ދިވެހިރާއްޖެއާއި ރުޅިވެރިކަމެއް އަދި ހަމަނުޖެހުމެއް އޮތް އެއްވެސް ޤައުމެއް ނެތް ކަމަށާއި، އެއީ ދުނިޔޭގެ މަދު ޤައުމަކަށް ނުނީ ނުލިބޭ ނަސީބެއްކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ކިޔަވާ ދަރިވަރުންނަށާއި، ޔުނިވާރސިޓީތަކުގެ ދަރިވަރުންނަށް އަދި ސަރުކާރު ވުޒާރާތަކަށް އަމާޒުކޮށްގެން ޚާރިޖީ ސިޔާސަތާއި، އެ ސިޔާސަތުގެ ދަށުން ކުރެވެމުންދާ މަސައްކަތްތަކާބެހޭ މަޢުލޫމާތު ހިއްސާކުރުމަށްޓަކައި ފެށި ފޮސިމް އައުޓްރީޗް ޕްރޮގްރާމްގައި ވާހަކަފުޅު ދައްކަވަމުންނެވެ.
ފޮރިން ސާރވިސް އިންސްޓިޓިއުޓް (ފޮސިމް)ގެ ފަރާތުން ފެށި ފުރަތަމަ އައުޓްރީޗް ޕްރޮގްރާމް ފަށްޓަވައިދެއްވައި ވާހަކަފުޅު ދައްކަވަމުން މިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު ވަނީ ދިވެހި ދައުލަތުގެ ޚާރިޖީ ސިޔާސަތު ބައްޓަންވެގެން އައިސްފައިވާ ގޮތާއި، ޚާރިޖީ ސިޔާސަތު މުހިންމު ވަނީ ކީއްވެގެން ކަމާއި ގުޅޭގޮތުން ވާހަކަފުޅު ދައްކަވާފައެވެ. އަދި ޚާރިޖީ ސިޔާސަތު ރައްޔިތުންނަށް އެނގިފައިއޮތުން މުހިންމުވަނީ ކީއްވެކަމާއި ގުޅޭގޮތުންވެސް އެމަނިކުފާނު ވާހަކަފުޅު ދެއްކެވިއެވެ. މީގެއިތުރުން ޚާރިޖީ ސިޔާސަތުގެ ދަށުން ރާއްޖެއިން ހޯދާފައިވާ ކާމިޔާބީތަކުގެ މައްޗަށްވެސް މިނިސްޓަރ އަލިއަޅުއްވާލެއްވިއެވެ.
މިނިސްޓަރ ޝާހިދު ވިދާޅުވީ، ދުނިޔޭގައި ވަރަށް ގިނަ ބައިނަލްއަޤްވާމީ ޖަމްޢިއްޔާތައް އެބަހުރިކަމަށާއި، އޭގެތެރެއިން ރާއްޖެއަކީ 96 ޖަމްޢިއްޔާގެ މެންބަރު ޤައުމެއްކަމަށެވެ. އޭގެ ތެރޭގައި އދ.އާއި ކޮމަންވެލްތާއި އޯގަނައިޒޭޝަން އޮފް އިސްލާމިކް ކޯޕަރޭޝަން އަދި އިންޑިއަން އޯޝަން ރިމް އެސޯސިއޭޝަން ފަދަ ޖަމްޢިއްޔާ މިނިސްޓަރ ފާހަގަކުރެއްވިއެވެ.
"1989 ރާއްޖޭގައި ކުދި ޖަޒީރާ ސްމޯލް އައިލެންޑްސް ޑެވެލޮޕިން ސްޓޭޓް ދިޑްސް އުފެދިގެން ދިޔައީ. މިއަދު ލިބޭ އެންމެ ބޮޑު ފަޚުރަކީ ކުދި ޖަޒީރާ ޤައުމުތަކުގެ ލީޑަރެއްގެ ގޮތުގައި ޤައުމުތަކުން ބަލައިގަތުން. އިންޑިއާ ކަނޑުގެ ހުރިހާ ޤައުމުތަކާއެކުވެސް ރާއްޖެއިން ގެންގުޅެނީ އާދަޔާ ޚިލާފް ގާތް ގުޅުމެއް. އަޅުގަނޑުމެންނާއެކު އެއްވެސް ރުޅިވެރިކަމެއް އެއްވެސް ހަމަނުޖެހުމެއް އޮތް އެއްވެސް ޤައުމެއް ނެތް. އަޅުގަނޑުމެންނަކީ، ދިވެހިރާއްޖެއަކީ، ދިވެހި ދައުލަތަކީ އެއްވެސް ބައެއްގެ ދުޝްމަނެއް ނޫން. އަޅުގަނޑުމެން އެންމެނާވެސް ރައްޓެހި. ހައްތަހާވެސް އަޅުގަނޑުމެންގެ ރައްޓެހި ޤައުމުތައް. ދުނިޔޭގެ ވަރަށް މަދު ޤައުމަށް އޮތް ނަސީބެއް އެއްވެސް ޤައުމަކާ ދުޝްމަނުކަމެއްނެތި، އަރާރުމެއް ނެތި ރީތިކޮށް އުޅުން." މިނިސްޓަރ ޝާހިދު ވިދާޅުވިއެވެ.
ފޮސިމް އައުޓްރީޗްގެ ފުރަތަމަ ޕްރޮގްރާމްގައި ސާނަވީ ސްކޫލްތަކާއި، މޯލްޑިވްސް ނޭޝަނަލް ޔުނިވާރސިޓީގެ ދަރިވަރުންގެ އިތުރުން ސަރުކާރުގެ ވުޒާރާތަކުގެ މުވައްޒަފުން ބައިވެރިވިއެވެ. މި ޕްރޮގްރާމުގެ ދަށުން އިތުރު ސެޝަންތަކެއް މި އަހަރުގެ ތެރޭގައި ރާއްޖޭގެ އެކި ކަންކޮޅުތަކުގައި ކުރިއަށް ގެންދެވޭނެކަމަށް ފޮރިން މިނިސްޓްރީން ވިދާޅުވިއެވެ.
ފޮސިމް އައުޓްރީޗް ޕްރޮގްރާމްގެ ސެޝަންތަކުގައި ދެޤައުމުގެ ދެމެދި އަދި ދޭދޭ ގުޅުންތަކާއި، ކޮމާރޝަލް ޑިޕްލޮމަސީ، ކޮންސިއުލަރ އަދި ޕްރޮޓޮކޯލް އުސޫލުތަކާއި ހަމަތަކާއި ބެހޭގޮތުން މައުލޫމާތު ހިއްސާކުރެވިގެންދާނެކަމަށް ފޮރިން މިނިސްޓްރީން ވިދާޅުވިއެވެ.