ވިލާތުގެ އިއްތިހާދު (އީ.ޔޫ)ގެ އެހީތެރިކަމާ އެކު ޔޫކްރެއިނުން އެ ޤައުމުގައި ބޭނުންކުރާ ދިއްލުންތައް ލެޑް ބޮތްކަށް ބަދަލުކުރަން ފަށައިފިއެވެ. މިއީ، ރަޝިޔާ ސިފައިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅިގެން، ހަކަތަ ބޭނުންކުރާ މިންވަރު ދަށްކޮށް، ކަރަންޓު ޚަރަދު ކުޑަކުރުމަށް ފަށާފައިވާ މަޝްރޫޢެކެވެ.
ރަޝިޔާ ސިފައިން ޔޫކްރެއިނަށް އަރާފައި ވަނީ މީގެ 11 މަސް ކުރިން، 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާގެ މައި އަމާޒަކަށްވީ، ޔޫކްރެއިނުގެ ސަރުކާރު ވައްޓައިލާ، އެ ޤައުމުގެ ބައެއް ސަރަޙައްދުތަކަށް އަތްގަދަކުރުމެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ ސަރުކާރު ވައްޓައިލަން ކުރަމުންދާ މަސައްކަތްތައް އަދި ކާމިޔާބެއް ނުވެއެވެ.
ނަމަވެސް، ރަޝިޔާ ސިފައިން ވަނީ ޔޫކްރެއިނުގެ އިރުމަތީގައިވާ ދޮންބާސްގެ ލުހާންސްކާއި ޑޮނެޓްސްކުގެ ބޮޑު ސަރަޙައްދަކަށް އަތްގަދަކޮށްފައެވެ. އަދި، ދެކުނުގައިވާ ޒަޕޮރީޜިޔާ ވެސް މިހާރު އޮތީ ރަޝިޔާ ސިފައިން އަތްދަށުގައެވެ. ރަޝިޔާ ސިފައިން ޒަޕޮރީޜިޔާގެ އުތުރުން އޮންނަ ޚާރްސަން ހިފި ނަމަވެސް، ޔޫކްރެއިން ސިފައިން ވަނީ އެ ސަރަޙައްދު މިނިވަންކޮށްފައެވެ.
ހަނގުރާމައިގައި ލިބެމުންދިޔަ އެ ފަދަ ނާކާމިޔާބީތަކާ ގުޅިގެން ރަޝިޔާއިން ވަނީ ޔޫކްރެއިނުގެ ވެރިރަށް ކީވްގެ އިތުރުން ބޮޑެތި އެހެން ރަށްތަކަށް ވަރުގަދަ މިސައިލް ހަމަލާތަކެއް ދޭން ފަށާފައެވެ. މީގެ ތެރެއިން ގިނަ ހަމަލާތައް އަމާޒުކޮށްފައި ވަނީ، ކަރަންޓު ފަދަ އަސާސީ ޚިދުމަތްތައް ދޭން ބޭނުންކުރާ ވަސީލަތްތަކަށެވެ.
މި ހަމަލާތަކުގައި ކަރަންޓުގެތަކާއި ކަރަންޓު ވިއުގައަށް ބޮޑެތި ގެއްލުންތަކެއް ލިބި، ބޮޑު ސަރަޙައްދަކުން ކަރަންޓުގެ ޚިދުމަތް މެދުކެނޑުނެވެ. އެ ސަރަޙައްދުތަކަށް ޚިދުމަތް އަލުން ގުޅައިދޭން ޔޫކްރެއިނުން ދަނީ މަސައްކަތް ކުރަމުންނެވެ. ގިނަ ސަރަޙައްދުތަކަށް އެ ޚިދުމަތް އަލުން ގުޅައިދީފައިވީ ނަމަވެސް، ރަޝިޔާއިން އަދިވެސް ދަނީ ކަރަންޓުގެތަކާއި ޓްރާންސްފޯމަރުތަކަށް އަމާޒުކޮށް ހަމަލާދެމުންނެވެ.
އީ.ޔޫ.ގެ އެހީތެރިކަމާ އެކު އެ ޤައުމުގައި ބޭނުންކުރާ ޢާންމު ދިއްލުންތައް ލެޑް ބޮތްކަށް ބަދަލުކުރަން ފަށާފައި މި ވަނީ، އެ ސަބަބާ ހުރެ، ކަރަންޓުގެ ޚަރަދު ކުޑަކުރުމުގެ ބޭނުމުގައެވެ. 2022 ވަނަ ޑިސެންބަރު މަހު ފެށި މި މަޝްރޫޢުގެ ދަށުން އީ.ޔޫ.އިން ޔޫކްރެއިނަށް 30 މިލިޔަން ލެޑް ބޮކި ފޯރުކޮށްދޭނެއެވެ. މިއީ 33 މިލިޔަން ޑޮލަރުގެ އަގުހުރި މަޝްރޫޢެކެވެ.
ލެޑް ބޮކިތައް ހަރުކުރުމުގެ މަސައްކަތް ހުސްވި ހަފުތާގައި ފަށާފައިވާ ކަމަށާއި، މިހާރުވެސް 750,000 އަށްވުރެ ބޮކި ލެޑް ބޮތްކަށް ބަދަލުކޮށްފައިވާ ކަމުގައި ޔޫކްރެއިނުގެ ބޮޑުވަޒީރު ޑެނިސް ޝްމީގަލް ވިދާޅުވިއެވެ. އަދި، ކުރިއަށް އޮތް ހަފުތާތަކުގެ ތެރޭގައި ޔޫކްރެއިނުގެ އެކި ސަރަޙައްދުތަކަށް ހަ މިލިޔަން ލެޑް ބޮކި ފޮނުވުމުގެ މަސައްކަތް ފަށާފައިވާ ކަމުގައި އޭނާ ވިދާޅުވިއެވެ.
އީ.ޔޫ. ކޮމިޝަނުގެ ރައީސާ އުރްސުލާ ވޮންޑެ ލަޔަން މި ހަފުތާ ބަންދުގައި ވަނީ ޔޫކްރެއިނަށް ވަޑައިގަންނަވައި، ޒެލެންސްކީއާ ބައްދަލުކުރައްވާފައެވެ. އީ.ޔޫ.ގެ އިސް އޮފިޝަލުން ކީވްއަށް ވަޑައިގަންނަވާފައި ވަނީ، އެ ޤައުމަށް އެހީތެރިކަން ފޯރުކޮށްދިނުމާ ގުޅޭ ސަމިޓެއްގައި ބައިވެރިވެ ވަޑައިގެންނެވުމަށެވެ.
ޒެލެންސްކީއާ އެކު ބޭއްވެވި ބައްދަލުވުމުގައި ވާހަކަފުޅު ދައްކަވަމުން ވޮންޑެ ލަޔަން ވަނީ، ޔޫކްރެއިނަށް އިތުރު 5 މިލިޔަން ލެޑް ބޮކި ފޯރުކޮށްދޭނެ ކަމަށް ވިދާޅުވެފައެވެ. މި މަޝްރޫޢުގެ ދަށުން އަހަރެއްގެ މައްޗަށް 1 ޖިގަވޮޓުގެ ހަކަތަ ސަލާމަތް ކުރެވޭނެއެވެ. އެއީ، ނިއުކްލިޔަރ ހަކަތަ އުފައްދާ ޕްލާންޓަކުން އަހަރެއްގެ މައްޗަށް އުފައްދާ ކަރަންޓު ހަކަތާއި އެއްވަރުގެ ޢަދަދެކެވެ.