ރަޝިޔާއިން ޔޫކްރެއިނުގެ އިރުމަތީގައިވާ ކްރެމަޓޮރްސްކަށް ދިން މިސައިލް ހަމަލާތަކެއްގައި ޢާންމުންގެ ތިން މީހުން މަރުވެއްޖެއެވެ. ހަމަލާތަކުގައި ކްރެމަޓޮރްސްކްގައި ޢާންމުން ދިރިއުޅޭ 10 ޢިމާރާތަކަށް ބޮޑެތި ގެއްލުންތައް ލިބުނެއެވެ. ކްރެމަޓޮރްސްކަކީ ޑޮނެޓްސްކްގެ އުތުރުގައި އޮންނަ ރަށެކެވެ.
ރަޝިޔާގެ ހަމަލާތައް އަމާޒުކޮށްފައި ވަނީ ކްރެމަޓޮރްސްކުގެ ޢާންމުން ދިރިއުޅޭ އެޕާޓްމަންޓު ޢިމާރާތަކަށް ކަމުގައި އެ ރަށުގެ ފުލުހުން ބުނެއެވެ. މި ހަމަލާތަކުގައި 10 ޢިމާރާތަށް ބޮޑެތި ގެއްލުންތައް ލިބިފައިވާއިރު، އެއް ޢިމާރާތް ވަނީ ސުންނާފަތިވެފައެވެ. ހަލާކުވެފައިވާ ޢިމާރާތްތަކުގެ ދަށުވެފައިވާ ކަމަށް ބެލެވޭ މީހުން ހޯދުމަށް އޮފިޝަލުން އަދިވެސް ދަނީ މަސައްކަތް ކުރަމުންނެވެ.
ރަޝިޔާގެ ހަމަލާތަކުގައި ބޭނުންކޮށްފައި ވަނީ އިސްކަންދަރު-ކޭ މަރުކާގެ މިސައިލް ކަމުގައި ޔޫކްރެއިނުން ބުނެއެވެ. އަދި، މި ހަމަލާތަކުގައި މަރުވެފައިވަ ނީ ދެމަފިރިންނާއި 61 އަހަރުގެ އުމުރުން ދުވަސްވީ މީހެއް ކަމުގައި ވެސް ފުލުހުން ބުނެއެވެ. އެ ހަމަލާތަކަށް ފަހު ކްރެމަޓޮރްސްކްގެ މެދުތެރެއަށް ދިން އިތުރު ހަމަލާތަކެއްގައި ފަސް މީހަކު ޒަޚަމުވެ، އިތުރު 12 ޢިމާރާތަށް ގެއްލުންވި ކަމުގައި އެ ރަށުގެ ގަވަރުނަރު ޕަވްލޯ ކިރިލެންކޯ ވިދާޅުވިއެވެ.
ހުސްވި ޖަނަވަރީ މަހު ރަޝިޔާއިން ޔޫކްރެއިނުގެ އިރުމަތީގައިވާ ޑްނިޕްރޯއަށް ދިން މި ފަދަ ހަމަލާތަކެއްގައި ޢާންމުންގެ 44 މީހުން މަރުވިއެވެ. އެ ހަމަލާތައް ވެސް އަމާޒުކޮށްފައި ވަނީ ޢާންމުން ދިރިއުޅޭ އެޕާޓްމަންޓް ޢިމާރާތްތަކަށެވެ. މިއީ ގަސްދުގައި ދީފައިވާ ހަމަލާތަކެއް ކަމަށް ތުހުމަތުކުރައްވައި، މިއީ ޔޫކްރެއިނުގެ ރައްޔިތުން މި ވަގުތު ދިރިއުޅެން ޖެހިފައިވާ ބިރުވެރި ހާލު ކަމުގައި އެ ޤައުމުގެ ރައީސް ވޮލޮޑޮމީރް ޒެލެންސްކީ ވިދާޅުވިއެވެ.
ކްރެމަޓޮރްސްކުގެ ޢިމާރާތްތަކުގެ ދަށުވެފައިވާ ކަމަށް ބެލެވޭ މީހުން ހޯދުމުގެ މަސައްކަތް ކުރިއަށްދާއިރު، ރަޝިޔާއިން ހަމަލާތައް ދީފައިވަނީ ޢާންމުންގެ ގިނަ ޢަދަދެއްގެ މީހުން ދިރުއުޅޭ ސަރަޙައްދުތަކަށް ކަމުގައި ކިރިލެންކޯ ވިދާޅުވިއެވެ. އަދި، ހަމަލާތައް ދިން ވަގުތު ގިނަ ޢަދަދެއްގެ ބަޔަކު ތިބީ ބޮމުގެ ހަމަލާތަކުން ރައްކާތެރިވުމަށް ހަދާފައިވާ ބިންގަރާސްތަކުގައި ކަމުގައި ވެސް އޭނާ ވިދާޅުވިއެވެ.
ރަޝިޔާގެ މި ފަދަ ހަމަލާތައް ހުއްޓުވޭނީ ޔޫކްރެއިނަށް ބާރުގަދަ ޒަމާނީ ހަތިޔާރު ލިބިގެން ކަމުގައި ޒެލެންސްކީ ވިދާޅުވިއެވެ. ހަނގުރާމަމަތީ ޓޭންކާއި އަސްކަރީ މަތިންދާބޯޓާއި ދުރުރާސްތާ މިސައިލް ހޯދަން އޭނާ ގެންދަވަނީ މަސައްކަތް ކުރައްވަމުންނެވެ. ނަމަވެސް، ޢާންމުން ދިރިއުޅޭ ޢިމާރާތްތަކަށް ގަސްދުގައި ރަޝިޔާއިން ހަމަލާދެމުންދާ ކަމަށް ޔޫކްރެއިނުން ކުރާ ތުހުމަތުތައް އެ ޤައުމުން ދޮގުކުރެއެވެ.
ދުރުރާސްތާ ރޮކެޓް ހިމެނޭ 2 ބިލިޔަން ޑޮލަރުގެ އަގުހުރި އަސްކަރީ އެހީގެ ސާމާނު ފޮނުވަން އެމެރިކާއިން މި ހަފުތާގައި ވަނީ ނިންމާފައެވެ. އަދި، ނޭޓޯގެ ޤައުމުތަކުން ދާދިފަހުން ވަނީ އެންމެ ފަހުގެ ޒަމާނީ ހަނގުރާމަތީ ޓޭންކު ޔޫކްރެއިނަށް ފޮނުވަން ނިންމާފައެވެ. މީގެ ތެރޭގައި ހިމެނެނީ އެމެރިކާގައި އުފައްދާ "އެބްރާމްސް" މަރުކާގެ ޓޭންކާއި، އިނގިރޭސިވިލާތުގައި އުފައްދާ "ޗެލެންޖަރ 2" މަރުކާގެ ޓޭންކުގެ އިތުރުން ޖަރުމަނުވިލާތުގައި އުފައްދާ "ލެޕަޑް 2" މަރުކާގެ ޓޭންކުތަކެވެ. ޖުމުލަ 321 ޓޭންކު ޔޫކްރެއިނަށް ފޮނުވަން އެ ޤައުމުތަކުން ދަނީ މަސައްކަތް ކުރަމުންނެވެ.