ސަރުކާރުގެ ޚިދުމަތްތައް ލުއިފަސޭހަކޮށް އޮންލައިންކޮށް ދިނުމަށް ފެށި އީފާސްގެ ހިދުމަތް މިދިޔަ 4 އަހަރުތެރޭގައި ބޭނުންކުރަން ފެށި މީހުންގެ އަދަދު 130000 އިން މައްޗަށް އަރައިފިއެވެ.
އީފާސްއަކީ 2012 އަހަރުން ފެށިގެން ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީން ތަރައްގީކޮށް ބަލަހައްޓަމުން އަންނަ ނިޒާމެކެވެ. މި ޚިދުމަތަކީ ސަރުކާރާއި ދައުލަތުގް މުވައްސަސާތަކުން އޮންލައިންކޮށް ފޯރުކޮށްދޭ ޚިދުމަތްތައް ފޯރުކޮށްދިނުމުގައި، ބޭނުންކުރަމުން އަންނަ ޑިޖިޓަލް އައިޑެންޓިޓީގެ ނިޒާމެވެ.
2012ވަނަ އަހަރު ބޭނުންކުރަންފެށި މި ޚިދުމަތަށް 10 އަހަރު މިވަނީ ވެފައެވެ. މި ޚިދުމަތަށް މީގެ ކުރިން ނުގެންނަހާ ބޮޑެތި ކުރިއެރުންތައް ވޭތުވެދިޔަ 4 އަހަރުތެރޭގައި ވަނީ ގެނެސްފައެވެ. އެންމެ މުހިންމުކަމެއްގެ ގޮތުގައި ފާހަގަކުރެވެނީ ދަޢުލަތުގެ މުވައްސަސާތަކުގެ އޮފީސްތަކަށް ހާޒިރުވެގެން ހޯދަންޖެހުނު އެތައް ޚިދުމަތެއް މިހާރު އީފާސް ނިޒާމުގެ ތެރެއިން ދޭން ފެށުމެވެ.
މިހާތަނަށް އައިއިރު އީފާސްއަށް 137ހާސް މީހުން ވަނީ ރަޖިސްޓްރީކޮށްފައެވެ. އަދި 440އަށްވުރެ ގިނަ ޚިދުމަތް މި ޕޯޓަލްގެ ތެރެއިން ފޯރުކޮށްދެއެވެ. މިހާތަނަށް 5.98 މިލިއަން ފަހަރު ޕޯޓަލްއަށް ލޮގިންވެ ޚިދުމަތް ހޯދާފައިވެއެވެ.
2018 ވަނަ އަހަރާއި ހަމައަށް އައިއިރު މި ޚިދުމަަތަށް ރެޖިސްޓްރީ ކޮށްފައި ވަނީ 8125 މީހުންނެވެ. އަދި މިދިޔަ 4 އަހަރުތެރޭ އިތުރު 129000އަށްވުރެ ގިނަ މީހުން ޚިދުމަތަށް ރެޖިސްޓްރީކޮށްފައިވެއެވެ.
މިދިޔަ 2 އަހަރުގެ ތެރޭގައި އީފާސް ޤައުމީ ޑިޖިޓަލް އައިޑެންޓިޓީގެ ގޮތުގައި ތަރައްޤީކުރުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވަނީ ކެބިނެޓްގެ ލަފަޔާއެކު ނިންމަވާފައެވެ. އެގޮތުން މިހާތަނަށް އައިއިރު ޚިދުމަތް ތަރައްޤީކޮށް، ޓޫ.ފެކްޓަރ އޮތެންޓިފިކޭޝަން ވަނީ ތަޢާރަފްކޮށްފައެވެ. އަދި އޮންލައިންކޮށް އީފާސް ވެރިފައި ކުރެވޭނެ ނިޒާމު ވަނީ ހަރުދަނާކޮށް، އިފްތިތާޙުކޮށްފައެވެ. އެގޮތުން ފޭސް ރެކޮގްނިޝަން ޓެކްނޯލޮޖީ މެދުވެރިކޮށް ކޮންމެތާކު، ކޮންމެ ވަގުތެއްގައިވެސް އަމިއްލައަށް އީފާސް ވެރިފައިކުރެވޭނެ އިންތިޒާމް މިހާރު ވަނީ ހަމަޖައްސާފައެވެ.