އެމެރިކާގެ ނައިބު ރައީސް ކަމަލާ ހެރިސް އެ ޤައުމުގެ ފުލުހުންނަށް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވައިފިއެވެ. އޭނާ މި މޭރުމުން ވާހަކަފުޅު ދައްކަވާފައި ވަނީ، ފުލުހުން އަނިޔާކުރުމުގެ ސަބަބުން މަރުވި ކަޅު ނަސްލުގެ މީހެއް ކަމުގައިވާ ޓައިރީ ނިކޮލްސްގެ ޖަނާޒާގައި ވާހަކަފުޅު ދައްކަވަމުންނެވެ.
ނިކޮލްސްއަށް އަނިޔާކުރި ފަސް ފުލުހުންގެ މައްޗަށް މިހާރު ވަނީ ދަޢުވާ އުފުލާފައެވެ. އަދި، އޭނާއަށް އަނިޔާކުރި ކަމުގެ ކުށުގައި އެ ފަސް ފުލުހުން ވަނީ ވަޒީފާއިން ވަކިކޮށްފައެވެ. އެ ފަސް ފުލުހުންނަކީ ވެސް ކަޅު ނަސްލުގެ މީހުންނެވެ. އުމުރުން 29 އަހަރުގެ ނިކޮލްސް މަރައިލާފައި ވަނީ ޓެނެސީގެ ރަށެއް ކަމުގައިވާ މެމްފިސްގައި ޖަނަވަރީ 7 ވަނަ ދުވަހުއެވެ.
"ނިކޮލްސްގެ ޢާއިލާއަށް އެ ގެއްލިގެން ދިޔައީ ދަރިއެއް. އެ އާޢިލާގެ ކުދިންގެ ބޭބެ. ފުލުހުންނަކީ، ޢާންމުންގެ ސަލާމަތާއި ރައްކާތެރިކަން ކަށަވަރުކުރުމުގެ މަތިވެރި ޒިންމާ މަތިކޮށްފައިވާ މީހުން. ނަމަވެސް، ފުލުހުންގެ އަތްފައިގެ ނުރައްކަލުގައި ފުރާނައެއް މި ވަނީ ގެއްލިފައި،" ފުލުހުންނަށް ފާޑުވިދާޅުވަމުން ހެރިސް ވިދާޅުވިއެވެ.
ޖަނަވަރީ 7 ވަނަ ދުވަހު މެމްފިސްގައި ހިނގި ހާދިސާގައި ނިކޮލްސް ހައްޔަރުކުރަން ފުލުހުން މަސައްކަތް ކުރީ އެހެން މީހުންގެ ފުރާނައަށް ނުރައްކާވާ ގޮތަށް އެއްގަމު އުޅަނދެއް ދުއްވުމުގެ ކުށުގައެވެ. ފުލުހުން އޭނާ ހުއްޓުވަން އުޅުމުން އޭނާ ވަނީ ފިލަން މަސައްކަތް ކޮށްފައެވެ. ނަމަވެސް، ފުލުހުން ވަނީ އޭނާ ހުއްޓުވައި، އޭނާއަށް އަނިޔާކޮށްފައެވެ. އޭނާ މަރުވީ، ޖަނަވަރީ 10 ވަނަ ދުވަހުއެވެ.
"ނިކޮލްސް މަރައިލަން ފުލުހުން ހިންގާފައިވާ އަމަލަކީ، ޢާންމުންގެ ސަލާމަތާއި ރައްކާތެރިކަން ކަށަވަރު ކުރަން ހިންގާފައިވާ އަމަލެއް ނޫން. އެއީ، ޢާންމުންގެ ރައްކާތެރިކަމާ އެއްވެސް ގުޅުމެއް ނެތް ފިނޑި އަދި މުޑުދާރު އަމަލެއް. އެހެންނޫން ނަމަ، ނިކޮލްސް މިއަދު އަޅުގަނޑުމެންނާ އެކުގައި ވީސް،" ހެރިސް ވިދާޅުވިއެވެ. ފުލުހުން އޭނާއަށް އަނިޔާކުރާ މަންޒަރު ފެންނަ ވީޑިޔޯތައް މިހާރު ވަނީ ޢާންމުކޮށްފައެވެ. އަދި، ނިކޮލްސް މަރުވި ހާދިސާއާ ގުޅިގެން އެމެރިކާގެ އެކި ކަންކޮޅުތަކުގައި ފުލުހުންނާ ދެކޮޅަށް ބޮޑެތި މުޒާހަރާތަކެއް ވަނީ ފަށާފައެވެ.
ނިކޮލްސްގެ ސިފަ ނޭނގޭ ވަރަށް ފުލުހުން އޭނާއަށް އަނިޔާކޮށްފައިވާ ކަމުގައި އޭނާގެ ޢާއިލާގެ ވަކީލު ބެން ކްރަމްޕް ކޯޓުގައި ބުންޏެވެ. މި ހާދިސާއާ ގުޅިގެން ފަސް ފުލުހުން ވަޒީފާއިން ވަކިކޮށްފައި ވަނީ، ހާލަތާ ނުބައްދަލު ބާރުގެ ބޭނުންކޮށްފައިވާ ކަން، ފުލުހުން ހިންގި ތަހުޤީޤަކަށް ހާމަވުމުންނެވެ.
ނިކޮލްސްގެ މަރަކީ، ފުލުހުންގެ އަނިޔާގައި އެމެރިކާގެ ކަޅު ނަސްލުގެ މީހަކު މަރުވި ފުރަތަމަ ފަހަރެއް ނޫނެވެ. 2020 ވަނަ އަހަރުގެ މޭ މަހު ޖޯޖް ފްލޮއިޑް ކިޔާ މީހަކު ވަނީ، ފުލުހުން އަނިޔާކުރުމުގެ ސަބަބުން މަރުވެފައެވެ. އެ ހާދިސާއާ ގުޅިގެން ފުލުހުންނާ ދެކޮޅަށް އެމެރިކާގެ އެކި ކަންކޮޅުތަކުގައި މުޒާހަރާކޮށްފައިވެއެވެ.
ނިކޮލްސްގެ މަރާ ގުޅިގެން ފަސް ފުލުހުންގެ މައްޗަށް އުފުލާފައި ވަނީ ގަސްދުގައި މީހަކު މެރުމުގެ ދަޢުވާއެވެ. އަދި، އަނިޔާކުރުމާއި ރަހީނުކުރުމުގެ ދަޢުވާ ވެސް އެ މީހުންގެ މައްޗަށް ވަނީ އުފުލާފައެވެ. މެމްފިސްއަކީ ޓެނެސީގެ ދެވަނައަށް އެންމެ ބޮޑު ރަށެވެ. އެ ރަށުގެ އާބާދީގެ 65 އިންސައްތައަކީ ކަޅު ނަސްލުގެ މީހުންނެވެ.