ފަލަސްޠީނުގެ ބިންތަކަށް އަރައި، މުސްލިމުން އަޅުވެތިކޮށްގެން ޔަހޫދީ އިސްރާޢީލުން ހިންގަމުންދާ ލާއިންސާނީ އަމަލުތައް ހުއްޓުވުމަށް ރައީސް މަޙްމޫދު އައްބާސް ބައިނަލްއަޤުވާމީ މުޖުތަމަޢަށް ގޮވައިލައްވައިފިއެވެ. މި އަހަރު ފެށުނު ފަހުން ވެސް ޔަހޫދީ ޓެރެރިސްޓު ސިފައިން ފަލަސްޠީނުގެ ބިންތަކަށް އަރައި 47 އަށްވުރެ ގިނަ މީހުން ވަނީ ޝަހީދުކޮށްލާފައެވެ.
ޔަހޫދީ އިސްރާޢީލުގެ ޖައްބާރު ސަރުކާރުން ހުޅަނގު އައްސޭރިއާއި ޤުދުޞްގައި އެތައް "ރަތް ރޮނގެއް" ހުރަސްކޮށްފައިވާ ކަމުގައި އައްބާސް ވިދާޅުވިއެވެ. މިޞްރުގެ ވެރިރަށް ޤާހިރާގައި ކުރިއަށްދިޔަ ޢަރަބި ލީގުގެ ބައްދަލުވުމެއްގައި ވާހަކަފުޅު ދައްކަވަމުން އައްބާސް ވިދާޅުވީ، ޔަހޫދީ ސަރުކާރުގެ ޖައްބާރުކަމަށް ނިމުމެއް ގެނައުމަށް ބައިނަލްއަޤުވާމީ މުޖުތަމަޢުގެ އެހީތެރިކަން ބޭނުންވާ ކަމުގައެވެ.
އަދި، ޔަހޫދީ ސިފައިންގެ ޖައްބާރުކަމާއި، އެ މީހުން ހިންގަމުންދާ ލާއިންސާނީ އުދުވާންތަކުން ފަލަސްޠީނުގެ ނިކަމެތި ރައްޔިތުން ރައްކާތެރިކޮށްދިނުމަކީ ބައިނަލްއަޤުވާމީ މުޖުތަމަޢުގެ ޒިންމާއެއް ކަމުގައި ވެސް އައްބާސް ވިދާޅުވިއެވެ. އަދި، ޔަހޫދީންގެ ސަރުކާރު ހުއްޓުވޭނީ، މުޅި ދުނިޔޭގެ އެހީތެރިކަމާއި އެއްބާރުލުން ލިބިގެން ކަމުގައި ވެސް އޭނާ ވިދާޅުވިއެވެ.
ހުސްވި 2022 ވަނަ އަހަރަކީ ފަލަސްޠީނުގެ ރައްޔިތުންނަށް ބިރުވެރި، އަނދިރި އަހަރެކެވެ. ލޭއޮހޮރުވުންތައް ގިނަ، އެތަކެއް ޢާއިލާތަކެއްގެ މެންބަރުން ދުނިޔެއާއި ވަކިކޮށްލި އަހަރެކެވެ. ޅަދަރިންގެ ބަފައިން ޝަހީދުކޮށްލާ، އެ ކުދިން ޔަތީމުކޮށްލި އަހަރެކެވެ. އެތަކެއް އަންހެނުންނެއް ހުވަފަތްކޮށްލާ، އެތަކެއް މައިންނެއްގެ ޅަދަރިން ޝަހީދުކޮށްލި އަހަރެކެވެ.
މި އަހަރު ފެށުނީ ޔަހޫދީންގެ އައު ސަރުކާރަކާ އެކުގައެވެ. ބޮޑުވަޒީރުކަމާ ހަވާލުވީ، މީގެ ކުރިން ވެސް އެތަކެއް ސަތޭކަ މުސްލިމުންނެއް ލޭއޮހޮރުވައިލުމުގެ ފަހަތުގައި ހުރި ޖައްބާރު ބެންޖަމިން ނަތަންޔާހޫއެވެ. އޭނާގެ އަމުރުތަކަށް ޔަހޫދީ އަސްކަރިއްޔާއިން މި އަހަރުގެ މިހާތަނަށް ހިންގާފައިވާ ލާއިންސާނީ އުދުވާންތަކުގައި ފަލަސްޠީނުގެ 48 އަށްވުރެ ގިނަ ފުރާނަ ވަނީ ނަގައިލާފައެވެ. އޭގެ ތެރޭގައި އުމުރުން ދުވަސްވީ އަންހެނުންނާއި ކުޑަކުދިން ވެސް ހިމެނެއެވެ.
މި ކަމާ ގުޅިގެން ވާހަކަފުޅު ދައްކަވަމުން އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވީ، އަތްގަދަކޮށްފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވުމަކީ އ.ދ.އިން ދެކޮޅު ކަމެއް ކަމުގައެވެ. އަދި، އެއްބަޔެއްގެ މައްޗަށް އަނެއް ބަޔަކު އަތްގަދަކޮށް، ޖަރީމާ ހިންގުމާ އ.ދ.އިން ދެކޮޅު ކަމުގައެވެ.
އިސްރާޢީލުން ފަލަސްޠީނުގެ ބިންތަކަށް އަތްގަދަކޮށް، ފަލަސްޠީނުގެ މުސްލިމުން އަޅުވެތިކޮށްފައިވީ ނަމަވެސް، ޢަރަބި ލީގުގެ ބައެއް ޤައުމުތަކުން ދަނީ އިސްރާޢީލާ ގުޅުން ބަދަހިކުރަމުންނެވެ. ކުރިން ކަނޑައިލާފައިވާ ގުޅުންތައް އަލުން އިޔާދަ ކުރަމުންނެވެ. ޒަޔަނިސްޓުންނަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ. ޔަހޫދީންގެ ޖައްބާރު ދައުލަތާ އެކު ސިޔާސީ ގުޅުން ގާއިމުކޮށް، ގުޅުންތައް ބަދަހިކުރަމުންދާ ޢަރަބި ޤައުމުތަކުގެ ތެރޭގައި އެކުވެރި ޢަރަބި ޢިމާރާތް (ޔޫ.އޭ.އީ)އާއި، ބަޙުރައިނާއި، މަޣުރިބާއި، މިޞްރުގެ އިތުރުން ޢުރުދުން ވެސް ހިމެނެއެވެ.