މިދިޔަ ބުދަދުވަހު އއ. މަތިވެރިން ގެއްލިގެން ހޯދަމުންދާ ޙަސަން އަލީ އަދިވެސް ފެނިފައިނުވާކަމަށާއި އެމީހާ ހޯދުމަށްޓަކައި އެރަށުގެ ފަޅުތެރެ ޑައިވްކޮށްގެން ބަލަން ފަށާފައިވާކަމަށް ފުލުހުން ވިދާޅުވެއްޖެއެވެ.
އުމުރުން 73 އަހަރުގެ ޙަސަން އަލީ ނުވަތަ ހަސަންފުޅުބެގެ ހަބަރެއް ނުވެގެން އޭނާ ހޯދުމުގެ މަސައްކަތް މަތިވެރި މީހުން ފެށީ މިދިޔަ ބުދަދުވަހު ހެނދުނުއެވެ. އެކަން ފުލުހުންނަށް ރިޕޯޓްކޮށްފައިވަނީ ގާތްގަނޑަކަށް އެދުވަހު ހެނދުނު 9:35 ހާއިރު އާއިލާއިންނެވެ. އެއާއެކު ހަސަންފުޅުބެގެ އާއިލާއާއި ރަށު ކައުންސިލާއި، މުއައްސަސާތަކާއި އަދި ރަށުގެ ކުދިބޮޑު އެންމެން ހަސަންފުޅު ހޯދުމަށް ނިކުތެވެ.
ހަސަންފުޅުބެ ގެއްލުނުފަހުން މިއަދަށް 4 ދުވަސް ވިއިރު އަދިވެސް އޭނާ ފެނިފައެއްނުވެއެވެ.
ފުލުހުން ވިދާޅުވީ ގެއްލުނު މީހާ ހޯދުމަށް މިހާތަނަށް ކުރި މަސައްކަތުން އެމީހާ އަދިވެސް ފެނިފައިނުވާތީ އޭނާ ހޯދުމުގެ މަސައްކަތް ހުއްޓާނުލާ ކުރަމުން އަންނަކަމަށެވެ. އެގޮތުން ރަށުގެ ފަޅުތެރެ، ޑައިވްކޮށްގެން ބެލުމުގެ މަސައްކަތް ކުރަމުން އަންނަކަމަށާއި ރަށުގެ ހުރިހާ ސަރަޙައްދަކާއި ގޭބިސީތަކާއި ފަޅު ގޮތިތައްވެސް ބަލާފައިވާކަމަށް ފުލުހުން ވިދާޅުވެއެވެ.
ރަށު ކައުންސިލްގެ ރައީސް އަސްލަމް ޕީއެސްއެމް ނިއުސްއަށް ވިދާޅުވީ، މިހާތަނަށް ބެލި ބެލުމުން ހަސަންފުޅުބެ އެންމެ ފަހުން ފެނިފައިވާކަން އެނގިފައިވަނީ ޖެނުއަރީ 31 ވީ އަންގާރަ ދުވަހު މެންދުރުފަހު 15:45ހާއިރު މަގުމަތިން ދިޔަ މީހަކަށްކަމަށެވެ. އަދި އޭގެފަހުން ހަސަންފުޅުބެ ފެނުނު އެއްވެސް މީހަކު ނެތްކަމަށް އޭނާ ބުންޏެވެ.