ޔަހޫދީ އިސްރާޢީލުގެ އަސްކަރީ މަތިންދާބޯޓުތަކުން ފަލަސްޠީނުގެ ޣައްޒާއަށް ބޮންއަޅައި ބޮޑެތި ގެއްލުންތަކެއް ދީފިއެވެ. އެ ހަމަލާތަކަށް ފަހު، ޔަހޫދީ ޓެރެރިސްޓު ސިފައިން ވަނީ ހުޅަނގު އައްސޭރީގެ ނާބްލުސްއަށް އަރައި، ލާއިންސާނީ އުދުވާންތަކެއް ހިންގައި އެކަކު ޝަހީދުކޮށްލައިފިއެވެ. ނާބްލުސްއަށް އަރާފައިވާ ކަން ޔަހޫދީ އަސްކަރިއްޔާއިން ކަށަވަރު ކޮށްދީފައި ނުވި ނަމަވެސް، ފަލަސްޠީނުގެ ރެޑް ކްރެސެންޓުން ވަނީ، އެކަކު ޝަހީދުކޮށްލާފައިވާ ކަން ކަށަވަރު ކޮށްދީފައެވެ.
އިސްރާޢީލުގެ އަސްކަރިއްޔާއިން ބުނީ ޣައްޒާއަށް ދިން މިސައިލް ހަމަލާތައް އަމާޒުކޮށްފައި ވަނީ، ރޮކެޓް ފަދަ ހަތިޔާރު އުފައްދަން ބޭނުންކުރާ ބިންގަރާހަކަށް ކަމުގައެވެ. އެއީ، ހަމާސް ޖަމާޢަތަށް ނިސްބަތްވާ ހަތިޔާރު އުފައްދާ ކާރުޚާނާއެއް ކަމުގައި ވެސް އިސްރާޢީލުން ބުންޏެވެ. އެ ތަނަށް ބޮންއަޅާފައި ވަނީ، ފަލަސްޠީނުގެ މިނިވަންކަމަށް ޖިހާދުކުރަމުންދާ މުޖާހިދުން އިސްރާޢީލަށް އަމާޒުކޮށް ދިން ރޮކެޓް ހަމަލާތަކަކަށް ރައްދުދިނުމުގެ ގޮތުން ކަމުގައި ވެސް ޔަހޫދީ ޖައްބާރު އަސްކަރިއްޔާއިން ބުންޏެވެ.
ޔަހޫދީންގެ މިސައިލް ހަމަލާތަކުގައި ފަލަސްޠީނުގެ އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. ނަމަވެސް، ފަލަސްޠީނުގައި އަޅުތެރިކޮށްފައިވާ މުސްލިމުންނާ ދެކޮޅަށް ޔަހޫދީ ޖައްބާރު ސިފައިން ހިންގަމުންދާ ލާއިންސާނީ އުދުވާންތައް މި އަހަރުގެ ތެރޭގައި އިތުރުކޮށްފައިވާ ކަން ފާހަގަކުރެވެއެވެ. މިއީ، މި އަހަރުގެ ތެރޭގައި ޔަހޫދީ އަސްކަރީ މަތިންދާބޯޓުތަކުން ބޮން އަޅާފައިވާ ތިންވަނަ ފަހަރެވެ.
ޔަހޫދީ ޖައްބާރު ސިފައިން މި އަހަރުގެ ތެރޭގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު މި ވަނީ 47 އަށް އަރާފައެވެ. މީގެ ތެރޭގައި އުމުރުން ދުވަސްވީ އަންހެނަކާއި ތިން ކުޑަކުދިން ވެސް ހިމެނެއެވެ. އަދި، ޔޫކްރެއިނުގެ ރައްޔިތެއް ވެސް ހިމެނެއެވެ.
ފަލަސްޠީނުގެ މުސްލިމުން އަޅުވެތިކުރުމުގެ އިތުރުން، ވެރިވެގަނެފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވަން ވެސް އިސްރާޢީލުން ދަނީ މަސައްކަތް ކުރަމުންނެވެ. ޖަނަވަރީ 11 ވަނަ ދުވަހު ވެސް ޔަހޫދީންގެ އައު ސަރުކާރުން ވަނީ، ޔަހޫދީންގެ ނުވަ އާބާދީއެއް ފަލަސްޠީނުގެ ބިންތަކުގައި ވަޒަންވެރިވާން ހުއްދަ ދީފައެވެ. ފަލަސްޠީނުގެ ބިންތަކުގައި މިހާރު ވެސް ޔަހޫދީ 475,000 މީހުން ވަޒަންވެރިވެގެން އުޅެއެވެ.
މިއީ މުޅި ބައިނަލްއަޤުވާމީ މުޖުތަމަޢުން ކަންބޮޑުވާ މައްސަލައެވެ. އެމެރިކާގެ ޚާރިޖީ ވަޒީރު އެންތަނީ ބްލިންކަން ދާދިފަހުން އިސްރާޢީލަށް ކުރެއްވި ދަތުރުފުޅެއްގައި ވެސް، ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުމާ ދެކޮޅު ކަން ހާމަކުރައްވާފައިވެއެވެ. ނަމަވެސް، ޔަހޫދީ ޖައްބާރު ބޮޑުވަޒީރު ބެންޖަމިން ނަތަންޔާހޫ ވަނީ، ޔަހޫދީ ވަޒަންވެރިންގެ ހިމާޔަތާއި ރައްކާތެރިކަން ކަށަވަރުކޮށްދޭން އިތުރު ސިފައިން ފޮނުވާނެ ކަމުގައެވެ.