ރަޝިޔާއިން ޔޫކްރެއިނުގެ ރައްޔިތުންނާ ދެކޮޅަށް ހިންގަމުންދާ ހަނގުރާމައިގެ ޖަރީމާތައް ބެލުމަށް ބައިނަލްއަޤުވާމީ އިދާރާއެއް ހެދުމަށް ވިލާތުގެ އިއްތިހާދު (އީ.ޔޫ)އާއި ޔޫކްރެއިނުން މަސައްކަތް ފަށައިފިއެވެ. މި ކަން އިޢުލާނުކޮށްފައި ވަނީ އީ.ޔޫ.ގެ އިސްވެރިން މިހާރު ޔޫކްރެއިނަށް ކުރަމުންދާ ދަތުރުގެ ތެރެއިންނެވެ.
ޔޫކްރެއިނުގެ ރައީސް ވޮލޮޑޮމީރް ޒެލެންސްކީ އިންތިޒާމުކުރެއްވި ސަމިޓެއްގައި ބައިވެރިވެ ވަޑައިގަތުމަށް އީ.ޔޫ. ކައުންސިލްގެ ރައީސް ޗާލްސް މިޝެލްއާއި، އީ.ޔޫ. ކޮމިޝަނުގެ ރައީސާ އުރްސުލާ ވޮންޑެ ލަޔަންގެ އިތުރުން އެ އިއްތިހާދުގެ ޚާރިޖިއްޔާގެ އިސްވެރިޔާ ޖޯސެފް ބޮރެލް ވަނީ ޔޫކްރެއިނުގެ ވެރިރަށް ކީވްއަށް ވަޑައިގަންނަވާފައެވެ.
މި ބައްދަލުވުންތަކަށް ފަހު އީ.ޔޫ.އާއި ކީވްއިން ނެރެފައިވާ ގުޅިފައިވާ ބަޔާނެއްގައި ބުނެފައި ވަނީ، ޔޫކްރެއިނަށް އަރައި ހަނގުރާމަ ކުރަމުންދާ ރަޝިޔާގެ ސިފައިންނާއި އެ ޤައުމުން ފޮނުވާފައިވާ ކުލީ ސިފައިން ހިންގާފައިވާ ހަނގުރާމައިގެ ކުށްތައް ތަހުޤީޤުކޮށް، ދަޢުވާކުރުމަށް އޮފީހެއް ހެދުމަށް އެއްބަސްވާ ކަމުގައެވެ. އަދި، އެ އިދާރާ އުފައްދާނީ ނެދަރލެންޑްސްގެ ދަ ހޭގްގައި ކަމަށް ވެސް އެ ބަޔާނުގައި ބުނެފައިވެއެވެ.
ޔޫކްރެއިނުން ޤަބޫލުކުރާ ގޮތުގައި، ރަޝިޔާއިން ހިންގަމުންދާ ހަނގުރާމައިގެ ކުށްތައް ތަހުޤީޤުކޮށް، އެ ކަމާ މެދު ފިޔަވަޅު އެޅުން އަވަސްކުރެވޭނީ، މި ފަދަ އިދާރާއެއް އުފައްދައިގެންނެވެ. އަދި، ޔޫކްރެއިނަށް އަރައި ހަނގުރާމަ ފެށުމުގެ ކުށުގައި ރަޝިޔާގެ ރައީސް ވްލަޑިމިޔަރ ޕުޓިންއާއި ރަޝިޔާގެ ސަރުކާރުގެ އިސްވެރިންނާ ދެކޮޅަށް ދަޢުވާ ކުރުމަކީ ވެސް ޔޫކްރެއިނުގެ އެދުމެކެވެ.
ބައިނަލްއަޤުވާމީ ޖިނާއީ ކޯޓު (އައި.ސީ.ސީ)އިން މިހާރު ވެސް ދަނީ، ރަޝިޔާ ސިފައިން ޔޫކްރެއިނުގައި ހިންގާފައިވާ ހަނގުރާމައިގެ ކުށްތަކާއި ޖަރީމާތައް ތަހުޤީޤު ކުރަމުންނެވެ. އަދި، އިންސާނިއްޔަތާ ދެކޮޅަށް ހިންގާފައިވާ ކުށްތައް ވެސް ތަހުޤީޤު ކުރަމުންނެވެ. ނަމަވެސް، މި ތަހުޤީޤުގެ ސަބަބުން ޕުޓިންއާއި ރަޝިޔާގެ ސަރުކާރުގެ އިސްވެރިންނަށް އަސަރެއް ކުރާނެ ކަމަށް ނުބެލެވެއެވެ.
ދަ ހޭގްގައި ޔޫކްރެއިން ހަނގުރާމައާ ގުޅޭ ވަކި އިދާރާއެއް ގާއިމުކުރުމަށް އެންމެ ބޮޑަށް ބާރު އަޅަމުންދާ އެއް ޤައުމަކީ ޖަރުމަނުވިލާތެވެ. ނަމަވެސް، މި ކަން ކުރެވޭނީ އ.ދ.ގެ ޢާންމު މަޖިލީހުގެ ރުހުމާ އެކުގައެވެ. އަދި، ޕުޓިންއާ ދެކޮޅަށް ދަޢުވާ ކުރަން ވަކި އިދާރާއެއް ނުވަތަ ކޯޓެއް ހެދުމަށް އ.ދ.ގެ ޢާންމު މަޖިލީހުގެ ރުހުން ހޯދުމަށް ޔޫކްރެއިނުން ދަނީ މަސައްކަތް ކުރަމުންނެވެ.
ނަމަވެސް، އެ ކަން ކާމިޔާބު ކުރުމަކީ ފަސޭހަ ކަމަކަށް ނުވާނެ ކަމުގައި ހުޅަނގުގެ ގިނަ ޤައުމުތަކުން ޤަބޫލުކުރެއެވެ. އަދި، މި ކަމަށް އޮތް ހައްލަކީ، ބައިނަލްއަޤުވާމީ ފަނޑިޔާރުންގެ ބެންޗެއް ހިމެނޭ ޚާއްޞަ ކޯޓެއް ޔޫކްރެއިނުގައި ގާއިމުކޮށް، ޕުޓިންއާ ދެކޮޅަށް ދަޢުވާ ކުރުން ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
ރަޝިޔާ ސިފައިން ޔޫކްރެއިނަށް ފޮނުވައި ހަނގުރާމަ ފަށާފައި ވަނީ މީގެ 11 މަސް ކުރިން 2022 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި ރަޝިޔާއިން ހިފާފައިވާ ސަރަޙައްދުތަކުގައި ހަނގުރާމައިގެ ޖަރީމާތައް ހިންގަމުންދާ ކަމުގައި ޔޫކްރެއިނުން ތުހުމަތު ކުރެއެވެ. އަދި، އެ ކަން އ.ދ.އާއި ބައިނަލްއަޤުވާމީ މުޖުތަމަޢުން ވެސް ވަނީ ބަލައިގަނެފައެވެ.
ރަޝިޔާ ސިފައިން އަތްދަށުން މިނިވަންކޮށްފައިވާ ބައެއް ސަރަޙައްދުތަކުން، ގިނަ ޢަދަދެއްގެ ބަޔަކު މެރުމަށްފަހު، ވަޅުލާފައިވާ ވަޅުގަނޑުތައް ވަނީ ފެނިފައެވެ. މަރާފައިވާ މީހުންގެ ތެރޭގައި ގިނަ ޢަދަދެއްގެ ޢާންމުން ހިމެނެއެވެ. އަދި، އަންހެނުންނާއި، އުރުމުން ދުވަސްވީ މީހުންގެ އިތުރުން ކުޑަކުދިންގެ ހަށިތައް ވެސް ވަނީ ފެނިފައެވެ.
ރަޝިޔާ ސިފައިން ޔޫކްރެއިނުގައި ކުރަމުންދާ ހަނގުރާމައިގައި އެ ޤައުމުގެ ރައްޔިތުންނާ ދެކޮޅަށް ބޮޑެތި ޖަރީމާތަކެއް ހިންގާފައިވާ ކަމުގައި އ.ދ.ގެ އިންސާނީ ހައްޤުތަކާ ބެހޭ އިދާރާއިން އެކުލަވައިލި އިންކުއަރީ ކޮމިޝަނުން ވެސް ވަނީ ބުނެފައެވެ.
އެ ކޮމިޝަނުން ފާހަގަކޮށްފައިވާ ބައެއް ކުށްތަކުގެ ތެރޭގައި ޢާންމުން ދިރިއުޅޭ ހިސާބުތަކަށް ބޮން އެޅުމާއި، ގަތުލު ކުރުމާއި، އަސީރުންނަށް އަނިޔާކުރުމުގެ އިތުރުން ޖިންސީ އަނިޔާ ހިމެނެއެވެ. ނަމަވެސް، އިންސާނިއްޔަތާ ޚިލާފު ކުށްތައް ހިންގާފައިވާ ކަމުގައި ކަށަވަރުކޮށް ބުނަން އަދި އަވަސް ކަމުގައި އެ ކޮމިޝަނުން ބުނެފައިވެއެވެ.