ތުރުކީވިލާތާއި ސޫރިޔާއަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދު 24،000 އަށްވުރެ މައްޗަށް އަރާފައިވާއިރު، ބިންހެލުމާ ގުޅިގެން ސޫރިޔާގައި ގެދޮރުނެތި، މަގުމަތިވެފައިވާ މީހުންގެ ޢަދަދު 5.3 މިލިޔަނަށް އަރާނެކަމުގައި އ.ދ.އިން ބުނެފިއެވެ. ތުރުކީވިލާތުގެ ދެކުނުގައިވާ ގަޒިއެންޓެޕް ކައިރިއަށް އައި ރިކްޓަރ މިންގަނޑުން 7.8 ބާރުމިނުގެ ބިންހެލުމުގައި އެތަކެއް ހާސް ޢިމާރާތެއް ވެއްޓި، އެތަކެއް މިލިޔަން މީހުންނެއް ވަނީ ހާލުގައި ޖެހިފައެވެ.
ތުރުކީވިލާތުގެ ޞިއްޙަތާ ބެހޭ ވުޒާރާއިން ބުނީ، ޢިމާރާތްތަކުން ދަށުން މަރުވެފައިވާ ގިނަ ޢަދަދެއްގެ ބަޔެއްގެ ހަށިގަނޑުތައް ފެންނަމުންދާ ކަމުގައެވެ. އަދި، އެ ޤައުމުގައި މަރުވި މީހުންގެ ޢަދަދު 20,213އަށް އަރާފައިވާ ކަމުގައެވެ. ސޫރިޔާގައި މަރުވެފައިވާ މީހުންގެ ޢަދަދު ވަނީ 3,553 އަށްވުރެ މައްޗަށް އަރާފައެވެ.
ތުރުކީވިލާތުގައި ބިންހެލުމާ ގުޅިގެން ވެއްޓުނު ޢިމާރާތްތަކުގެ ޢަދަދު 6,000 އަށްވުރެ ގިނަ އިތުރުވާނެ ކަމަށް އެ ޤައުމުން ބުނެއެވެ. ޢިމާރާތްތަކުގެ ދަށުގައި ތާށިވެފައިވާ މީހުން ހޯދުމަށް ހުއްޓުމެއް ނެތި އަދިވެސް ދަނީ މަސައްކަތް ކުރަމުންނެވެ. ނަމަވެސް، ގަދަ ފިންޏާއި، ސްނޯއާއި، ވާރޭގެ ސަބަބުން އެ މަސައްކަތްތަކަށް ކޮންމެވެސް ވަރެއްގެ ހުރަސްތަކެއް ދަނީ ކުރިމަތިވަމުންނެވެ. އަދި، ދިރިތިއްބާ ގިނަ ޢަދަދެއްގެ ބަޔަކު ސަލާމަތް ކުރެވޭނެ ކަމުގެ އުންމީދު މިހާރު ވަނީ ފަނޑުވެފައެވެ.
ބިންހެލުމުގައި އެންމެ ބޮޑަށް ގެއްލުންވެފައި ވަނީ ގަޒިއެންޓެޕް ކައިރީގައި އޮންނަ ރަށެއް ކަމުގައިވާ ޕަޒަރްޖިކްއަށެވެ. މި ހާދިސާގައި އެ ރަށުން އެތަކެއް ހާސް ބަޔަކު މަރުވިއެވެ. އަދި، އެ ރަށުގައި މަރުވި މީހުންގެ ޖާނާޒާތައް ބާއްވައި، ބޮޑެތި ވަޅުގަނޑުތަކުގައި، މަރުވި މީހުންގެ ހަށިތައް ވަޅުލުމުގެ މަސައްކަތް ވަނީ ފަށާފައެވެ. މި ފަދަ 100އެއްހާ ވަޅުގަނޑު ކޮނެފައިވާއިރު، 28 ވަޅުގަނޑެއް ފުރިގެން ފަސްއަޅާފައިވާ ކަމުގައި އެ ސަރަޙައްދުގައި ހަރަކާތްތެރިވާ ނޫސްވެރިން ބުނެއެވެ. ގަޒިއެންޓެޕް ކައިރީގައި ފަރުބަދަމަތީ ސަރަޙައްދުތަކުގައި އެތަކެއް ހާސް ބަޔަކު ތާށިވެފައިވާ ކަމަށާއި، އެ ސަރަޙައްދުތަކުގައި ގިނަ ޢަދަދެއްގެ ބަޔަކު މަރުވެފައިވީ ނަމަވެސް، އެ މީހުންގެ ހަށިތައް ވަޅުލާން ފަށާފައި ނުވާ ކަމުގައި ވެސް ނޫސްވެރިން ބުނެއެވެ.
ބިންހެލުމުގައި ސޫރިޔާގައި ސުންނާފަތިވެފައިވާ ބައެއް ސަރަޙައްދުތަކާއި އަވަށްތަކަށް، މީހުން ސަލާމަތްކުރާ ޓީމުތަކުން އަދި ފޯރާފައެއް ނުވެއެވެ. އެ ސަރަޙައްދުތަކުގައި ބިމާހަމަވެފައިވާ ޢިމާރާތްތަކުގެ ދަށުން މީހުން ސަލާމަތް ކުރުމަށް މަސައްކަތް ކުރަމުން ދަނީ އެ ސަރަޙައްދުގެ ޢާންމު ރައްޔިތުންނެވެ. ބިންހެލުމުގައި އެންމެ ބޮޑަށް އަސަރުކޮށްފައި ވަނީ ހަތިޔާރުއެޅި ޖަމާޢަތްތަކުން ކޮންޓްރޯލް ކުރާ، ސޫރިޔާގެ އުތުރުގެ ސަރަޙައްދުތަކަށެވެ.
ސޫރިޔާ އަދިވެސް އޮތީ ދާޚިލީ ހަނގުރާމައިގެ ހާލަތުގައެވެ. މި ކަމާ ގުޅިގެން، ބިންހެލުމުގައި ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ. ސުރިޔާގައި ބިންހެލުމާ ގުޅިގެން ގެދޮރުނެތިފައިވާ މީހުންގެ ޢަދަދު 5.3 މިލިޔަނަށް އަރާނެ ކަމަށް އ.ދ.އިން ވަނީ ބުނެފައެވެ. އަދި، ހަނގުރާމައާއި ހަމަލާ ބަދަލުކުރުންތައް ހުއްޓައިލާ، ހާލުގައި ޖެހިފައިވާ މީހުންނަށް އެހީ ފޯރުކޮށްދިނުމުގެ ފުރުޞަތު ދިނުމަށް އ.ދ.ގެ ރެފިޔުޖީންނާ ބެހޭ އިދާރާއިން ވަނީ ގޮވައިލާފައެވެ.
އ.ދގެ ރެފިޔުޖީންނާ ބެހޭ ސަފީރުގެ އޮފީހުން ސޫރިޔާއަށް ކަނޑައަޅާފައި ހުންނަވާ މަންދޫބު ސިވާންކާ ދަނަޕަލަ ވިދާޅުވީ، ސޫރިޔާގެ އުތުރުގެ ސަރަޙައްދުތަކުގައި ހާލުގައި ޖެހިފައިވާ އެތަކެއް މިލިޔަން ރައްޔިތުންނަށް މި ވަގުތު އެންމެ ބޮޑަށް ބޭނުން ޖެހިފައި ވަނީ ކާބޯތަކެއްޗާއި ހިޔަވާހިކަން ކަމުގައެވެ. އަދި، ވަގުތީ ހިޔާގެ ގޮތުގައި ބޭނުންކުރެވޭނެ ޓެންޓު ފަދަ ސާމާނު އެ ސަރަޙައްދުތަކަށް ފޯރުކޮށްދޭން މަސައްކަތް ކުރަމުންދާ ކަމުގައި އޭނާ ވިދާޅުވިއެވެ.
ހަނގުރާމައާ ގުޅިގެން ސޫރިޔާގެ އުތުރުގެ ސަރަޙައްދުތަކަށް އެހީގެ ސާމާނު ފޯރުކޮށްދެވެން އޮތް ހުރިހާ މަގެއް އޮތީ ބަންދުވެފައެވެ. މަގުތައް ވަނީ ހަލާކުވެފައެވެ. އެ ސަރަޙައްދަށް ދެވެން އޮތް ހަމައެކަނި މަގަކީ، ތުރުކީވިލާތުން އެ ޤައުމަށް އެތެރެވުމެވެ. އެހީގެ ސާމާނު ހިފައިން އ.ދ.ގެ ހަ ޓްރަކް އެ ސަރަޙައްދަށް ފޮނުވާފައިވާއިރު، އެހީގެ ދެވަނަ ގާފިލާއެއް ފޮނުވުމަށް އ.ދ.އިން ދަނީ ތައްޔާރުވަމުންނެވެ.
14 ލޮރީ ހިމެނޭ އެ ގާފިލާއިން ޓެންޓުތަކާއި، ރަޖައާއި، ގޮދަޑިއާއި އިންސިއުލޭޓަރގެ އިތުރުން ސާފުތާހިރުވުމަށް ބޭނުންވާ ސާމާނާއި ކާބޯތަކެތި ގެންދާނެ ކަމުގައި ހިޖުރަކުރުމާ ބެހޭ ބައިނަލްއަޤުވާމީ އިދާރާއިން ބުނެއެވެ. އެ ލޮރީތައް މިހާރު އޮތީ ތުރުކީވިލާތާއި ސޫރިޔާ ގުޅައިދޭ ސަރަޙައްދީ ރޮނގުގައި އޮންނަ ބާބް އަލް-ޙަވާގައެވެ.
ސޫރިޔާގެ ހާލަތާ މެދު މަޝްވަރާކޮށް، އެ ޤައުމަށް އެހީ ފޯރުކޮށްދޭނެ ގޮތްތަކާ ގުޅޭ ގޮތުން މަޝްވަރާކުރުމަށް އ.ދ.ގެ ސަލާމަތީ މަޖިލީހުން ދަނީ ތައްޔާރުވަމުންނެވެ. މި ބައްދަލުވުމަށް ގޮވައިލާފައި ވަނީ ބްރެޒިލާއި ސްވިޓްޒަލެންޑުންނެވެ. މި ބައްދަލުވުމުގައި، އ.ދ.ގެ އިންސާނިއްޔަތާ ބެހޭ އިދާރާގެ އިސްވެރިޔާ މާޓިން ގްރިފިތްސްއާ މަޝްވަރާކޮށް، ސޫރިޔާއަށް އެހީ ފޯރުކޮށްދެވޭނެ އިތުރު މަގުތައް ހޯދާނެ ކަމުގައި ބްރެޒިލްއިން ބުނެއެވެ.
ސޫރިޔާގެ މަސްރަޙާ ގުޅޭގޮތުން މަޝްވަރާ ކުރަން އ.ދ.އިން ތައްޔާރުވަމުންދާ މި ދަނޑިވަޅުގައި، އެ ޤައުމުގެ ރައީސް ބައްޝާރުލް އަސަދު ވަނީ، ބިންހެލުމުގައި ގެއްލުންވެފައިވާ ބައެއް ސަރަޙައްދުތަކަށް ޒިޔާރަތް ކުރައްވާފައެވެ. އޭނާ ވަޑައިގަންނަވާފައި ވަނީ ޙަލަބަށެވެ. އެއީ، ސަރުކާރުގެ ކޮންޓްރޯލްގެ ދަށުގައި އޮތް ސަރަޙައްދެކެވެ. މިއީ، ބިންހެލުމަށް ފަހު، އޭނާ އެ ސަރަޙައްދުތަކަށް ޒިޔާރަތް ކުރެއްވި ފުރަތަމަ ފަހަރެވެ.