ޖުޑީޝަލް ސާރވިސް ކޮމިޝަން، ޖޭއެސްސީން ކުރިއަށްގެންދިޔަ ތިން ފަނޑިޔާރުންގެ 4 ސުލޫކީ މައްސަލަ ސާބިތުނުވާކަމަށް އެ ކޮމިޝަނުން ނިންމައިފިއެވެ.
ޖޭއެސްސީން ވިދާޅުވީ، ޖުޑީޝަލް ސަރވިސް ކޮމިޝަނުގެ ޤާނޫނުގެ ދަށުން އެކޮމިޝަނަށް ހުށަހެއެޅި ސުލޫކީ 4 މައްސަލައަކީ، ހައިކޯޓުގެ ފަނޑިޔާރު އަލްއުސްތާޛު ޙުސައިން ޝަހީދުގެ ސުލޫކީ ދެމައްސަލައާއި، ކްރިމިނަލް ކޯޓުގެ ޤާޟީ އަލްއުސްތާޛު ޞަފްޢަތު ޙަބީބުގެ ސުލޫކީ މައްސަލައެއްގެ އިތުރުން، ސިވިލް ކޯޓުގެ ޤާޟީ އަލްއުސްތާޛާ މަރްޔަމް ވަޙީދުގެ ސުލޫކީ މައްސަލައެއްކަމަށެވެ.
އެ މައްސަލަތައް އެކޮމިޝަނުން ތަޙްޤީޤްކޮށް ބެލިބެލުމުން، އެއްވެސް މައްސަލައެއް އެއްވެސް ފަނޑިޔާރެއްގެ މައްޗަށް ސާބިތު ނުވާކަމަށް ނިންމާފައިވާކަމަށް ޖޭއެސްސީން ވިދާޅުވިއެވެ.
ހައި ކޯޓުގެ ފަނޑިޔާރު ޙުސައިން ޝަހީދާ ގުޅޭގޮތުން ޖޭއެސްސީން ތަޙްޤީޤްކުރީ ކޮން މައްސަލަތަކެއްކަމަށް އެ ކޮމިޝަނުން ވިދާޅެއް ނުވެއެވެ.
ކްރިމިނަލް ކޯޓުގެ ޤާޟީ އަލްއުސްތާޛު ޞަފްޢަތު ޙަބީބާއި ގުޅޭގޮތުން ޖޭއެސްސީން ކުރިއަށްގެންދިޔައީ، ކްރިމިނަލް ކޯޓުގެ މައްސަލައެއްގައި ޚުލާސާ ބަޔާން ހުށަހަޅައި މައްސަލައިގެ އަޑުއެހުން ނިމިފައިވީނަމަވެސް، ޖިނާޢީ އިޖުރާއަތުގެ ޤާނޫނުގައި ބަޔާންކޮށްފައިވާ ފަދައިން މައްސަލައިގެ ޚުކުމް ކުރުމުގެ މަޖިލިސް ބާއްވާފައި ނުވާކަމަށް ތުހުމަތުކުރާ މައްސަލައެވެ.
އަދި ސިވިލް ކޯޓުގެ ޤާޟީ އަލްއުސްތާޛާ މަރްޔަމް ވަޙީދާއި ގުޅޭގޮތުން ކުރިއަށް ގެންދިޔައީ ސިވިލް ކޯޓުގައި ކުރިއަށް ދިޔަ ތަންފީޛީ ޤަޟިއްޔާއެއްގައި ހިމެނޭ ޚަޞްމަކާ އެޤަޟިއްޔާއާ ގުޅޭގޮތުން ޝަރީޢަތުގެ ބޭރުން މުޢާމަލާތުކޮށް، ޙުކުމް ތަންފީޛް މައްސަލަތައް ބެލުމުގައި ޢަމަލުކުރާ އުޞޫލުތަކާ ކަނޑައެޅިގެން ޚިލާފަށް ޢަމަލުކޮށްފައިވާކަމަށް ބުނެ ހުށައެޅި މައްސަލައެކެވެ.