ދެކުނު އެމެރިކާގެ ޤައުމެއް ކަމުގައިވާ ޗިލީގެ ޖަންގަލިތަކުގައި ރޯވެފައިވާ އަލިފާންގަނޑު ޢާންމުން ދިރިއުޅޭ ސަރަޙައްދުތަކަށް ފެތުރި، 13 މީހުން މަރުވެއްޖެއެވެ. ރޯވެފައި ވަނީ ޗިލީގެ ދެކުނާއި މެދުތެރޭގެ ސަރަޙައްދުގެ ޖަންގަލިތަކުގައެވެ.
ޖަންގަލިތަކުގެ 47,000 ހެކްޓަރުގެ ސަރަޙައްދެއް މިހާރު ވެސް ވަނީ އަނދާފައެވެ. އަދި، 100 އަށްވުރެ ގެއަށް ވަނީ ގެއްލުން ލިބިފައެވެ. އާދަޔާޚިލާފަށް ފިނިހޫނުމިން މައްޗަށް ގޮސް ޖަންގަލިތަކުގައި ރޯވާން ފަށާފައި ވަނީ ފެބްރުވަރީ މަހުގެ 1 ވަނަ ދުވަހުއެވެ.
"އަލިފާން ރޯވުމުގެ ސަބަބުން މިހާތަނަށް 13 މީހަކު މަރުވެފައިވާ ކަން ވަނީ ކަށަވަރު ކުރެވިފައި. މީގެ ތެރެއިން 11 މީހަކު މަރުވެފައި ވަނީ ސެންޓަ ހުއާނާ މުނިސިޕަލިޓީގައި،" ޗިލީގެ ކާރިސާތަކާ ބެހޭ ޤައުމީ އިދާރާގެ އިސްވެރިޔާ މޮރީސިޔޯ ޓެޕިޔާ ވިދާޅުވިއެވެ.
މަރުވި މީހުންގެ ތެރޭގައި އަލިފާން ނިއްވާ ޓީމުތަކުގެ ދެ މެންބަރުން ވެސް ހިމެނެއެވެ. އެ މީހުން މަރުވީ، އަލިފާން ނިއްވުމަށް ބޭނުންކުރަމުން ދިޔަ ހެލިކޮޕްޓަރު ވެއްޓުމުގެ ސަބަބުންނެވެ. އެއީ، ހެލިކޮޕްޓަރު ދުއްވަން އިން ޕައިލެޓާއި މެކޭނިކެކެވެ. ޕައިލެޓަކީ ބޮލީވިޔާގެ ރައްޔިތެއް ކަމުގައި ޗިލީގެ ދަނޑުވެރިކަމާ ބެހޭ ވަޒީރު އެސްތަބާން ވެލެންޒުއޭލާ ވިދާޅުވިއެވެ.
ޗިލީގެ ޖަންގަލިތަކުގައި 204 އަށްވުރެ ގިނަ އަލިފާންގަނޑު ރޯވެފައިވާ އިރު، މީގެ ތެރެއިން 56 ސަރަޙައްދެއްގައި ރޯވެފައިވާ އަލިފާންގަނޑުތައް ކޮންޓްރޯލް ނުވެ އަނދަމުންދާ ކަމުގައި އޮފިޝަލުން ބުނެއެވެ. އަދި، އަލިފާންގަނޑުތައް މީހުން ދިރިއުޅޭ ސަރަޙައްދުތަކަށް ފެތުރުމުގެ ސަބަބުން ބައެއް ހިސާބުތަކުގައި ކުއްލި ހާލަތު ވަނީ އިޢުލާނުކޮށްފައެވެ.
އަލިފާން ނިއްވުމުގެ މަސައްކަތް ކުރިއަށްދާ ގޮތް ބައްލަވައިލެއްވުމަށް އެ ޤައުމުގެ ރައީސް ގެބްރިއޭލް ބޯރިޗް ވަނީ ޒިޔާރަތް ކުރައްވާފައެވެ. ބިޔޯބިޔޯ ސަރަޙައްދުގައި މަރުވި މީހުންގެ ތެރޭގައި ޢާންމުންގެ ހަތަރު މީހުން ހިމެނޭ ކަމުގައި އެ ޤައުމުގެ ދާޚިލީ ވަޒީރު ކެރޮލީނާ ތޯރާ ވިދާޅުވިއެވެ.
ދެ މީހަކު މަރުވެފައި ވަނީ އެ މީހުން ދަތުރުކުރަމުންދިޔަ މަގު ވަށައިގެން ރޯވުމުގެ ސަބަބުންނެވެ. އިތުރު ދެ މީހުން މަރުވީ އަލިފާންގަނޑުން ސަލާމަތްވުމަށް މަސައްކަތް ކުރުމުގެ ތެރޭގައި ހިނގި ކާރު އެކްސިޑެންޓެއްގައެވެ. އަލިފާން ނިއްވުމުގެ މަސައްކަތުގައި 2,300 އަށްވުރެ ގިނަ މީހުން ހަރަކާތްތެރިވަމުންދާ ކަމުގައި ވެސް ތޯރާ ވިދާޅުވިއެވެ. އަދި، 75 ވައިގެ އުޅަނދު ދަނީ ބޭނުން ކުރަމުންނެވެ.
ޗިލީގެ ފިނިހޫނުމިން ވަނީ 40 ޑިގްރީ ސެލްސިއެސްއަށް އުފުލިފައެވެ. 2017 ވަނަ އަހަރުގެ ޗިލީގެ ޖަންގަލިތަކުގެ ރޯވެ ބޮޑެތި ގެއްލުންތަކެއް ލިބުނެވެ. 11 މީހުން މަރުވި އެ ހާދިސާގައި 1,500 އަށްވުރެ ގެ އަނދައި، 467,000 ހެކްޓަރުގެ ސަރަޙައްދެއް އެނދިއެވެ.