މިދިޔަމަހު ވީނުވީއެއް ނޭނގި ގެއްލުނު ބަންގްލަދޭޝަށް ނިސްބަތްވާ މުހައްމަދު ލިޓަންގެ މަރުގެ ތުހުމަތުގައި ހައްޔަރުކުރި ގދ. ތިނަދޫ މަނާރު، މުހައްމަދު ނިޒާމްގެ މައްޗަށް ދައުވާކުރަން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ލިޓަންއާއި ނިޒާމް ތެޔޮ ބޯޓެއްގައި ކަނޑުމައްޗަށް ނިކުމެ އުޅެނިކޮށް ހަބަރެއް ނުވެގެން އެ މީހުން ހޯދަން ފެށީ ޑިސެމްބަރުމަހުގެ 28 ވަނަ ދުވަހުއެވެ. އަދި އެމީހުން ހޯދަމުންދަނިކޮށް ދެ މީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފައެވެ. އަދި ގެއްލުނުކަމަށް ބުނާ ނިޒާމް ވަނީ މާލެއިން ފެނިގެން ފުލުހުން އޭނާ ހައްޔަރުކުރީ ޖެނުއަރީމަހުގެ 3 ވަނަ ދުވަހުއެވެ. މީގެއިތުރުން ކާކުކަން ނޭނގޭ މީހެއްގެ ހަށިގަނޑު ޖެނުއަރީ 2 ވަނަ ދުވަހު ވ. އަތޮޅު ކަނޑުމަތިން ވަނީ ފެނިފައެވެ.
ފުލުހުން ނިޒާމް ހައްޔަރުކުރީ ލިޓަންގެ މަރުގެ ތުހުމަތުގައިކަމަށްވާއިރު، އޭނާގެ މައްޗަށް ދައުވާކުރަން ޕީޖީ އޮފީހަށް މިހާރު ފޮނުވާފައިވާކަމަށް ފުލުހުން ވިދާޅުވެއެވެ. ނަމަވެސް އޭނާއަށް ކުރާނެ ދައުވާތަކާއިމެދު ޕީޖީން އަދި ގޮތެއް ނުނިންމައެވެ.
ނިޒާމްގެ މައްޗަށް ދައުވާކުރަން ފޮނުވާފައިވާއިރު ކަނޑުމަތިން ފެނުނު ހަށިގަނޑުގެ ސާމްޕަލް ނެގުމަށްފަހު ފުލުހުން ވަނީ އެ ހަށިގަނޑު މިހާރު ވަޅުލާފައެވެ. ނަމަވެސް އެއީ ލިޓަންގެ ހަށިގަނޑުކަމެއް ފުލުހުން ކަށަވަރުކޮށެއް ނުދެއެވެ.