ސުލްޙައާއި ސަލާމަތާ ބެހޭ ދުނިޔޭގެ އެންމެ ބޮޑު މަހާސިންތާ ކަމުގައިވާ މިޔުނިކް ސެކިޔުރިޓީ ކޮންފަރެންސް، ރަޝިޔާގެ ބައިވެރިވުމާ ނުލައި ޖަރުމަނުވިލާތުގެ މިޔުނިކްގައި ފަށައިފިއެވެ. 1963 ވަނަ އަހަރުން ފެށިގެން އަހަރަކު އެއް ފަހަރު ބާއްވާ މި މަހާސިންތާގެ މައިގަނޑު ބޭނުމަކީ، ދުނިޔޭގެ ސުލްޙަމަސަލަސް ކަމަށް އޮތް ހުރަސްތަކާއި ނުރައްކާތަކާ މެދު މަޝްވަރާކޮށް، އެ ކަންކަން ހައްލުކުރަން މަސައްކަތް ކުރުމެވެ.
މި އަހަރުގެ ބައްދަލުވުމުގެ އެޖެންޑާގެ އެންމެ ކުރީގައި އޮތީ ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގެ މައްސަލައެވެ. ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ މީގެ އަހަރެއްހާ ދުވަސް ކުރިން، 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ، މި ބައްދަލުވުމުގައި ވީޑިޔޯ ލިންކް މެދުވެރިކޮށް ތަޤުރީރު ކުރައްވާފައެވެ.
ޒެލެންސްކީ ވިދާޅުވީ، ހަނގުރާމައަށް އެއް އަހަރު ފުރުމާ ގާތްވެފައިވާ މި ދަނޑިވަޅުގައި، ރަޝިޔާގެ ހަމަލާތައް އިތުރަށް ވަރުގަދަ ކުރަމުންދާ ކަމުގައެވެ. އަދި، ޔޫކްރެއިނުގެ އިތުރު ސަރަޙައްދުތަކަށް އަތްގަދަ ކުރަން މަސައްކަތް ކުރަމުންދާ ކަމުގައެވެ. ޔޫކްރެއިނުގެ އިރުމަތީގައިވާ ދޮންބާސްގެ ލުހާންސްކާއި ޑޮނެޓްސްކުގެ ބޮޑު ބައެއްގެ އިތުރުން ދެކުނުގައިވާ ޒަޕޮރީޜިޔާއަށް ވެސް ރަޝިޔާ ސިފައިން ވަނީ އަތްގަދަކޮށްފައެވެ.
ރަޝިޔާއިން އަތްގަދަކޮށްފައިވާ ސަރަޙައްދުތަކުން އެ މީހުން ބޭލުވޭނީ، ޔޫކްރެއިން ސިފައިންނަށް އިތުރު ހަތިޔާރާއި އަސްކަރީ އެހީތެރިކަން ލިބިގެން ކަމުގައި ޒެލެންސްކީ ގެންދަވަނީ ވިދާޅުވަމުންނެވެ. އަދި، ނޭޓޯއިން އެ ޤައުމަށް ފޯރުކޮށްދޭން ވަޢުދުވެފައިވާ ބަރުހަތިޔާރާއި ހަނގުރާމަމަތީ ޓޭންކުތައް ފޮނުވުން އަވަސްކުރުމަށް އޭނާ ވަނީ މަހާސިންތާގެ ބައިވެރިންނަށް ގޮވައިލައްވާފައެވެ.
"ރަޝިޔާގެ އިސްތިޢުމާރީ ބާރާ ދެކޮޅަށް ހަނގުރާމަ ކުރުން ނޫން އިތުރު ގޮތެއް ޔޫކްރެއިނުގެ ރައްޔިތުންނަކަށް ނެތް. އެ ކަން ކުރެވޭނީ ހަތިޔާރު ލިބުން އަވަސްކޮށްގެން. ލަސްވާ ކޮންމެ ދުވަހަކީ، ގިނަ ޢަދަދެއްގެ ޔޫކްރެއިނުގެ ރައްޔިތުންގެ ފުރާނަ ގެއްލޭ ދުވަހެއް،" ޒެލެންސްކީ ވިދާޅުވިއެވެ.
މީގެ ކުރީ އަހަރުތަކުގައި ރަޝިޔާގެ ޚާރިޖީ ވަޒީރު ސަރްގޭ ލެވްރޮފް މި މަހާސިންތާގައި ބައިވެރިވެ ވަޑައިގަންނަވާފައިވީ ނަމަވެސް، މި އަހަރުގެ ބައްދަލުވުމަށް ރަޝިޔާއަށް ދަޢުވަތު ދީފައެއް ނުވެއެވެ. މި ބައްދަލުވުމުގައި ފަރަންސޭސިވިލާތާއި ޖަރުމަނުވިލާތުގެ އިސްވެރިންގެ އިތުރުން އެމެރިކާގެ ނައިބު ރައީސް ކަމަލާ ހެރިސްއާއި ޗައިނާގެ ސެންޓްރަލް ފޮރިން އެފެއާޒް ކޮމިޝަނުގެ އިސްވެރިޔާ ވޮންގް ޔީ އަދި ނޭޓޯގެ ސެކްރެޓަރީ ޖެނެރަލް ޔެންސް ސްޓޮލްޓެންބަރގް ބައިވެރިވެ ވަޑައިގަންނަވައެވެ.
މި ބައްދަލުވުމުގައި ވާހަކަފުޅު ދައްކަވަމުން ފަރަންސޭސި ރައީސް އެމަނުއެލް މެކްޚޯން ވަނީ، ޔޫކްރެއިނަށް އިތުރު އެހީތެރިކަން ފޯރުކޮށްދިނުމަށް ބައްދަލުވުމުގެ ބައިވެރިންނަށް ގޮވައިލައްވާފައެވެ. އަދި، ޖަރުމަނުގެ ޗާންސެލަރ އޯލާފް ޝޮލްޒް ވަނީ، އެ ޤައުމަށް ޓޭންކު ފަދަ ބަރުހަތިޔާރު ފޯރުކޮށްދިނުން އަވަސް ކުރުމަށް ނޭޓޯގެ ޤައުމުތަކުގެ އިސްވެރިންގެ ކިބައިން އެދިވަޑައިގަންނަވާފައެވެ.
ނޭޓޯގެ ޤައުމުތަކުން ދާދިފަހުން ވަނީ، ޔޫކްރެއިނަށް އެންމެ ފަހުގެ ޒަމާނީ ހަނގުރާމަމަތީ ޓޭންކުތައް ފޮނުވަން ވަޢުދުވެފައެވެ. މީގެ ތެރޭގައި އެމެރިކާގައި އުފައްދާ "އެބްރާމްސް" މަރުކާރުގެ ޓޭންކާއި، އިނގިރޭސިވިލާތުގައި އުފައްދާ "ޗެލެންޖަރ 2" މަރުކާގެ ޓޭންކުގެ އިތުރުން ޖަރުމަނުގައި އުފައްދާ "ލެޕަޑް 2" މަރުކާގެ ޓޭންކު ހިމެނެއެވެ.