ދެކުނު އެމެރިކާގެ ޤައުމެއް ކަމުގައިވާ ބޮލީވިޔާގައި ހަލުވިކަމާ އެކު ޑެންގީ ފެތުރި، މިހާތަނަށް 26 މީހުން މަރުވެއްޖެއެވެ. މަދިރީގެ ޒަރީއާއިން ފެތުރޭ ނުރައްކާތެރި ބައްޔެއް ކަމުގައިވާ ޑެންގީ މި ވަގުތު އެންމެ ހަލުވިކަމާ އެކު ފެތުރެމުން ދަނީ އެ ޤައުމުގެ އިރުމަތީގައިވާ ސެންޓަ ކްރޫޒްގައެވެ.
ސެންޓަ ކްރޫޒްއަކީ ބޮލީވިޔާގައި އެންމެ އާބާދީ ބޮޑު ސަރަޙައްދެވެ. އެ ޤައުމުގައި މިހާތަނަށް މި ބަލި ޖެހިފައިވާ މީހުންގެ ޢަދަދު 6,852 އަށް އަރާފައިވާއިރު، މި އަހަރުގެ މިހާތަނަށް 26 މީހުން މަރުވެފައިވާ ކަމަށް ރިޕޯޓު ކުރެވިފައިވާ ކަމުގައި އެ ޤައުމުގެ ޞިއްޙަތާ ބެހޭ ވުޒާރާއިން ބުނެއެވެ.
އެންމެ ގިނަ ޢަދަދެއްގެ މީހުންނަށް ޑެންގީ ޖެހިފައިވާ ސެންޓަ ކްރޫޒްގައި މި ބަލި ޖެހުނު މީހުންގެ ޢަދަދު މިހާރު ވަނީ 5,225 އަށް އަރާފައެވެ. ޑެންގީ ކޭސްތަކުގެ ޢަދަދު ކޮންޓްރޯލް ކުރަން ދަތި މިންވަރަކަށް އިތުރުވެފައިވާއިރު، ބަލި ޖެހޭ މީހުންނަށް ފަރުވާ ދިނުމަށް އެ ޤައުމުގެ ހޮސްޕިޓަލްތައް ވަނީ ނުކުޅެދިފައެވެ.
މި ބަލި ޖެހިފައިވާ މީހުންގެ ތެރޭގައި ގިނައީ ކުޑަކުދިންނެވެ. ނަމަވެސް، ކުޑަކުދިންނަށް ޚާއްޞަ ހޮސްޕިޓަލުތަކުގެ ޢަދަދު މަދުވުމާއި، ހޮސްޕިޓަލުތަކުގައި އެޑްމިޓްކޮށްގެން ފަރުވާދެވޭނެ އިންތިޒާމުތައް ފުރިހަމަވެފައި ނެތުމުގެ ސަބަބުން، ގިނަ ކުދިންނަށް ފަރުވާދިނުމަށް ވަނީ ދަތިވެފައެވެ.
ކުޑަކުދިންނަށް ފަރުވާދޭ އެއް ހޮސްޕިޓަލަކީ ސެންޓަ ކްރޫޒްގައި ހުންނަ މާރިޔޯ އޯޓިޒް ކުޑަކުދިންގެ ހޮސްޕިޓަލެވެ. ނަމަވެސް، އެ ތަނުގައި ހުންނަނީ އެންމެ 12 އެނދެއެވެ. އަދި، އެ ތަނަށް ކުރިމަތިވެފައިވާ މުވައްޒަފުންގެ ދަތިކަމާ ގުޅިގެން، ޑެންގީ ޖެހިގެން ގެންނަ ކުޑަކުދިންނަށް ފަރުވާދިނުމަށް ހުރަސްއެޅިފައިވާ ކަމުގައިވާ އެ ހޮސްޕިޓަލުގެ އޮފިޝަލުން ވިދާޅުވެއެވެ.
ދާދިފަހުން އެއް ޢާއިލާއެއްގެ ތިން ކުދިން ވަނީ ޑެންގީ ޖެހިގެން މަރުވެފައެވެ. އެއީ، އުމުރުން 2 އަހަރުން ދަށުގެ ތިން ކުދިންނެވެ. އެ ކުދިން މަރުވީ، ހޮސްޕިޓަލުތައް ފުރުމުގެ ސަބަބުން ފަރުވާ ކުރެވޭނެ ގޮތެއް ނެތިގެން ކަމުގައި އެ ކުދިންގެ މައިންބަފައިން ކިޔައިދިނެވެ.
ސެންޓަ ކްރޫޒްގައި ހަލުވިކަމާ އެކު ޑެންގީ ފެތުރެން ފެށުމާ ގުޅިގެން، މަދިރި އާލާވާ ތަންތަން ނައްތައިލުމަށް ސަރުކާރުން ވަނީ ޚާއްޞަ މަސައްކަތްތަކެއް ފަށާފައެވެ. އަދި، 1.9 މިލިޔަން މީހުންގެ އާބާދީއެއް އޮންނަ އެ ސަރަޙައްދުގައި މަދިރި ބޭސް ޖެހުމަށް ޚާއްޞަ ކެމްޕޭނެއް ފަށާފައެވެ. ހުސްވި 2022 ވަނަ އަހަރު ވެސް އެ ޤައުމުގައި 4,362 މީހަކަށް މި ބަލި ޖެހި، 10 މީހުން މަރުވިއެވެ.