސް، މިދިޔަ އަހަރުގެ ޖުލައި މަހު އެކުލަވައިލި އެއްބަސްވުމުގެ ދަށުން މި އަހަރުގެ މިހާތަނަށް 20 މިލިޔަނަށްވުރެ ގިނަ ޓަނުގެ ގޮވާމުގެ ބާވަތްތައް ޔޫކްރެއިނުން ބޭރުކޮށްފައިވާ ކަމުގައި އ.ދ.އިން ބުނެއެވެ. "މި ކަމަށް ހުއްޓުމެއް އަންނަންވީ އެއްވެސް ސަބަބެއް ނެތް. އެތައް ޤައުމެއްގައި ކާބޯތަކެތީގެ ރައްކާތެރިކަން ކަށަވަރު ކުރެވޭނީ އެ ކަން ކޮށްގެން،" ގްރިފިތްސް ވިދާޅުވިއެވެ.
އެއްބަސްވުމުގައިވާ ގޮތުން، ރަޝިޔާގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމަށް ވެސް ފުރުޞަތު ދޭން ޖެހޭނެއެވެ. އަދި، ހަނގުރާމައާ ގުޅިގެން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ އަސަރު ގޮވާން އެކްސްޕޯޓު ކުރުމަށް ކޮށްގެން ނުވާނެއެވެ. ނަމަވެސް، ރަޝިޔާއިން ގޮވާން އެކްސްޕޯޓު ކުރުމަށް ހުޅަނގުން ހުރަސްއަޅަމުންދާ ކަމުގައި ރަޝިޔާއިން ދަނީ ތުހުމަތު ކުރަމުންނެވެ. އަދި، މި ކަމުގެ ސަބަބުން އެއްބަސްވުމަށް ހުރަސް އެޅިދާނެ ކަމަށް މަސްރަޙު ދިރާސާ ކުރާ ފަރާތްތަކުން ޤަބޫލުކުރެއެވެ.
2022 ނޮވެންބަރު މަހު އެއްބަސްވުމުގެ މުއްދަތު އިތުރުކުރަން ހުށަހެޅުމުން ރަޝިޔާއިން ފުރަތަމަ ވަނީ އެ ކަމަށް ދެކޮޅު ހަދާފައެވެ. އަދި، މި ފަހަރު ވެސް ރަޝިޔާއިން އެ ގޮތަށް އަމަލުކުރާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.