ބާރުގަދަ ތޫފާނެއް ކަމުގައިވާ ގެބްރިއޭލް ނިއު ޒިލެންޑުގެ އުތުރުގެ ސަރަޙައްދުތަކަށް އެރުމާ ގުޅިގެން އެ ސަރަޙައްދުގައި ކުއްލި ހާލަތު އިޢުލާނުކޮށްފިއެވެ. މި ތޫފާނުގައި ނިއު ޒިލެންޑުގެ ސަރަޙައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ. އަދި، އެތަކެއް ހާސް ގޭބީސީއަކުން ކަރަންޓުގެ ޚިދުމަތް ވަނީ މެދުކެނޑިފައެވެ. ނަމަވެސް، އެެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް އަދި ކޮށްފައެއް ނެތެވެ.
މި ތޫފާނާ އެކު އައި ބާރު ވަޔާއި ބޯ ވިއްސާރައިގައި މަގުތައް ވަނީ ހަލާކުވެފައެވެ. ބައެއް ސަރަޙައްދުތަކުގެ ބިންގަނޑު ކަނޑައިގެން ގޮސް، ކިސަޑު ފޭބުމުގެ ހާދިސާތައް ވަނީ ހިނގާފައެވެ. އަދި، ބައެއް ގެތައް ވަނީ ކިސަޑުތަކުގެ ދަށުވެފައެވެ. އަދި، ބޮޑު ސަރަޙައްދެއްގައި ފެންބޮޑުވެ، ގެދޮރަށް ވަނީ ބޮޑެތި ގެއްލުންތަކެއް ލިބިފައެވެ. ގިނަ ޢަދަދެއްގެ ގަސް ވެސް ވަނީ ވެއްޓިފައެވެ.
ބޮޑުވަޒީރު ކްރިސް ހިޕްކިންސް ވިދާޅުވީ، ތޫފާނާ ގުޅިގެން އެތަކެއް ސަތޭކަ ޢާއިލާއެއް ރައްކާތެރި ހިސާބުތަކަށް ބަދަލުވެފައިވާ ކަމުގައެވެ. އެންމެ ބޮޑެތި ގެއްލުންތައް ލިބިފައި ވަނީ، މީގެ ކުރިން ވެސް ބޯކޮށް ވާރޭވެހި، ފެންބޮޑުވެފައިވާ އޮކްލެންޑަށެވެ. ބައެއް މީހުންނަށް ރައްކާތެރި ހިސާބުތަކަށް ބަދަލުވާން ޖެހުނީ، ފެންބޮޑުވެފައިވާ މަގުތަކުގައި ފަތާފައި ކަމުގައި އެ ޤައުމުގެ މީޑިޔާތަކުން ރިޕޯޓު ކުރެއެވެ.
ބައެއް ސަރަޙައްދުތަކުގައި ފެންބޮޑުވުމުގެ ސަބަބުން، އެ ސަރަޙައްދުތަކުގެ ރައްޔިތުން ގެދޮރުގައި ތާށިވެފައިވާ ކަމުގައި އޮފިޝަލުން ވިދާޅުވެއެވެ. އަދި، އެ މީހުން ސަލާމަތް ކުރުމަށް އެ ޤައުމުގެ އަސްކަރިއްޔާއާއި ސިފައިންނާއި، މީހުން ސަލާމަތް ކުރުމަށް ހަރަކާތްތެރިވާ ޓީމުތަކުން ވަނީ މަސައްކަތް ފަށާފައެވެ.
ތޫފާނާ އެކު ނިއު ޒިލެންޑުގެ އުތުރުގެ ސަރަޙައްދުތަކަށް ގަޑިއަކު 140 ކިލޯމީޓަރުގެ ބާރުމިނުގައި ވައި ޖެހެމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. އަދި، ބައެއް ހިސާބުތަކަށް 200 މިލިމީޓަރުގެ ވާރޭ ވެހިފައިވާ ކަމަށާއި، އައްސޭރިފަށުގެ ބައެއް ހިސާބުތަކަށް 11 މީޓަރުގެ ބިޔަ ރާޅުތައް އަރާފައިވާ ކަމުގައި ވެސް މޫސުމާ ބެހޭ އިދާރާއިން ބުންޏެވެ.
ރައްކާތެރި ހިސާބުތަކަށް ބަދަލުކުރަން ޖެހުނު މީހުންގެ ޢަދަދު ސާފު ނޫން ކަމަށާއި، ގިނަ ހިސާބުތަކުން މުވާސަލާތީ ޚިދުމަތްތައް ވެސް ކެނޑިފައިވާ ކަމުގައި ހިޕްކިންސް ވިދާޅުވިއެވެ. މިއީ، ނިއު ޒިލެންޑުގެ ކުއްލި ހާލަތު އިޢުލާނު ކޮށްފައިވާ ތިންވަނަ ފަހަރެވެ. މީގެ ކުރިން އެ ޤައުމުގައި ކުއްލި ހާލަތު އިޢުލާނުކޮށްފައި ވަނީ 2019 ވަނަ އަހަރު ކްރައިސްޓްޗަރޗްގައި ހިނގި ބަޑިޖެހުމުގެ ހާދިސާއާއި، ކޮވިޑް-19ގެ ބަލިމަޑުކަމާ ގުޅިގެންނެވެ.
ކުރިއަށް އޮތް ދުވަސްތަކުގައި ވެސް ނިއު ޒިލެންޑުގެ ގިނަ ސަރަޙައްދުތަކަށް މޫސުން ގޯސްވާނެ ކަމުގައި އެ ޤައުމުގެ މޫސުމާ ބެހޭ އިދާރާއިން އިންޒާރު ކުރެއެވެ. ނަމަވެސް، ކުއްލި ހާލަތްތަކުގައި ހަރަކާތްތެރިވާ ޓީމުތަކުން ދަނީ، ގެދޮރުގައި ބަންދުވެފައިވާ މީހުންނާ ހަމައަށް ދަތުރުކޮށް، އެ މީހުންނަށް އެހީތެރިކަން ފޯރުކޮށްދޭން މަސައްކަތް ކުރަމުންނެވެ.
މި މަސައްކަތުގައި އުޅުނު އަލިފާން ނިއްވާ މީހަކު ގެއްލިފައިވާ ކަމަށް އޮފިޝަލުން ބުނެއެވެ. އަދި، އަލިފާން ނިއްވާ ޓީމުގެ އިތުރު މީހެއްގެ މައްޗަށް ޢިމާރާތެއް ވެއްޓުމުގެ ސަބަބުން ލިބުނު ޒަޚަމުތަކަށް ފަރުވާދެމުންދާ ކަމުގައި ވެސް އޮފިޝަލުން ވިދާޅުވެއެވެ. މި ތޫފާނާ ގުޅިގެން ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް 7.25 މިލިޔަން އެމެރިކާ ޑޮލަރު ހޭދަކުރައްވާނެ ކަމަށް ހިޕްކިންސް ވަނީ ވިދާޅުވެފައެވެ.