ޔަހޫދީ އިސްރާޢީލުގެ ޓެރެރިސްޓު ސިފައިން ހުޅަނގު އައްސޭރިއަށް އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ ޒުވާނެއް ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީ ޖައްބާރު ސިފައިންގެ ހަމަލާއެއްގައި ޝަހީދުކޮށްލާފައި ވަނީ އުމުރުން 26 އަހަރުގެ ޢަބްދުالله ސާމީ ޤަލަލްވާ ކަމުގައެވެ.
އޭނާ ޝަހީދުކޮށްލާފައި ވަނީ ނާބްލުސްގެ ދެކުނުގައިވާ ހުވާރާގައި ޔަހޫދީ ޓެރެރިސްޓު ސިފައިން ހިންގި އުދުވާންތަކެއްގައި ކަމަށާއި، އޭނާގެ އަތުގައި އެއްވެސް ހަތިޔާރެއް ވެސް ނެތް ކަމުގައި އެ ވުޒާރާއިން ބުންޏެވެ. ޔަހޫދީ އަސްކަރިއްޔާއިން ވެސް ވަނީ ޤަލަލްވާ އަތުގައި އެއްވެސް ހަތިޔާރެއް ނެތް ކަން ކަށަވަރުކޮށްދީފައެވެ.
އިސްރާޢީލުގެ އަސްކަރިއްޔާއިން ބުނީ ޤަލަލްވާ ޝަހީދުކޮށްލާފައި ވަނީ ހުވާރާގައި ހުންނަ އަސްކަރީ ޕޯސްޓަކަށް ވަދެ، އެ ތަނުގައި ހުރި ސިފައިންގެ މީހަކަށް ހަމަލާދޭން މަސައްކަތް ކުރުމުން ކަމުގައެވެ. ނަމަވެސް، ޤަލަލްވާ އެ އަމަލު ހިންގަން އުޅުނު ކަން ޔަހޫދީ އަސްކަރިއްޔާއަށް ސާބިތުކޮށްދެވިފައެއް ނުވެއެވެ.
ޤަލަލްވާއަކީ މި އަހަރުގެ ތެރޭގައި ޔަހޫދީ ސިފައިން ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ 36 ވަނަ މީހާއެވެ. ޖިނީން ރެފިޔުޖީ ކޭމްޕަށް ވަދެ ޔަހޫދީ ޖައްބާރު ސިފައިން ހިންގި އުދުވާންތަކެއްގައި އެންމެ ދުވަހެއްގެ ތެރޭގައި ވެސް ފަލަސްޠީނުގެ 11 ޝަހީދުކޮށްލާފައިވެއެވެ. އޭގެ ތެރޭގައި އުމުރުން ދުވަސްވީ އަންހެނެއް ވެސް ހިމެނެއެވެ. އަދި، ކުށެއް ނެތް ކުޑަކުދިން ވެސް ހިމެނެއެވެ.
އެ ހަމަލާތަކުގެ ބަދަލުހިފުމުގެ ގޮތުން ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުން ވަނީ ޤުދުޞްގައި ހުންނަ ޔަހޫދީ ފައްޅިއަކަށް ހަމަލާދީ، ޔަހޫދީންގެ ހަތް މީހުން މަރައިލާފައެވެ. އެ ކަމުގެ ރައްދުގައި ޔަހޫދީ އަސްކަރިއްޔާއިން ވަނީ، އެ މީހުން ހިންގާ އުދުވާންތައް އިތުރުކޮށް، ޣައްޒާއަށް ބޮންއަޅަން ފަށާފައެވެ. ނަމަވެސް، ބޮމުގެ ހަމަލާތަކުގައި ފަލަސްޠީނުގެ އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.
ޔަހޫދީން ފަލަސްޠީނުގެ ބިންތަކަށް އަރައި ހިންގަމުންދާ އުދުވާންތަކާ ގުޅިގެން އ.ދ.ގެ އިންސާނީ ހައްޤުތަކާ ބެހޭ އިދާރާގެ އިސްވެރިޔާ ވޯކަރ ޓަރކް ވަނީ އިސްރާޢީލަށް އިންޒާރެއް ދެއްވާފައެވެ. އަދި، ހުޅަނގު އައްސޭރިއާއި އިރުމަތީ ޤުދުޞްގައި ދިރިއުޅެމުންދާ ފަލަސްޠީނުގެ ރައްޔިތުންގެ އިންސާނީ ހައްޤުތަކަށް އިޙުތިރާމު ކުރުމަށް އޭނާ ވަނީ ގޮވައިލައްވާފައެވެ. ނަމަވެސް، އުދުވާންތައް ހުއްޓައިލުމަށް އޭނާ ގޮވައިލައްވާފައެއް ނުވެއެވެ.
ހުސްވި 2022 ވަނަ އަހަރަކީ ފަލަސްޠީނުގެ މުސްލިމުންނަށް ބިރުވެރި އަދި ނުރައްކާތެރި އަހަރެކެވެ. ޔަހޫދީ ޖައްބާރު ޓެރެރިސްޓު ސިފައިން ހުޅަނގު އައްސޭރިއަށް އަރައި ހިންގި އުދުވާންތަކުގައި ފަލަސްޠީނުގެ 200 އަށްވުރެ ގިނަ މީހުން ވަނީ ޝަހީދުކޮށްލާފައެވެ. އަދި، ގިނަ ޢަދަދެއްގެ ބަޔަކު ޒަޚަމުކޮށްލާފައެވެ. މީގެ ތެރޭގައި ގިނައީ ޢާންމުންނާއި ކުޑަކުދިންނެވެ.