ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރުމާމެދު ގޮތެއް ނިންމާނީ، އަންނަ ފެބުރުއަރީ މަހު ބާއްވާ ކޮންގްރެސް އިން ހޮވާ ކައުންސިލުންކަމަށް އެޕާޓީން ބުނެފިއެވެ.
ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީީ (ޖޭޕީ) ގެ ކޮންގްރެސް މިފެށޭ ފެބުރުއަރީ މަހުގެ، ފަހު ހަފްތާގައި ބާއްވާނެކަމަށް އެޕާޓީން ބުންޏެވެ. ޖުމްހޫރީ ޕާޓީގެ އަސާސީ ޤަވައިދު ބުނާގޮތުން ޕާޓީގެ ހުރިހާ މެމްބަރުން ތަމްސީލުކުރެވޭ ގޮތަށް ބާއްވާ ކޮންގްރެސް ނުވަތަ ޤައުމީ މަޖިލިސް ރިޔާސީ އިންތިޚާބު އޮންނަ އަހަރުގެ މާރިޗުމަސް ނިމުމުގެ ކުރިން ބާއްވަންޖެހެއެވެ. އެހެންނަމަވެސް ޕާޓީގެ ކައުންސިލުން ނިންމައިފި ނަމަ ޤައުމީ ޖަލްސާ އެއަށްވުރެ އަވަސްކުރަން ނުވަތަ ފަސްކުރުމަކަށްވެސް ޖޭޕީގެ އަސާސީ ޤަވައިދު ހުރަހެއް ނާޅައެވެ.
ޖުމްހޫރީ ޕާޓިގެ ހުރިހާ އިންތިޚާބީ މަޤާމުތަކަށް މީހުން ހޮވުމަށް އަންނަ ފެބުރުއަރީ މަހު ބާއްވާ ޤައުމީ މަޖިލީހުގެ ޖަލްސާގައި އެޕާޓީގެ ކައުންސިލް އިންތިޚާބުކުރާނެއެވެ. ޖޭޕީން ބުނީ، އަލަށް އިންތިޚާބުވާ ކައުންސިލްގެ ފުރަތަމަ ޖަލްސާގައި، ރިޔާސީ އިންތިޚާބުގައި ވާދަކުރުމާމެދުވެސް ގޮތެއް ނިންމާނެކަމަށެވެ. ޖޭޕީން ބުނީ ޤައުމީ ޖަލްސާއަށް ވާންޖެހޭ ހުރިހާ އިދާރީ ތައްޔާރީތަކެއް މިހާރު ނިމިފައިވާކަމަށެވެ.
ޖޭޕީން މިހެން ބުނެފައިވާއިރު، އެޕާޓިގެ ލީޑަރު ޤާސިމް އިބްރާހީމް މީގެ ކުރިން ވަނީ، އެޕާޓީން ރިޔާސީ އިންތިޚާބުގައި ވާދަކުރާނެކަމަށް ވިދާޅުވެފައެވެ.
ސިޔާސީ ޕާޓީތަކުގެ ދަފްތަރުގައިވާ ގޮތުން ތިންވަނަ އަށް އެންމެ މެމްބަރުން ގިނައީ ޖުމްހޫރީ ޕާޓީގައެވެ. އެޕާޓީގެ މެމްބަރުންގެ އަދަދީ 17913އެވެ.