ވިލާތުގެ އިއްތިހާދު (އީ.ޔޫ) އެންމެ އިސްވެރިން ޔޫކްރެއިންގެ ވެރިރަށް ކީވްއަށް ވަޑައިގަންނަވައިފިއެވެ. އެ ބޭފުޅުން ކީވްއަށް ވަޑައިގަންނަވާފައި މި ވަނީ، ރައީސް ވޮލޮޑޮމީރް ޒެލެންސްކީ ބާއްވަވާ ސަމިޓެއްގައި ބައިވެރިވެ ވަޑައިގަތުމަށެވެ. މި ސަމިޓުގެ ބޭނުމަކީ، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރުމާ ގުޅޭގޮތުން މަޝްވަރާކުރުމެވެ.
ސަމިޓުގައި ބައިވެރިވެ ވަޑައިގެންނެވުމަށް ކީވްއަށް ވަޑައިގަންނަވާފައިވާ އީ.ޔޫ.ގެ އިސްވެރިންގެ ތެރޭގައި އެ އިއްތިހާދުގެ ކޮމިޝަނުގެ ރައީސް ޗާލްސް މިޝެލްއާއި، ވިލާތުގެ ކޮމިޝަނުގެ ރައީސާ އުރްސުލާ ވޮންޑެ ލަޔަންގެ އިތުރުން އެ އިއްތިހާދުގެ ޚާރިޖިއްޔާގެ އިސްވެރިޔާ ޖޯސެފް ބޮރެލް ހިމެނިވަޑައިގަންނަވައެވެ. ޔޫކްރެއިން އީ.ޔޫ.ގެ މެންބަރު ކަން ހޯދުމަށް ކުރަމުންދާ މަސައްކަތްތަކާ ގުޅޭ ގޮތުން ވެސް ސަމިޓުގައި މަޝްވަރާކުރާނެއެވެ.
ރަޝިޔާ ސިފައިން ޔޫކްރެއިނަށް ފޮނުވައިގެން ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމަ ފެށިތާ ކުޑަ ދުވަސްކޮޅެއް ފަހުން ޔޫކްރެއިނުން ވަނީ އީ.ޔޫ.ގެ މެންބަރަކަށްވުމަށް އެދި ހުށަހަޅާފައެވެ. އީ.ޔޫ.އިން އެ ކަމަށް އާނބަސް ބުނެ، އެ އިއްތިހާދާ ގުޅުމުގެ ކުރިން ޔޫކްރެއިނުން ފުރިހަމަކުރަން ޖެހޭ ކަންކަން ކުރުމަށް އެ ޤައުމަށް ވަނީ ފުރުޞަތު ދީފައެވެ. އެއީ، 2022 ވަނަ އަހަރުގެ ޖޫން މަހެވެ.
އީ.ޔޫ.ގެ އިސްވެރިންނާ އެކު ބާއްވަވާ ސަމިޓުގައި ޒެލެންސްކީ އެންމެ ބޮޑަށް ބާރުއަޅުއްވާނެ ކަމަށް ބެލެވޭ އެއް ކަމަކީ، އެ އިއްތިހާދު މެންބަރުކަން ޔޫކްރެއިނަށް ދިނުމުގެ ކަންކަން އަވަސްކުރުވުމެވެ. އީ.ޔޫ.ގެ އިސްވެރިން ކީވްއަށް ވަޑައިގެންނެވި ވަގުތުގައި ވެސް މިސައިލް ހަމަލާތަކުގެ އިންޒާރުގެ ރަނގަބީލުތައް ދިޔައީ ޖަހަމުންނެވެ.
"ޔޫކްރެއިނަށް އެހީތެރިކަން ފޯރުކޮށްދެވެން އޮތް ހުރިހާ ދާއިރާއަކުން އެކަން ކުރުމުގައި، އަދި އީ.ޔޫ.ގެ މެންބަރަކަށްވުމަށް ޔޫކްރެއިނުން ކުރަމުންދާ ދަތުރުގައި އެހީތެރިކަން ފޯރުކޮށްދިނުމުގައި އީ.ޔޫ.އިން ދެމިއޮންނާނެ،" މިޝެލް ވިދާޅުވިއެވެ.
"ޔޫކްރެއިނާއި އީ.ޔޫ.އާ ގުޅިގެން މަސައްކަތްކޮށްގެން މެނުވީ، މި ޤައުމުގެ ރައްޔިތުންގެ އަގުހުރި ފުރާނަތައް ސަލާމަތެއް ނުކުރެވޭނެ،" ވޮންޑެ ލަޔަންއާ އެކު ބޭއްވެވި ބައްދަލުވުމަކަށް ފަހު ޒެލެންސްކީ ވިދާޅުވިއެވެ. އީ.ޔޫ.ގެ މެންބަރަކަށްވުމަށް ޔޫކްރެއިނުން ކުރަމުންދާ މަސައްކަތްތަކަށް ފޮންޑެ ލަޔަން ވަނީ މަރުޙަބާ ވިދާޅުވެފައެވެ. އަދި، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރަން މަސައްކަތް ކުރަމުންދާ ކަމުގައި އޭނާ ވިދާޅުވިއެވެ.
އީ.ޔޫ.އިން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ޤައުމު އިޤުތިޞާދަށް ބޮޑެތި އަސަރުތަކެއް ކުރަމުންދާ ކަމުގައި ފޮންޑެ ލަޔަން ވިދާޅުވިއެވެ. އަދި، ރަޝިޔާއިން ތެޔޮ ގަންނަ އަގު ކޮންޓްރޯލް ކުރުމާ ގުޅިގެން އެ ޤައުމަށް ދުވާލެއްގެ މައްޗަށް 160 މިލިޔަން ޔޫރޯގެ ގެއްލުންވަމުންދާ ކަމުގައި އޭނާ ވިދާޅުވިއެވެ.
ނަމަވެސް، ރަޝިޔާގެ ރައީސް ވްލަޑިމިއަރ ޕުޓިން ވިދާޅުވީ، ފިޔަވަޅުތަކުގެ ސަބަބުން ރަޝިޔާއަށް އަސަރެއް ނުކުރާ ކަމަށާއި، އެ ކަމާ ގުޅިގެން ހަނގުރާމަ ހުއްޓައިލުމުގެ އެއްވެސް ވިސްނުމެއް ނެތް ކަމުގައެވެ. މި ކަމާ ގުޅިގެން ޒެލެންސްކީ ވަނީ، ރަޝިޔާއާ ދެކޮޅަށް އަޅާފައިވާ ފިޔަވަޅުތައް އިތުރަށް ހަރުކަށި ކުރުމަށް ގޮވައިލާފައެވެ.